Arsenio Fernández de Mesa recolócase como conselleiro de Red Eléctrica dous meses despois de deixar a dirección da Garda Civil. A empresa participada polo Estado nun 20% vén de comunicarllo á CNMV. De Mesa, delegado do Goberno central en Galicia durante a crise do Prestige, é un dirixente moi próximo a Rajoy e non ten experiencia no sector eléctrico.
Rajoy e Caballero eloxian a Rita Barberá na homenaxe tributada á falecida ex-alcaldesa de Valencia na FEMP. "Foi boa persoa, decente e xenerosa", dixo o presidente do Goberno de España. Segundo Rajoy, a homenaxe tamén é "para todos os concelleiros e para tantos aos que o terrorismo arrebatou a vida".
Belém Tajes, nova cantante de Luar na Lubre. A tamén compositora porá voz á formación na xira do seu trixésimo aniversario, que se desenvolverá pola Península Ibérica e mais en México. Alén da xira, o grupo celebra este fito na súa traxectoria cun disco duplo de 30 temas que recompila pezas de toda a súa historia xunto a "tesouros non habituais".
A dirección provincial do PSdeG rexeita a xestora do PSOE local coruñés por ter maioría de afíns a Mar Barcón. Amosa a súa "disconformidade absoluta" coa selección feita por Ferraz.
Os altos cargos das administracións aumentan un 57% mentres o cadro de persoal cae un 11% desde 2010. O sector público recortou 23.700 empregos en Galicia nos últimos seis anos, mentres as prazas directivas aumentaron en 1.200.
Trump destitúe a fiscal xeral que se negou a defender o veto migratorio a varios países musulmáns. Sally Yates instou avogados e fiscais a non defender as medidas antiimigración por non estar convencida de que fose legal.
VÍDEO | Un xogador do Compostela evita marcar un gol aproveitándose da lesión do porteiro rival, do Alondras. O xesto de fair play Santi Fernández está a ser aplaudido no mundo do fútbol pola súa deportividade. O encontro rematou cun 2-4 a prol do equipo compostelán. (Imaxes da TVG difundidas pola SD Compostela]
A ministra de Cultura da República Árabe Saharaui Democrática, Jadiya Hamdi, visita este martes a Facultade de Educación da UDC. Hamdi está en Galicia con motivo da presentación da película Leyuad. Un viaje al pozo de los versos de Gonzalo Moure, Brahim Chagaf e Inés Aparicio
O pleno extraordinario para a presentación dunha cuestión de confianza vinculada á aprobación dos Orzamentos da Coruña celebrarase este sábado ás 12.30. O alcalde, Xulio Ferreiro, reitera a intención do equipo de Goberno "de chegar a un acordo" co PSOE, aínda que sinala que “as circunstancias non cambiaron desde o pasado venres e non hai convocada ningunha xuntanza da comisión negociadora".
Aumentan os casos de cancro por riba das estimacións, pero tamén as taxas de supervivencia aos tumores. Conclúeo un estudo da Sociedade Española de Oncoloxía Médica presentado este luns
