Outro manifesto aprema a crear unha candidatura unitaria que evite que Galicia "fique atrás"

A Praza da Quintana, durante a manifestación CC-BY-NC-SA GZFoto

Un novo manifesto a prol dunha candidatura unitaria galega. E unha nova chamada ao acordo das formacións políticas nacionalistas, galeguistas e de esquerda do país de cara ás eleccións xerais. Logo do documento que impulsou a manifestación unitaria do pasado 25X, do chamamento á Marea Galega ou da petición que chegou da mocidade activista, desta vez varios escritores, artistas, activistas ou economistas galegos insisten en apostar Pola Unión, tal e como se encabeza o documento, que emprega o título do poema de Curros Enríquez, o mesmo que se leu tras a mobilización do Día Nacional.

"Na unión dos bos galegos está da patria o porvir!", adianta o escrito "en prol dunha candidatura galega de unidade nas eleccións xerais". Uxía Senlle, Xosé María Álvarez Cáccamo, Miguel Anxo Murado, Lois Diéguez, Xabier Paz, Miguel Anxo Fernán Vello, Marica Campo, Quico Cadaval, Joám Lópes Facal, Víctor F. Freixanes ou Vítor Vaqueiro, entre outros, asinan este manifesto que ve "inadiábel" para o país "a consecución dunha Candidatura Unitaria Galega encamiñada a obtermos un grupo parlamentar que, con personalidade xurídica propia, reivindique para a nosa Terra con decisión e sen inxerencias alleas, o dereito a decidir todas as cuestións que atinxan o seu futuro e que defenda a lingua e a identidade dun pobo que hai case un milenio xerou unha literatura e unha cultura que asombrou Europa". 

Uxía, Álvarez Cáccamo, Murado, Cadaval ou Freixanes asinan un manifesto que cre "inadiábel" que se constitúa unha candidatura unitaria

As vindeiras eleccións xerais do mes de decembro e a nova configuración das Cortes traerán consigo unha "posíbel mudanza constitucional" e celebraranse "nunha situación marcada por unha das máis profundas crises que atravesaron Europa despois da II Guerra Mundial". Segundo o manifesto, no Estado esta crise ten características de seu, como a que ten que ver coa "corrupción que percorre institucións públicas e privadas", así como outra "de esixencia democrática, fornecida polos movementos soberanistas, nomeadamente os de Cataluña e Euskadi".

O manifesto pide un grupo parlamentario galego para "defender a economía e recursos produtivos propios" ou "garantir os servizos púbicos"

Ante esta situación, os asinantes apostan pola unidade que facilite a creación dun "Grupo Parlamentar Galego" no Congreso dos Deputados que "traballe sen acougo na defensa da economía e os recursos produtivos dunha nación que, cando non se pon freo ás súas capacidades, chega ás máis altas cotas". E poñen como exemplo os mariñeiros que "pescan en mares de medio mundo", os atletas medallistas olímpicos ou os investigadores galegos "en universidades dos cinco continentes". 

'Pola unión' aposta por que "a representación propia evite o risco real de Galiza ficar atrás"

Segundo o documento, ese grupo parlamentario debe "perseguir que se garantan os servizos públicos nunha sociedade libre, igualitaria, xusta e democrática, capaz de se relacionar en pé de igualdade con mulleres e homes, pobos e nacións, culturas e tradicións de todo o planeta e respetuosa co medio ambiente". Ademais, pulan por esta representación propia "que evite o risco, real, de Galiza ficar atrás e que, en resumo, combata pola nosa dignidade colectiva e polo que ninguén ten pensado regalarnos", din, "tendo ben presente que, ao longo da Historia, a unidade foi, é e será a nosa forza, a nosa inmensa forza como pobo".

Entre os asinantes do manifesto está tamén Encarna Otero; o secretario xeral da CIG, Suso Seixo; Adela Figueroa; Pilar Fernández ou Alba Cuba, triatleta e adestradora, que foi unha das persoas que leu o manifesto final da manifestación unitaria do 25 de Xullo na Quintana. 

Uxía Senlle, na presentación de 'Corasóns' na Coruña © Kalandraka
Víctor F. Freixanes Dominio Público Praza Pública

Despece

  • A Marea Atlántica pide unha confluencia "na que ningunha forza sexa predominante"

    A Rede, o principal órgano de toma de decisións colectivas da Marea Atlántica, vén de aprobar unha resolución que "busca contribuír aos procesos de confluencia en cernes" e na que fixa os seus "criterios mínimos para apoialos", colaborar ou participar.

