Feijóo levou no seu programa impedir as reformas electorais sen consenso

Referencia á reforma electoral no programa do PP en 2009 CC-BY-SA Praza Pública

"Pretendemos dar resposta ao clamor cidadán que nos pide solucionar os problemas e non pelexas entre nós". "Chegou o momento de comprometerse e de devolver a credibilidade á clase política, iso é o que quero certificar". A mediados de febreiro de 2009, cando restaban apenas dúas semanas para as eleccións autonómicas, Alberto Núñez Feijóo presentaba deste xeito as liñas mestras do seu programa electoral, resumido despois no publicitadísimo Contrato con Galicia. Feijóo presentaba os seus compromisos "fronte aos supostos programas electorais de PSOE e BNG, que non son máis ca un trámite que realizan a sabendas de que non os van cumprir". Naquel programa, entre outros compromisos, incluíase a promesa de impedir por lei as reformas electorais sen consenso, xusto o que agora se dispón a facer o propio Feijóo en Galicia mentres anima a que Mariano Rajoy faga o propio no Estado.

Ese obxectivo programático chegaba apenas dous anos despois de que, como vén relatando Praza Pública, Feijóo reclamase ilegalizar as reformas electorais unilaterais. No marco do intento de reforma do Estatuto o líder dos conservadores galegos reclamara equiparar as eventuais modificacións da Lei de Eleccións con outros procesos parlamentarios como a elección do Valedor do Pobo ou a propia modificación estatutaria, que esixen acordos de maiorías cualificadas, de dous terzos ou tres quintos do Parlamento e, polo tanto, o pacto de máis dunha forza política. Coherentemente con esta reclamación, incluírano no seu programa, nomeadamente na páxina 274 do documento que titularan Propostas para recargar Galicia.

O PP propuñar condicionar as reformas electorais ao apoio de dous terzos do Parlamento porque "a normativa electoral fixa as regras básicas do xogo no sistema democrático"

Nun contexto no que se comprometía a retomar a elaboración dun novo Estatuto de Autonomía o PP de Feijóo explicaba que, "no ámbito da norma estatutaria", ían propoñer unha serie de medidas "para reforzar a centralidade do Parlamento". Entre elas figuraba "establecer unha maioría cualificada de dous terzos para aprobar e reformar a lexislación electoral galega". "A normativa electoral -evidenciaba aquel texto- é a que fixa as regras básicas de xogo no sistema democrático, de aí a conveniencia de que concite o maior acordo posible". A esixencia dunha "maioría cualificada", abondaban, "permite acercar a unha decisión de consenso".

Esta proposta, igual que outras que a acompañaban, como fixar no Estatuto a celebración de comisións de investigación ou "outorgar iniciativa lexislativa" aos concellos, nunca chegou a aprobarse e no seguinte programa electoral autonómico do PP, o de 2012, simplemente desaparecera. No seu lugar os populares incluían outras como que "a austeridade continúe impregnando todas as actuacións do Parlamento de Galicia" ou a redución "do número de deputados a 61", recorte para o que é necesario, precisamente, reformar a Lei de Eleccións.

Recorte unilateral

Fronte a estas promesa de hai apenas media década o partido que sustenta o Goberno en Galicia e en España reitera a súa intención de aplicar as dúas reformas electorais aínda que ninguén máis os apoie. O último en afirmar este propósito foi o vicepresidente da Xunta e secretario xeral do partido, Alfonso Rueda, que nunha entrevista en RNE apelou precisamente ao programa electoral, ao de 2012, para xustificar a medida. A xuízo de Rueda, o feito de obter en 2012 "máis escanos dos que tiñan -malia perder máis de 100.000 votos-" fixo que os conservadores fosen "lexitimados" para "levar a cabo dita reforma". "O Parlamento pode funcionar custando menos cartos", di, nun contexto no que o propio PP se negou ás propostas de PSdeG, AGE e BNG que apostaban por manter o número de escanos rebaixando o seu custo.

Rueda defende a unilateralidade en Galicia e tamén no resto do Estado, neste caso para ilegalizar os gobernos locais de coalición e facelo a escasos meses das eleccións, contradicindo así o manual de boas prácticas electorais da UE, entre outras recomendacións internacionais. "O PP ten a intención de levar adiante a reforma", advirte, apuntando neste caso que a reforma prexudique algunha opción política, toda vez que "todos os partidos se presentan en igualidade de condicións". Para os populares a conformación de maiorías sustentadas en máis dun partido implica "que gobernen os que perden" e iso "non é fácil de entender".

Despece

  • O BNG chama á "fronte común" contra o "golpazo", que Feijóo pide estender ás autonomías

    Na liña do reivindicado nos últimos días o BNG apelou novamente este luns á constitución dunha "fronte común" de forzas políticas contra a reforma electoral que impulsa o PP e que, no caso galego, coincide no tempo coa culminación da modificación da Lei de Eleccións para recortar o Parlamento. O Bloque tentará fiar esa "fronte" nunha xuntanza convocada en Santiago para o vindeiro venres na que, di o seu portavoz nacional, Xavier Vence, apostará por que "todos os demócratas nos amosemos unidos" e por iso, di, lamenta que o PSdeG non vaia asistir á xuntanza.

    Fronte á pretensión de "acadar un poder absoluto nas institucións sen contar co apoio da maioría social" o BNG esgrime tamén o seu manifesto Construíndo futuro, que enmarca nas asembleas abertas que está a organizar por todo país no que Vence define como "unha aposta integradora para toda a sociedade galega". Xunto a representantes de diferentes ámbitos sociais como o dramaturgo Manuel Lourenzo, o músico Xurxo Souto ou a xornalista Concha de la Fuente o líder nacionalista explicou que a aposta da formación frontista é "escoitar a cidadanía rebelde que vén pedindo participación directa na política, en particular as propostas para os seus concellos".

    "Cremos na iniciativa da cidadanía na loita por empoderarse, pero é necesario organizarse se queremos ter éxito contra o exército do PP", ilustra Vence, que identifica "un exceso de espontaneismo" á hora de "plantarlle cara á dereita". Nesta liña, convida á "participación activa" nas asembleas abertas a "todas as persoas que se están movendo polo país adiante, sexan nacionalistas ou non, porque non imos pedirlle o carné a ninguén". "A toda esa xente queremos escoitala e integrala nun proxecto amplo, plural, aberto, un proxecto de futuro nacionalista e transformador".

    O presidente di agora que a reforma favorece a economía

    Mentres Vence presentaba este proxecto en Compostela dende Bruxelas Feijóo teimaba nas bondades da reforma, asegurando agora que mesmo favorecería a economía. Que o proxecto de Rajoy se materialice implica "dar unha mensaxe de seguridade aos cidadáns, que van votar sabendo que o seu voto se traducirá de forma inmediata no alcalde". Isto, asegura, supón "seguridade e estabilidade política", un "activo económico importantístico para saír da crise que aínda padecemos".

    Nesta liña, o presidente da Xunta retoma o seu propio argumentario, agora replicado por outros baróns do seu partido, e asegura que a reforma para ilegalizar os gobernos de coalición nos concellos debe ser só o comezo dun proceso máis amplo. A modificación, di, debe "comezar polos concellos" pero "pódese e débese falar das comunidades autónomas". Non especifica, así e todo, como se articularía ese sistema presidencialista.

     

     

    Manifesto do BNG CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza