0 Gardados para despois

Feijóo garante que o conflito catalán “non ocorrerá nunca en Galicia”, da que rexeita que sexa unha nación

David ReineroDavid Reinero | @DReinero


O presidente di que a aprobación do referendo é “o máis grave despois do 23-F” e que Galicia é unha nacionalidade histórica “porque o decidimos todos os españois hai tempo”

O inicio este mércores no Parlament de Catalunya do proceso para a convocatoria dun referéndum o vindeiro 1 de outubro sobre a independencia é para o presidente da Xunta, Alberto Núñez Feijóo, “o máis grave despois do 23-F” e garantiu que “non ocorrerá nunca en Galicia”. Para o presidente, Galicia non é unha nación senón unha nacionalidade histórica, ao mesmo nivel que Cataluña e Euskadi, porque así o decidiron “todos os españois hai tempo”.

Feijóo foi preguntado este xoves, na rolda de prensa posterior á primeira reunión do seu Goberno despois das vacacións de verán, pola situación en Cataluña. O presidente equiparouna co golpe de estado de 1981 e indicou que, ao igual que daquela, será superada. “Avergóñanos”, dixo, tras cualificar de “fóra da lei” a votación do parlamento catalán que aprobou as denominadas leis para o referéndum e  de transitoriedade, que presentou como o paso final cara o “totalitarismo”.

Feijóo acusa a Sánchez de "inventar unha constitución" e asegura que Galicia sempre estará ao mesmo nivel que Cataluña e Euskadi

Feijóo dixo “garantir” que a situación de Cataluña “non ocorrerá nunca en Galicia” e foi preguntado polas declaracións do secretario xeral do PSOE, Pedro Sánchez, nas que considera que ademais de España no Estado son tamén nación Galicia, Cataluña e Euskadi. Para o presidente galego Sánchez “inventa unha constitución” e decide facelo “na semana na que hai o maior ataque ao Estados das autonomías e á unidade de España”. Feijóo dixo que “Galicia é unha nacionalidade histórica” como Cataluña e Euscadi, como se reflicte na actual Constitución de 1978, “porque o decidimos todos os españois hai tempo”, e asegurou que sempre estará ao mesmo nivel que as outras dúas.

Coa túa achega fas posible que sigamos publicando novas coma esta.

Rajoy formula os recursos contra o referendo catalán e o Parlament aproba a segunda lei da autodeterminación

D.L

Os roteiros trazados polos gobernos catalán e español sobre o referendo do 1 de outubro seguen, polo momento, o camiño previsto. Despois de que o Parlament catalán aprobase o mércores a lei do plebiscito e o Govern en pleno asinase a súa convocatoria, o xefe do Executivo central, Mariano Rajoy, xuntou este xoves o seu gabinete en reunión extraordinaria para enviar ao Tribunal Constitucional os recursos contra esas normas, así como contra a designación dos membros da nova Sindicatura Electoral catalá. Paralelamente, no Parlament o bloque soberanista seguiu adiante cos trámites e aprobou pola vía rápida a lei de transitoriedade xurídica, a presentada como norma básica para a creación dunha nova república no caso de que o "si" triunfase na consulta.

Tras a reunión do Consello de Ministros o presidente Rajoy dirixiuse á prensa nun discurso de ton solemne e sen preguntas. Como informa Rodrigo Ponce de León para eldiario.es, o líder popular inzou a súa intervención de advertencias aos dirixentes da Generalitat. "Abandonen a escalada de ilegalidade, crispación e autoritarismo", esixiu, mentres reiteraba que o referendo, simplemente, "non se vai celebrar".

Rajoy insta as formacións soberanistas a "abandonar a escalada de ilegalidade" e mantén que o referendo "non se vai celebrar" en ningún caso

No seu recurso o Goberno de España pide a nulidade e suspensión de todos os actos ligados ao referendo, pero ademais reclama que o TC se dirixa por escrito ao presidente catalán, Carles Puigdemont, ao resto do Govern, a todas as alcaldías catalás e mesmo aos medios públicos de comunicación para advertilos de que se colaboran de calquera xeito coa organización da consulta poden sufrir consecuencias legais. Do mesmo xeito, dende La Moncloa advírtese de que esas sancións mesmo poderían estenderse ao voluntariado que poida responder ao convite de inscrición lanzado pola Generalitat dende a web creada para o referendo, activada na noite do mércores ao xoves. O TC suspendeu a lei no serán do xoves.

Nova xornada maratoniana no Parlament

JxSí e CUP aprobaron a lei de transitoriedade aprobada en ausencia de C's, PSC e PP en protesta por consideraren ignorados os seus dereitos parlamentarios

Mentres Rajoy reforzaba estes anuncios con senllas xuntanzas co socialista Pedro Sánchez e mais co líder de Ciudadanos, Albert Rivera -ambos transmitíronlle o seu apoio na oposición ao referendo- na Cámara catalá Junts pel Sí e CUP activaban o mecanismo para a aprobación exprés da lei de transitoriedade xurídica. Como coa lei do referendo, JxSí solicitou a introdución na orde do día do pleno da norma, aceptada a trámite durante a madrugada, así como a supresión da maioría dos trámites parlamentarios. A operación do bloque soberanista foi interpretada por Ciutadans, PSC e PP como unha nova agresión aos dereitos dos seus grupos, polo que formularon peticións de reconsideración que demoraron notablemente a sesión, tal e como recolle o diario Ara. Dende estas formacións reitérase que as formacións independentistas están a obviar as advertencias de ilegalidade non só do Constitucional, senón tamén de órganos cataláns.

É neste escenario no que JxSí e a CUP seguiron adiante para chegar ao venres tendo xa aprobada unha lei que, atendendo ao seu texto, só entraría en vigor no caso de gañar o "si" no referendo e que prevé a proclamación da república en apenas 35 días. Son 89 artigos e tres disposicións finais que apostan por que o ordenamento xurídico vixente continúe como tal mentres non haxa novas normas que o substitúan e, ao tempo, contempla dúas novas votacións: unhas eleccións constituíntes e un referendo para plebiscitar a nova Constitución catalá.

Como informa Arturo Puente para Catalunya Plural dende a Cámara, xa avanzada a noite os 71 deputados independentistas votaron a prol fronte aos 52 escanos que, novamente, deixaron baleiros os grupos de Ciutadans, PSC e PP en sinal de protesta. Os membros de Catalunya sí que es Pot premeron o botón do "non". A foto final foi, ao cabo, practicamente idéntica á do pleno no que foi aprobada a lei do referendo.