0 Gardados para despois

Os sectores de En Marea miden forzas nun plenario clave para a unidade da formación

David LombaoDavid Lombao | @davidlombao


En Marea ten este sábado en Santiago unha cita clave. É, cando menos, a máis relevante dende a súa constitución como partido instrumental no verán de 2016, cando as forzas que participaran como coalición nas eleccións xerais de decembro de 2015 e de xuño dese mesmo ano procuraban, xunto ás mareas municipais, a fórmula para concorreren aos comicios galegos do pasado outono. O plenario da formación vén precedido de semanas de tensión entre sectores que se dispoñen a mediren as súas forzas internas en debates e votacións de documentos políticos e organizativos que translocen diferenzas cuxa orixe cómpre buscar no plenario do pasado decembro e, sobre todo, no proceso posterior ás eleccións internas de xaneiro, das que saíron os seus primeiros órganos de dirección: o Consello das Mareas e mais a coordinadora.

A elección da coordinadora foi, precisamente, o proceso que transloceu os maiores disensos. Co pano de fondo da discrepancia sobre a incompatibilidade das portavocías institucionais coas orgánicas a votación definitiva de abril trouxo consigo unha mudanza de alianzas que derivou, finalmente, na conformación dunha coordinadora encabezada como voceiro quen fora candidato á Presidencia, Luís Villares, cos votos a prol de parte da súa lista -Máis Alá-, da candidatura que conformara unha parte de membros de Anova -Somos Quen- e mais de membros de Cerna, que conformaran a lista Queremos Participar. Naquela votación non participara unha ducia de integrantes da lista Máis Alá que consideraron rachadas as liñas esenciais dos documentos previamente aprobados.

O proceso de elección da coordinadora tras o primeiro plenario foi fonte de tensións internas

Con estes antecedentes a actual coordinadora defenderá ante o plenario uns documentos base cos que confrontarán os integrantes da organización que se agruparon baixo o lema Recuperar En Marea. Estas teses alternativas están apoiadas por, entre outros e a grandes trazos, o groso da Marea Atlántica, de Anova e doutras mareas locais, así como membros de Podemos e Esquerda Unida, se ben estes partidos xa confirmaron, como anticiparan, que non participan formalmente do proceso e apuntan á liberdade da súa militancia para acudir ou non a título individual. Estes textos recabaron tamén nos últimos días o apoio de Xosé Manuel Beiras. "Queremos recuperar En Marea e devolvela ao espírito do plenario de Vigo" e "non afastarnos do rumbo que nos marcamos entre todas", resumen na súa proposta.

A definición do partido instrumental

As teses da coordinadora definen En Marea como "movemento-instrumento eficaz que lidere, como primeira forza da oposición, a defensa dos dereitos da cidadanía"

Para a actual coordinadora o plenario deste sábado debera servir para "facer de En Marea o movemento-instrumento eficaz que lidere, como primeira forza de oposición na Galiza, a defensa dos dereitos individuais e colectivos da cidadanía". Neste sentido, o texto defendido pola coodinadora subliña que a "fragmentación organizativa actual, consecuencia das tentativas frustradas de dar unha resposta eficaz ás demandas da cidadanía", debe avanzar cara a un escenario de "suma de forzas para os obxectivos comúns" que procure "unha ampla alianza de forzas de esquerda, nacionalistas e non nacionalistas" co "obxectivo de afastar do Goberno ao corrupto Partido Popular" tanto en Galicia como no Estado.

Os textos críticos rexeitan "reducir En Marea a un partido clásico" e defíneno como un "suxeito político popular, democrático, radical, republicano e de ruptura"

O texto defendido por Recuperar En Marea apela ao "manifesto dos alcaldes" de hai un ano para resaltar a necesidade de que en Marea sexa "un suxeito político popular, democrático, radical, republicano e de ruptura", un "proceso" que non sexa "reducido a un partido clásico de réxime, destinado a concorrer no mercado electoral para participarmos na alternancia regrada de inquilinos nas institucións" ou a unha "máquina electoral permanente". É neste punto no que este grupo advirte de que desbota a implantación de "ningunha clase de protocolo nin subalternización a respecto dun órgano de dirección", toda vez que "En Marea é un espazo suficientemente líquido e plural como para estar configurado" por persoas e organizacións "que participan do proceso sen condicións".

