0 Gardados para despois

A ONU advirte a Xunta por falta de información sobre os proxectos mineiros

Redacción | @prazapublica

A finais do pasado ano, a Xunta foi condenada por ocultar e denegar información sobre as concesións mineiras de Corcoesto. Hai tan só uns días, a ONU vén de advertir o Goberno galego por casos semellantes de "obstaculización" no acceso á información, nesta ocasión baseándose nos problemas con outras explotacións mineiras. A Xunta terá que explicar ante o comité de cumprimento do Convenio de Aarhus por que as autoridades autonómicas impiden o acceso á información ambienttal de diferentes proxectos industriais ou de minas. 

As asociacións Petón do Lobo e Ourido do Anllóns reclamaron ante a Convención de Aarhus da ONU pola falta de información da Xunta

O aviso das Nacións Unidas xorde logo de que as asociacións Petón do Lobo e Ouridol do Anllóns cansasen do escurantismo e ocultación respecto de varios proxectos e presentasen ante o comité da Convención de Aarhus da ONU unha reclamación por falta de información e transparencia da Dirección Xeral de Enerxía e Minas da Xunta. Queixábanse da ausencia de resposta ás solicitudes de información das balsas mineiras existentes en Galicia ou das avaliacións de impacto ambiental de iniciativas mineiras como a de San Finx en Lousame ou Varilongo, en Santa Comba. 

O pasado 15 de marzo, Nacións Unidas, a través da comisión de cumprimento do Convenio de Aarhus sobre a participación pública en materia de medio ambiente, admitiu a trámite a reclamación que abrangue a política mineira e industrial e de comunicación do Goberno galego. As dúas asociacións advírtenlle ás Nacións Unidas dos "impedimentos" constantes da Xunta á hora de acceder á información, o que supón que esta actitude sexa "un dos principais obstáculos" para os movementos en defensa do territorio. 

Nacións Unidas admitiu a trámite a queixa polos "obstáculos" que a Xunta pon para informarse sobre proxectos mineiros

Tanto Petón do Lobo como Ouridol dos Anllóns lembran que a súa queixa ante a ONU chega logo de que esgotasen todas as opcións de comunicación e reclamación coa Xunta, que seguiu "ignorando as solicitudes". Lograron que se admitise a trámite malia a postura da delegación española, que negaba calquera obstáculo e mesmo puxo en dúbida que se optase por todas as vías que ofrece a lexislación galega. 

Unha vez máis, o sinalado é o director xeral de Enerxía e Minas Ángel Bernardo Tahoces, a quen as asociacións acusan de "ignorar" as resolucións que en ambos proxectos mineiros obrigan a someterse ao trámite de avaliación de impacto ambiental e que a Xunta comezou a ignorar logo do regreso do PP á Xunta en 2009. 

"O silencio negativo e os obstáculos e condicionamentos continuados ao acceso da información ambiental dos expedientes mineiros (...) son a práctica habitual" da Dirección Xeral de Minas, que pon "por riba da protección do medio ambiente os intereses económicos e comerciais", ademais de "encubrir actuacións irregulares" das firmas mineiras. Así reclaman os dous colectivos a través do seu representante, o profesor da Universidade de Illinois, dos EUA, Warren Lavey. 

O Convenio de Aarhus é un tratado internacional que regula os dereitos de participación cidadá en relación co medio ambiente

O Convenio de Aarhus sobre acceso á información, participación do público na toma de decisións e acceso á xustiza é un tratado internacional que regula os dereitos de participación cidadá en relación co medio ambiente. Foi asinado en 1998 e entrou en vigor o 31 de outubro de 2001.

O Goberno de España ratificou o devandito convenio en decembro de 2004 e dous anos despois, en 2006, aprobou a Lei 27/2006, pola que se regulan os dereitos de acceso á información, de participación pública e de acceso á xustiza en materia de medio ambiente, na que España aplica as súas esixencias. Este acordo recolle un mecanismo de control do cumprimento que permite aos cidadáns denunciar incumplimentos do tratado. 

Coa túa achega fas posible que sigamos publicando novas coma esta.