    Así, no documento especifícase que a plataforma cidadá "acompañará" un proceso que respecte os seus principios: "garantir unha vida digna para todas as persoas, construír unha economía xusta e sustentable e poñela ao servizo da cidadanía, forxar unha democracia real, fomentar a participación cidadá, establecer un compromiso ético coa cidadanía e traballar pola igualdade".

    A Marea aposta por unha "confluencia real" na que "todas as forzas traballen en pé de igualdade"

    Ao tempo, asegura tamén que debe ser "un proceso de confluencia real" no que "todas as forzas traballen en pé de igualdade, apostando pola unidade e buscando puntos en común deixando de lado as diferenzas". "Necesitamos un espazo de confluencia, no que caibamos todas as persoas, arredor dun desexo común: acabar coas políticas ditadas polas elites e o poder económico e rescatar a democracia, secuestrada polo bipartidismo", di a Marea Atlántica, que cre que no seu caso "demostrouse" que se se traballa pola confluencia e a unidade terase "éxito" e que hai "xente capacitada e disposta para traballar nun proxecto que leve o espírito da Marea ás eleccións xerais desde Galicia". 

    Ademais, a plataforma cidadá que goberna A Coruña aposta por que sexa un proceso "baseado no protagonismo da xente, que vaia máis alá dos nomes e das siglas". "Un proceso radicalmente democrático e participativo no que ningunha forza teña un papel predominante sobre outra e ao que todas as persoas poidamos considerar como propio", di. 

    A plataforma cidadá aposta polo "protagonismo da xente máis alá de nomes e siglas" e no que "ningunha forza sexa predominante sobre outra"

    "Sabemos que non teñen por que servir os mesmos métodos nin as mesmas ferramentas nin as mesmas persoas. O que si cómpre é achegar a experiencia do noso camiño andado, do xa feito e do que seguimos construíndo, conscientes de que o novo reto que afronta a cidadanía é máis amplo e complexo do que o noso proxecto abarca no ámbito municipal", aclara a Marea, que lembra que "certos cambios e certas conquistas só seran posibles se actuamos dende unha perspectiva de Estado". "As leis inxustas só poderán ser derogadas e contestadas dende o Congreso e o Senado", aclara. 

    A Marea Atlática asegura que, "pola necesidade de sumar o que a plataforma modesta e honestamento poida dar desde A Coruña", é precisa a súa contribución e colaboraicón para "buscar o mellor deseño e desenvolvemento" dos novos espazos de confluencia de xeito que "se poida chegar á maior suma de forzas". Por iso tamén, o grupo de traballo "manterá contactos cos diferentes axentes que así o soliciten e que formen parte dos diferentes procesos de confluencia, para camiñar cara os obxectivos sinalados".

    Xulio Ferreiro, tras coñecer os resultados CC-BY-SA Marea Atlántica

  • As mareas de Lugo, Betanzos e Noia únense para pular pola unión

    As mareas cidadás de Lugo, Noia e Betanzos veñen de lanzar tamén un comunicado conxunto no que chaman á confluencia e a "trasladar os principios inspiradores dos procesos de unidade popular municipais ao escenario das eleccións xerais", malia ser "conscientes" de que "os métodos e as ferramentas terán que ser adaptados a un proceso dunha dimensión distinta". 

    Lugonovo, Marea de Noia e Betanzos Novo fan un chamamento ás mareas cidadás a se xuntar o 13 de agosto en Compostela

    Por iso, Lugonovo, Marea de Noia e Betanzos Novo -todos eles con representación municipal nos seus concellos- chaman a todas as mareas e procesos de unidade popular a nivel municipal para manter un encontro o vindeiro día 13 en Compostela para "configurar un grupo de traballo" que recolla "toda a pluralidade e diversidade" que representan e que teña "como misión elaborar e que teña como misión a de elaborar, en constante diálogo cos axentes interesados en participar, unha proposta de metodoloxía para concretar o proceso de unidade popular de cara ás xerais" e "como paso previo ao artellamento, no mes de setembro, da rede para levalo a cabo". 

    As tres mareas avogan pola unidade "con protagonismo cidadán" e "con Galicia como suxeito político"

    As tres mareas cidadás procuran un proceso destinado a "acumular forzas para a ruptura democrática cos eixos dunha democracia radical, o dereito a decidilo todo e a construción dun novo modelo económico e social que garanta a dignidade das persoas". Ademais, aposta por que o protagonismo "recaia na cidadanía" por medio de métodos "democráticos e participativos, sen vitorias nin imposicións de parte". "Un proceso que xere un espazo común, deixando a un lado as diferenzas e buscando o que nos une, un espazo que sexa expresión dunha confluencia real para artellar ferramentas que vaian máis alá da contenda electoral", insisten, antes de deixar claro que todo se baseará "na visión de Galicia como suxeito político". 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza