A sondaxe de Sigma Dos para a TVG e a FORTA apunta que o PP gañaría as eleccións europeas no Estado cun 32,4% dos votos e entre 21 e 23 escanos. O PSOE obtería un 30,2% e 20-22 escanos. 

En terceiro lugar, segundo as estimacións da enquisa de Sigma Dos para a TVG/FORTA, sitúase Vox cun 10,4% e 6-7 eurodeputados. Sumar obtería un 6,3% dos votos (3-4 escanos) e Podemos un 4,4% (2-3 escanos).

Agora Repúblicas (a coalición na que participa o BNG con ERC, EH Bildu e Ara Més) obtería un 4,3% dos votos e entre 2 e 3 escanos. Ese terceiro escano sería para a candidata do BNG, Ana Miranda, e dependendo da porcentaxe de voto podería ser un posto rotatorio. 

Junts i Lliures per Europa obtería un 2,1% e 1 escano. Coalición por una Europa Solidaria (CEUS) –da que forman parte PNV e Coalición Canaria, entre outros– obtería un 1,6% e conservaría o seu escano en Estrasburgo.  

Se acabó la fiesta, a candidatura do activista de ultradereita Alvise Pérez obtería un 3,9% e podería chegar aos 2-3 escanos. Ciudadanos ficaría fóra do Europarlamento. 

Ás oito pechan os colexios electorais. No CEIP Fermín Bouza Brey de Ponteareas poderase votar ata as 20.20 horas polo atraso na conformación das mesas. E en tres colexios electorais de Vigo tamén estenden o horario de votación porque faltaban papeletas á hora de apertura. O CEIP O Pombal de Lavadores pechará ás 20.20h, o CEIP Josefa Alonso ás 20.35 e no CEIP Valle Inclán poderá votarse ata as 20.10h.

CRÓNICA | Fin de campaña e de ciclo electoral con Europa ao fondo

A sensación de campaña non foi especialmente elevada entre a poboación malia á forte tensión entre as principais forzas de ámbito estatal nunha campaña na que, por veces, Europa semellou pouco máis ca un pano de fondo malia á transcendencia dos comicios

A participación nas eleccións europeas en Galicia é do 39,01% ás seis da tarde. O que supón unha baixada de 11,19 puntos a respecto dos comicios de hai cinco anos, co 99,17% comunicado.

No Estado español a caída é de 11,10 puntos a respecto de 2019, rexistrouse unha participación ata as seis da tarde do 38,34%, co 99,09% dos votos comunicados.

CRÓNICA | Resaca das galegas e tentación estatal nunhas eleccións europeas transcendentais

O contexto do 9X apunta semellanzas coa última ocasión na que as europeas chegaron xusto despois dunhas galegas, con risco de forte indiferenza cidadá malia haber en xogo aspectos tan relevantes como a transición ecolóxica, a posición ante conflitos bélicos ou o ascenso da extrema dereita 

Comparación entre a participación en Galicia ás 14h nas tres últimas citas coas urnas para configurar o Europarlamento

ACTUALIZACIÓN | No conxunto do Estado a participación cae 6,73 puntos ás 14 horas co 99,99% escrutado. Votou o 28,01% do censo, un total de 9.988.861 persoas. A comparación realízase coas eleccións europeas de 2019, mais hai que ter en conta que hai cinco anos os comicios tiveron lugar á vez que a elección dos representantes municipais de todo o Estado. 

A participación cae 6,5 puntos en Galicia ás dúas da tarde. No primeiro avance dos datos de votación destas eleccións europeas votou o 26,37% dos galegos e galegas, 405.783 persoas, fronte o 32,9% do censo que votara nos anteriores comicios de 2019, que coincidiron coas municipais. 

O presidente da Xunta, Alfonso Rueda, pediu este 9X un "pequeno esforzo" para achegarse aos colexios electorais porque "España e Galicia xóganse moitísimo". "Oxalá que sexa unha xornada que se desenvolva con toda normalidade", dixo antes de agradecer o traballo dos interventores do seu partido, tamén dos do resto de formacións e ás persoas que integran as mesas de votación. Rueda votou en Pontevedra tras saír correr a primeira hora e fíxoo acompañado pola súa familia e polos candidatos do PP Francisco Millán Mon –que votou por correo– e Adrián Vázquez.

