0 Gardados para despois

Feijóo admite que un doente no PAC da Estrada morreu sen médico e deféndese apelando aos fillos de Pablo Iglesias

David LombaoDavid Lombao | @davidlombao


O pasado 4 de agosto un paciente que acudira ao PAC da Estrada para ser atendido dunha indisposición morreu sen recibir atención médica porque o único equipo médico dispoñible ese día nese centro de saúde tivera que saír para atender outra emerxencia. O propio Servizo Galego de Saúde admitiu horas despois os feitos que xa fixera públicos a familia do falecido e así tamén este mércores no Parlamento o presidente da Xunta, que ademais constatou que a inspección sanitaria ten en marcha unha investigación para "esclarecer se houbo algún problema na atención como consecuencia da organización do PAC da Estrada".

O acordo en torno a cales foron os feitos é total, pero non así no que atinxe ás súas causas. Na primeira sesión de control tras o inicio do 'curso político' Alberto Núñez Feijóo tivo que enfrontarse a que dous dos tres voceiros da oposición, Luís Villares (En Marea) e Ana Pontón (BNG), lle pedisen explicacións polo que consideran unha consecuencia directa dos "recortes", unha "vergoña" que "non pode volver suceder" mediante a garantía de que os Puntos de Atención Continuada teñan sempre dous equipos médicos dispoñibles, esixiron.

O presidente constata que a inspección sanitaria ten aberto un expediente para "esclarecer" o acontecido no PAC da Estrada

Tras "lamentar profundamente o sucedido" o xefe do Goberno galego dixo non aceptar a "manipulación" que, do seu punto de vista, ambos grupos fan do suceso. Fíxoo nunha serie de respostas nas que deu en recorrer á intensa atención sanitaria que tiveron que recibir tras naceren prematuramente os fillos de Pablo Iglesias e Irene Montero, secretario xeral e voceira parlamentaria de Podemos.

"Agora que no seu partido saben moito de como se atende á xente nos hospitais, incluso aos prematuros", retrucou a Villares, En Marea debera ter en conta os "logros" da "atención sanitaria" no Sergas, que por exemplo destina "ata 100 persoas a atender un bebé prematuro cando hai unha necesidade". Neste sentido, Feijóo amagou con "ler" a carta que Iglesias e Montero divulgaron para agradecer o trato dado aos bebés na sanidade pública, toda vez que ao seu xuízo amosa que Iglesias "ten algo máis de cerebro ca vostede". Esa expresión valeulle o apercibimento do presidente da Cámara, Miguel Santalices.

Villares, Pontón e a deputada de En Marea Flora Miranda, no Parlamento cun familiar do home falecido no PAC da Estrada / EM

Feijóo cre Villares debera valorar os "logros" da "atención sanitaria", "agora que no seu partido saben moito de como se atende á xente nos hospitais, incluso aos prematuros"

"Un pouco de respecto polos feitos", reclamou Feijóo ao voceiro de En Marea antes de relatar a circunstancia ao que o propio Villares xa aludira: cando o paciente faleceu, "o persoal estaba regresando" de atender o traslado urxente ao que tivera que acudir a petición do 061 e da Garda Civil, detallou. Mentres, como marca o "protocolo", o propio 061 "coordina a atención" no PAC, que segundo Feijóo ese sábado tiña un só equipo porque un segundo médico, "previamente contactado", "entendeu que estaba destinado a outro PAC". O Sergas, relatou, "inmediatamente tentou contratar outro médico" pero "non o conseguiu ata o día seguinte". Pero "vostedes -reprochou- veñen manipular,  deteriorando a sanidade pública".

En Marea e BNG reclaman garantir que os PAC contan sempre con dous equipos médicos e abrir unha comisión de investigación sobre a morte no centro estradense

Alén de lamentar "a súa falta de elegancia ao falar de nenos prematuros", Luís Villares instou a centrar o debate en que "é inmoral que o Sergas non teña recursos humanos suficientes ao servizo da cidadanía" para atender servizos como os PAC. "Pero é que ademais é ilegal", advertiu, xa que "existe unha orde" do Sergas dende o ano 2008 que regula os plans funcionais dos PAC, documentos que inclúen "criterios para a cobertura das ausencias imprevisibles" do persoal. "O PAC da Estrada tiña este documento aprobado e prevía que tiña que haber dous equipos médicos, pero había só un", resolveu.

Tanto Villares como Pontón remataron as súas preguntas lanzando propostas como a garantía dun "mínimo de dous equipos" nos PAC que, segundo En Marea e BNG, permitirían evitar a repetición do acontecido e esixiron aclarar estes feitos mediante unha comisión de investigación. O presidente obviou tanto as propostas como a petición; a inspección sanitaria sten as súas pescudas en marcha e a familia do doente, "toda a razón ao esixir xustia". "O que non estou disposto é a dicir cousas que son mentira e a manipular a realidade" como, cre, fixo a oposición neste caso.

Coa túa achega fas posible que sigamos publicando novas coma esta.

O presidente advirte de que non ve a TVG, pero "leo o que di sempre que podo"

Feijóo, na sesión de control / PPdeG

D.L.

No marco do debate sobre sanidade da primeira sesión de control do 'curso político' o voceiro de En Marea, Luís Villares, ironizou coa posibilidade de que o presidente da Xunta "non se entere do que pasa no día a día do seu país" por "non ver a TVG", como o propio presidente admitiu o pasado domingo nunha entrevista na Cadena SER ao ser cuestionado polas protestas de persoal dos medios públicos contra a manipulación informativa.

Tras a manifestación de persoal da CRTVG os grupos da oposición esixiron no pleno o cumprimento íntegro da lei de medios e volveron denunciar "manipulación informativa" na TVG e na Radio Galega

Despois de sinalar que non ve a Televisión de Galicia "non porque non me guste", senón por falta de tempo e de defender o "modelo" da CRTVG fronte ao de RTVE tras as recentes mudanzas, o presidente abondou neste comentario na propia sesión parlamentaria. "É certo" que non ve a TVG, afirmou, "pero leo o que se di na Televisión galega sempre que podo", en referencia ás transcricións elaboradas polo gabinete de comunicación da Xunta. Mentres, afirmou, Villares "ten tempo de ter unha televisión privada no partido e de manexar televisións públicas".

Durante o propio pleno o Parlamento abordou iniciativas nas que os grupos da oposición concordaron en denunciar a "manipulación" informativa e en esixir o cumprimento íntegro da lei de medios do ano 2011, na liña do reclamado polo persoal mobilizado nos venres negros. Ese cumprimento, subliñaron En Marea, PSdeG e BNG, debe pasar pola elección a través da maioría reforzada do Parlamento dunha nova dirección xeral. O actual titular do posto, Alfonso Sánchez Izquierdo, permanece nel de maneira indefinida grazas a unha reforma da propia lei de medios aprobada polo PP en solitario no ano 2015.