0 Gardados para despois

Almuiña intenta frear o escándalo da hepatite C e carga contra a "demagoxia" da oposición

Miguel PardoMiguel Pardo | @depunteirolo


David LombaoDavid Lombao | @davidlombao


A Xunta tenta de frear o escándalo pola denuncia da Fiscalía contra o Goberno polo atraso na prescrición de fármacos da hepatite C por razóns "orzamentarias". E fíxoo este martes coa comparecencia no Parlamento do actual conselleiro de Sanidade, Vázquez Almuiña, que negou que se atrasasen ou negasen medicamentos por motivos económicos e cualificou de "falaz" a acusación tanto da oposición como dos familiares dos afectados. 

"Poderán manipular os mortos, pero os datos están aí", díxolle o conselleiro Almuiña á oposición

Nunha dura intervención, o conselleiro deu volta a unhas declaracións do voceiro socialista, Méndez Romeu -que asegurara que "se poden manipular os datos pero os mortos están aí"- para afirmar que a oposición "poderá manipular os mortos, pero os datos están aí". Así, asegurou que a subcomisión encargada pola Xunta para determinar os tratamentos só rexeitou 13 dos casos solicitados por criterios clínicos e mesmo aludiu ao actual "déficit do Sergas" para argumentar que non se restrinxiron medicacións por cuestións economicistas. "En ningún caso ohoubo denegación de tratamento", dixo. Antes, denunciara a "demagoxia mesquiña" dos grupos da oposición, que responderon acusándoo de ser "a voz do seu amo", en referencia ao presidente Feijóo, cuxa ausencia na Cámara lamentaron todos os partidos.

Desde o BNG, Montse Prado chegou a cualificar de "psicópatas" aos membros do PP por "seren conscientes do dano que causan e votar en contra de asegurar os tratamentos" e lamentou a "nula catadura moral" do Goberno galego e a ausencia do presidente. Eva Solla, de AGE, incidiu no "criterio económico" no que se baseou a Xunta para afrontar as doenzas de hepatite C e lamentou a "demagoxia" de Almuiña e que dese a cara "en lugar de Feijóo", ao que acusou de "covardía" por "ser o máximo responsable e non comparecer". 

A oposición acusou a Feijóo de "covardía" por non comparecer e lamentou que Almuiña "non asumise responsabilidade ningunha nin se desculpase"

Pola súa banda, Carmen Acuña, do PSdeG, lembrou que "o único que conseguiron desta Cámara os doentes foi que os botaran fóra" e insistiu que é a Feijóo "a que lle hai que pedir responsabilidades". "Pida perdón, rectifique e dígalle ao presidente que veña el a dar a cara", engadiu. 

"Non asumiu responsabilidade ningunha, nin desculpa, nin arrepentemento moral", reciminoulle a nacionalista Prado ao conselleiro, tras criticar, como o resto dos grupos, que asegure que o presidente comparecerá para responder sobre o tema da hepatite C cando, en realidade, "vén responder ás preguntas da Cámara porque é a súa obriga", este mércores no pleno do Parlamento. 

O PP, pola súa banda, acusou a oposición de "canibalismo político" e de "usar os mortos" para "intentar gañar unhas eleccións". 

 

Aliviar presión sobre Feijóo

A comparecencia de Almuiña, realizada a petición do Goberno -pero acumulada coas solicitadas polo PSdeG e, conxuntamente, por AGE, BNG e o Grupo Mixto- produciuse a menos de vinte e catro horas de que sexa o presidente da Xunta quen teña que abordar en pleno os atrasos e vetos a tratamentos de hepatite C. Coa intervención do conselleiro o Executivo tentou aliviar a presión que se incrementara sobre Alberto Núñez Feijóo despois de que, ao saír á luz a imputación dos dous altos cargos e a acusación da Fiscalía, o xefe do Executivo lle restase importancia ao procedemento ao considerar que se trataba de "dúas ou tres denuncias" cuxa ligazón coa "austeridade" era "un disparate".

Batas Blancas e a plataforma de doentes esixiron "desculpas" de Feijóo, que este mércores será cuestionado ao respecto na Cámara

As verbas do presidente, que o pasado ano garantira no Parlamento tratamentos "para todos" os doentes porque "isto non é Venezuela", causaron un sensible malestar tanto no colectivo que agrupa a boa parte dos pacientes en Galicia como no colectivo Batas Blancas, que iniciou a denuncia na que agora tamén está persoada a plataforma de persoas afectadas. Así, no nome dos doentes o seu voceiro, Henrique Costas, esixiulle pasada semana "desculpas" a Feijóo, de quen lamenta que careza "da máis mínima compaixón". Dende Batas Blancas o doutor Evaristo Varo, xefe de transplantes do CHUS, subliñou tamén nunha entrevista en Praza.gal que Feijóo debera "pedir perdón" por unhas verbas que "bordean o desprezo á vida humana".

Coa túa achega fas posible que sigamos publicando novas coma esta.

Sanidade respondeu este marzo unha pregunta sobre os peches de camas do verán de 2015

O 17 de agosto de 2015 o BNG rexistraba no Parlamento unha pregunta ao Goberno sobre o peche de algo máis de 1.000 camas hospitalarias que o Servizo Galego de Saúde, tal e como prevera, estaba a realizar ese verán. A través da deputada Montse Prado a formación pedíalle explicacións á daquela conselleira de Sanidade, Rocío Mosquera, sobre as repercusións sanitarias, pero tamén laborais, do que consideraban unha medida "indecente".

A pregunta iniciou o seu trámite parlamentario e chegou a finais de ano sen ser respondida. O remate do período de sesións provocou a transformación da pregunta oral en escrita. Este procedemento, segundo o Regulamento da Cámara, implica que o Goberno teña que responder por escrito "antes da iniciación do seguinte período de sesións", isto é, durante o mes de xaneiro. Pero esa resposta nunca chegou.

A pregunta foi formulada en agosto e tería que ser respondida, a máis tardar, en xaneiro

A dilación mantívose ata o pasado 29 de marzo, cando a contestación de Sanidade, obviamente xa co novo conselleiro, pasou polo rexsitro de saída da Dirección Xeral de Relacións Institucionais e Parlamentarias. Ao día seguinte, o 30 de marzo, entrou na Cámara a resposta referida aos peches de camas de 2015, cando a sanidade pública afronta xa un novo período estival.

A Xunta enmarca os peches de camas na "defensa da sanidade pública"

Nesa resposta referida ao ano anterior a Consellería xustifica os peches de camas co seu "deber" de "xestionar con eficiencia os fondos públicos". "Sen dúbida, defendemos a sanidade pública", proclama, engadindo ademias que "facelo doutra maneira sería un derroche dificilmente xustificable". Como en anteriores ocasións, Sanidade cita as vacacións do persoal como motivo dos peches xa que, argumenta, "en determinadas especialidades" non é "posible" substituír os profesionais.

Nun sentido semellante, o Sergas indica que mentres pecha camas "mantén toda a actividade clínica que resulta posible", se ben "fundamentalmente" se cingue "á atención daqueles procesos que non admite demora". "En calquera caso -conclúe- unha cama non utilizada non é o mesmo que unha cama non utilizable", xa que "as camas poderían activarse en calquera intre" se fosen "precisas por unha necesidade asistencial".