Regulamentos e financiamento

Neste contexto prevese que un dos puntos centrais do debate do plenario, que se estenderá durante toda a xornada, sexa o do regulamento que artelle o funcionamento interno de En Marea. A actual dirección e o texto crítico coinciden en definir a coordinadora como un órgano elixido polo consello -o máximo órgano entre plenarios- que ten un cometido de "coordinación e dirección política, mais en ningún caso de carácter xerárquico", pero discrepan na cuestión da portavocía. O grupo de Villares aposta por "unha persoa portavoz" que "exerce a máxima representación pública e as relacións políticas de En Marea, impulsa e coordina o traballo" e cuxo labor é complementado con viceportavocías. Mentres, a emenda do grupo crítico aposta por unha "voceiría colexiada, paritaria e rotatoria" formada por "dúas mulleres e un home". De saír adiante, a mudanza implicaría que Villares non sería o principal referente orgánico da formación.

As dúas principais opcións que se votarán discrepan na figura da portavocía, no documento económico e no modelo de expansión territorial

Vinculado coa cuestión das portavocías figura outro dos puntos de tensión das últimas semanas: o documento que rexerá o réxime económico de En Marea e dos seus representantes institucionais. A carta financeira que propón a coordinadora propón que os cargos electos cobren, "como máximo, 3 veces o salario mínimo interprofesional" con complementos por persoas ao cargo -medio SMI por persoa "ata un máximo de 2 salarios mínimos- e agrega que "estas condicións poderán ser revisadas no caso de lucro cesante que con carácter irreversible sufra a persoa electa" -unha rebaixa substancial de remuneración a respecto da profesión que desempeñase anteriormente- ou "por cargas económicas acreditadas". O texto alternativo, pola súa banda, promove que estas contías non poidan incrementarse "en ningún caso". Ambos textos coinciden, pola contra, en que os cargos internos non estarán remunerados, alén do persoal técnico e das compensacións por conceptos como desprazamentos.

Outro dos puntos do debate no que se prevén diverxencias é o da expansión territorial de En Marea, unha das prioridades fixadas pola actual dirección, e a convivencia deste proceso coas mareas municipais que xa esisten. A coordinadora formula un protocolo para "promover mareas municipalistas" para formalizar estas constitucións e relacións, o cal, din os textos implica unha relación estable pero "en ningún caso" o órgano nacional sexa "tutelador" do local. Mentres, dende Recuperar En Marea promóvese un sistema baseado en "redes municipalistas autoxestionadas e autónomas" no que a "interacción entre a escala local e nacional" se producirá "en todo caso, a petición das redes municipalistas". En ambos textos permanecen, en calquera xeito, as estruturas municipais creadas antes que a propia En Marea.

Coa túa achega fas posible que sigamos publicando novas coma esta.

Lapelas Versión despregada

A coordinadora cre que o debate amosa "unha organización viva" e mantén que o grupo do Congreso "non se negou a render contas"

A coordinadora de En Marea presentou este xoves formalmente o plenario do sábado, que se celebrará baixo o lema A suma do común, e procurou encaixar na normalidade as discrepancias das últimas semanas. O partido instrumental, sinalaron Ana Seijas e Gonzalo Rodríguez, pretender "dar un paso máis no avance da unidade popular e na consolidación do espazo" e as voces discrepantes amosan que se trata "dunha organización viva".