O presidente do PP e líder da oposición no Estado, Alberto Núñez Feijóo, votou en Madrid acompañado do alcalde da capital estatal e fixo un chamado á "mobilización democrática sen crispación". "Imos afondar na democracia española, hoxe é o día. Vamos facer unha aposta por que o sistema democrático español siga forte", sinalou Feijóo, quen incidiu na idea de que "o exercicio ao dereito á igualdade concrétase nunha persoa un voto". O ex presidente galego defendeu que este 9X se escolle "o futuro de Europa e o presente e o futuro de España" e pediu unha "participación masiva nas urnas".

Nestas eleccións do 9X poden participar 2.702.442 galegos e galegas, dos que 109.690 o farán por primeira vez nunhas eleccións europeas ao ter cumprido os 18 anos desde a última cita en 2019. Do total, 7.459 son persoas cidadás da Unión Europea residentes en Galicia e 480.221 representan a galegos e galegas que viven fóra das fronteiras españolas.

Ourense foi a primeira provincia en ter constituídas as súas 531 mesas electorais coa mesa da Escola de Ganade, en Xinzo de Limia. Lugo pechou a constitución das súas 527 mesas coa da Escola de Carracedo, no Concello de Láncara. A Coruña pechou a constitución das súas 1.517 mesas coas do CEIP Victor López Seoane, na cidade da Coruña. Na provincia de Pontevedra valórase se aumentar o tempo de votación en Ponteareas, onde se constituíu a última mesa electoral de Galicia, pasados uns minutos das nove da mañá, segundo a información da Delegación do Goberno en Galicia. 

O referente do PSdeG nestas eleccións ao Parlamento europeo, Nicolás González Casares, depositou o seu voto en Lalín, onde salientou a importancia do voto para decidir "o futuro da Europa que queremos" e para reforzar "o proxecto máis grande na historia de paz e de democracia". Casares animou á cidadanía a achegarse aos colexios electorais este domingo e defender o proxecto de "prosperidade e liberdade" que representa Europa.

Consulta neste gráfico os resultados das eleccións europeas en Galicia desde 1987. O Partido Popular foi dende 1987 a forza máis votada nas eleccións europeas en Galicia, coa única excepción da última cita de 2019, cando se impuxo con claridade o PSdeG

A candidata do BNG, Ana Miranda, votou en Vigo "con ilusión e esperanza para que Galiza volte a ter unha voz propia no Parlamento europeo" e fíxoo acompañada da súa filla e do portavoz da formación nacionalista na cidade olívica, lembrando aos seus pais, que a acompañaron nas eleccións de hai cinco anos. "Votamos por Galiza, polas causas xustas da humanidade, polo antifascismo, pola paz e para que remate o xenocidio en Gaza", asegurou Miranda, que fixo un chamado á participación. 

A portavoz nacional do BNG, Ana Pontón, exerceu o seu dereito a voto en Santiago e pediu "que as galegas e galegos voten pensando en quen pode defender mellor os seus intereses en Europa, no que nos estamos xogando neste momento e que empreguen o poder que lles dá o voto para decidir que Galiza en Europa quere e tamén que modelo de Europa desexa para o futuro". 

O líder dos socialistas galegos, José Ramón Gómez Besteiro, votou en Lugo e sinalou que acudir ás urnas "é moi importante porque Europa está moi presente nas nosas vidas e o que pase en Europa nos afecta".

Este #9X preocupa o abstencionismo. Nos últimos 37 anos a abstención nas eleccións europeas vén sendo moi elevada, cun máximo no ano 2014, cando en Galicia só votou o 38,7% do censo 

O presidente do Goberno de España, Pedro Sánchez, votou a primeira hora animando á participación e lembrando que "o 70% das leis que se aproban no Congreso son leis que se aproban en Bruxelas". Sánchez referiuse tamén o auxe da extrema dereita, que pode incrementar a súa representación no Parlamento europeo nestas eleccións. "Existe unha reacción. Un intentar volver a un pasado ao que é imposible volver e que non ten que ser mellor ao futuro que temos por diante", aseverou. 

Constituídas en Galicia 3.922 mesas electorais, o 100%.

2.702.442 votantes están chamados ás urnas este domingo en Galicia. 

Comeza a xornada de votación para eleccións europeas. Os colexios electorais veñen de abrir ás 9 da mañá e así permanecerán ata as 20 horas. Hai 33 candidaturas rexistradas no Estado español para estes comicios que configurarán un novo Parlamento europeo. Estes son os resultados das anteriores eleccións europeas en Galicia, celebradas o 26 de maio de 2019, coincidindo coas municipais.