Manuel Bragado deixa de ser director xeral de Edicións Xerais “a petición propia”, segundo vén de informar a editorial, que engade que “continuará colaborando coas empresas do Grupo Anaya en Galicia como asesor editorial polo que seguirá vencellado á nova etapa que se abre a partir de agora”. Bragado estaba á fronte de Xerais desde hai 24 anos.
O xuíz rexeita imputar por terrorismo á activista detida dos CDR cataláns e déixaa en liberdade coa acusación de desorde pública.
A Dirección Xeral de Tráfico négase a responder un escrito por estar redactado en galego, segundo denuncia a Unión de Consumidores de Galicia. O Parlamento galego pediu por unanimidade as competencias de Tráfico para a Xunta en 2008, pero en 2010 o Congreso tombou a petición e con ela, o desenvolvemento da Policía Galega. (preme para ampliar a imaxe)
ENQUISA | O PP afunde a mínimos históricos e nunhas eventuais eleccións xerais situaríase ao bordo do empate técnico co PSOE e Ciudadanos na contorna do 24% e o 25% dos votos. Podemos e as confluencias roldarían o 17%, segundo o inquérito de Celeste-Tel para eldiario.es
A casa do histórico narco Manuel Charlín, asaltada en Vilanova de Arousa. Charlín e o seu fillo Melchor foron trasladados ao hospital e a Garda Civil investiga os feitos. Recólleo Pontevedra Viva.
Luís Bará (BNG) racha unha foto do rei no Parlamento durante a defensa dunha iniciativa contra a 'lei mordaza' para "impedir a actual interpretación dos delitos de incitación ao odio e enaltecemento do terrorismo". O PP retrucou que o Bloque "non cre na democracia" no marco do debate e a Presidencia do Parlamento anunciou que "trasladará os feitos" á Xunta de Portavoces da Cámara por ser "unha conduta digna de reproche en sede parlamentaria".
O persoal de Xustiza en folga traslada as súas reclamacións ao Congreso e ao Ministerio en Madrid. O comité de folga fai entrega dunha carta ao ministro explicando a súa "situación de discriminación" e reúnese cos diferentes grupos políticos tras ser convidado por En Marea.
VÍDEO | O fundador de Facebook, Mark Zuckerberg, convidado a revelar os seus propios datos persoais no Senado estadounidense para exemplificar o tratamento que a rede social que dirixe fai desta información das persoas usuarias. Zuckerberg compareceu ante esta Cámara dos EUA tras un novo escándalo polo uso irregular de datos. O xornal portugués Público lembra conflitos anteriores ao respecto.
Unha forte sarabiada atranca a AP-9 á altura de Sigüeiro, con varios vehículos accidentados (Imaxe: Antón Escuredo). En circunstancias coma estas Audasa tentou esquivar a súa responsabilidade culpando as persoas que conducen das neglixencias.
O Tribunal Constitucional avala por 8 votos a 4 o financiamento público dos colexios que segregan o alumnado por sexo e o resto de preceptos da Lei Wert, aínda vixente, que recorrera o PSOE.