Tras sumar "200 persoas nas últimas semanas" e roldar as 2.400 inscricións a coordinadora de En Marea ve "demostrado que hai interese" polo crecemento da formación e augura "un plenario intenso, con moito debate, que demostrará cal é o espírito para este espazo político". Trátase, conclúe Seijas, de "debater cara a onde temos que ir, cal é a proposta que lle estamos facendo a Galicia".

"Os deputados e deputadas estarán no plenario, onde tamén se fará unha rendición de contas da actividade no Congreso", di a coordinadora

Horas despois desta presentación a propia coordinadora emitiu un comunicado para "aclarar" un dos puntos de tensión das últimas horas, a "rendición de contas" ante o plenario por parte dos representantes de En Marea no Congreso, os 5 deputados e deputadas que se integran no "grupo confederal" xunto a Unidos Podemos. Despois de que dende formacións como EU ou o propio Podemos se apuntase que esa comparecencia non se ía producir como tal a coordinadora apuntou a "un erro nas comunicacións" como causa do conflito.

"Nunca nos negamos a render contas", indicaron os deputados no Congreso durante a presentación do documento que resume as súas iniciativas

"Os deputados e deputadas estarán no plenario, onde tamén se fará unha rendición de contas da actividade no Congreso", sinala a coordinadora. O comunicado chegaba pouco despois de que que estes representantes confirmasen unha rolda de prensa para este venres para "presentar o seu programa completo de rendición de contas", o cal tamén "contará con varias presentacións en vilas e cidades entre xullo e setembro", informa En Marea.

Ese documento foi presentado ante os medios xunto a unha web que recolle as principais iniciativas de En Marea no Congreso durante o período de sesións que vén de rematar. Nese acto o grupo, por boca da nova portavoz rotatoria, Yolanda Díaz, subliñou que "nunca" se negaran a "render contas" e por iso presentarán o seu traballo ante o plenario do sábado.

Podemos Galicia confirma que non participa no plenario por ver En Marea como "ferramenta estritamente electoral"

A apenas 48 horas da celebración do plenario de En Marea a dirección de Podemos Galicia debullou nun comunicado as razóns que sustentan unha decisión xa coñecida: a non participación no máximo órgano do partido instrumental, ao que o partido que encabeza Carmen Santos se incorporou no verán de 2016 cando estaban a piques de expirar os prazos para a presentación de candidaturas ás eleccións galegas.

Aquela incorporación, destaca a dirección de Podemos Galicia, realizouse dende a concepción de En Marea como unha "ferramenta estritamente electoral" onde os seus membros participaban "de xeito individual" sen que a "fórmula xurídica" de partido instrumental fose "un impedimento ante a posibilidade dun cambio político en Galicia". "Agora ben -matiza- é ben sabido que aquela En Marea á que nos adherimos" continuou "cara a constituírse en partido" e "nós sempre dixemos que non nos diluiríamos".

Podemos Galicia subliña que sempre concibiu En Marea como "ferramenta estritamente electoral" e "nós sempre dixemos que non nos diluiríamos"

"A resposta non varía a respecto do que mantivemos nos primeiros pasos da constitución de En Marea", mantén Podemos. "A unidade é necesaria e é o único xeito de conseguir o cambio político" pero "non pode ser un fin en si mesmo" pola vía da "constitución dunha nova organización política, un novo partido" que, reprocha, "pretende ostentar baixo a forma de partido único a representación política e social do cambio". Esta crítica, aseguran, non impide "que compartamos intereses e obxectivos comúns, como estamos a demostrar no exercicio das nosas funcións no grupo parlamentar".

A dirección de Podemos Galicia pronúnciase, ademais, sobre a "rendición de contas" dos grupos parlamentarios ante o plenario do partido instrumental. "A rendición de contas debémoslla aos nosos inscritos e inscritas e aos votantes de En Marea", pero "non temos ningunha obriga con En Marea-partido", igual que "non a temos con ningunh das outras formacións coas que participamos no dito espazo de ruptura", conclúen.