0 Gardados para despois

Podemos afástase da marea galega ao situar as súas siglas como innegociables

David LombaoDavid Lombao | @davidlombao


A chamada xurdiu en varias ocasións ao longo da campaña electoral das municipais e eclosionou tras os bos resultados das mareas e a súa chegada aos gobernos da Coruña, Santiago e Ferrol. A posibilidade de artellar unha Marea Galega para as eleccións xerais e autonómicas é unha constante no debate político de Galicia desde o 24M. As chamadas á unidade sucédense, cada cal cos seus matices, desde múltiples ámbitos da esquerda e do soberanismo. Nesta dinámica moitas olladas dirixíronse cara a Podemos, que apoiou o proceso das mareas en varios concellos pero cuxa estratexia cara ás xerais pasa por converter as súas siglas en innegociables, un plan que o seu secretario xeral, Pablo Iglesias, vén de explicitar tamén en Galicia e que, a priori, afasta a súa formación da posible confluencia no país.

Este venres Iglesias fixo pasar por Galicia a súa "Ruta do cambio", que o o está levando por varios puntos do Estado coa vista posta nas xerais. Nunha axenda de día e medio na que se inclúen dous mitins, en Ferrol e Vigo, citouse cos representantes galegos do seu partido pero, sobre todo, coas mareas e coas forzas políticas que as apoiaron. Unha das citas sinaladas da axenda xa se celebrou e sentou á mesma mesa a Iglesias, a Xosé Manuel Beiras, líder de Anova, e á coordinadora de Esquerda Unida, Yolanda Díaz. Tras o encontro todas as partes coindiden: tanta cordialidade no ambiente e acordo no "diagnóstico" como distancia no xeito de artellar o proceso e de presentarse ás eleccións.

Tras o primeiro encontro os participantes coinciden: tanta cordialidade no ambiente e acordo no "diagnóstico" como distancia no xeito de artellar o proceso

Tres anos despois das eleccións galegas nas que Iglesias participou en calidade de asesor de AGE os seus principais referentes, comezando polo propio Beiras, subliñan que a súa aposta para as xerais pasa polo "pobo galego como suxeito político con libre decisión, con soberanía" para conformar unha alternativa na que participen "forzas políticas con presenza en Galiza, as mareas e o tecido asociativo", indica o histórico nacionalista. Os partidos "non podemos condicionar nada, debemos deixar construír", reflexiona Yolanda Díaz.

Beiras salienta que a súa aposta é alentar o "pobo galego como suxeito político" cara ás eleccións

Estas posicións estiveron sobre a mesa nunha reunión na que, segundo as fontes consultadas, Pablo Iglesias apelou reiteradamente ao aprobado na asemblea fundacional do partido, na madrileña praza de Vista Alegre, para subliñar que non contempla ningunha fórmula que non pase por que as siglas de Podemos estean nas urnas, escenario no que cabería que tras o seu nome figure un "guión" e "outra cousa", como xa explicitou en diversas intervencións públicas nas últimas semanas. Esa 'outra cousa' daría cabida a "outras sensibilidades", di, e podería traducirse nun "grupo parlamentario galego" no Congreso, un "espazo nacional galego" que non estivese "separado", pero si fose "distinto". En todo caso, que o punto de confluencia sexa o seu partido é "imprescindible".

Díaz: "Os partidos non podemos condicionar nada, debemos deixar construír"

Neste contexto, tanto Anova como Esquerda Unida coinciden en manter abertas as canles de diálogo con Iglesias, dadas as "coincidencias sobre o momento político no que estamos", aínda que desde ambas as organizacións lémbrase que Podemos participou nas mareas sen as súas siglas, sen que isto significase a súa desaparición como organización. No entanto, nas contornas de Beiras e Díaz, así como desde os da Marea Atlántica e Compostela Aberta -Iglesias xa ser reuniu este venres con Xulio Ferreiro e Jorge Suárez e o sábado farao con Martiño Noriega-, cobra forza a posibilidade de que non chegue a conformarse unha "alternativa electoral conxunta" con Podemos, tendo en conta que a "marea galega", destacan, debe nacer "dende abaixo, da cidadanía", "sen tutelas", como "suxeito político propio" que se poña nomes e apelidos" a si mesmo.

Este posible escenario facilitaría a conformación dunha Marea Galega na que tamén participase o BNG, que nas últimas semanas se vén manifestando a prol dunha candidatura galega unitaria e "de amplo espectro". Daría lugar, ademais, á paradoxal circunstancia de que Podemos competiría electoralmente coas mareas ás que apoiou nas municipais, unha base social coa que o propio Iglesias di estar disposto a confluír de novo para as eleccións galegas, previstas para 2016.

Coa túa achega fas posible que sigamos publicando novas coma esta.

Lapelas Versión despregada

Compostela Aberta subliña ante Iglesias que non irá ás xerais nunha "casa prefabricada"

Na súa segunda xornada en Galicia a 'Ruta do cambio' de Podemos tivo parada en Santiago, onde Pablo Iglesias mantivo un breve encontro co alcalde da capital galega, Martiño Noriega. Como poucas horas antes na Coruña ambas formacións saíron da xuntanza tan próximas no "diagnóstico" como afastadas nas formas. "Hai diferenzas a respecto das fórmulas electorais", admite Iglesias, mentres a plataforma compostelá advirte de que non entrará nunha "casa prefabricada" para concorrer ás xerais.

Igual que nos seus encontros con Beiras e Díaz, o secretario xeral de Podemos defende que para o seu partido é "fundamental, en clave electoral e política", que o seu "nome e o logo estean nas papeletas". A súa disposición é que "se poida engadir outro nome ao de Podemos" e que "en termos comunicativos" poida haber "moitas formas de expresalo e de facer campaña". Isto non implica, polo tanto, a súa integración nunha marea galega.

Iglesias ve "fundamental, en clave electoral e política" que "o nome e o logo" de Podemos "estean nas papeletas"

Ante esta posición Noriega indica que dende Compostela Aberta lle transmitiron a Iglesias "a importancia que tivo o proceso de unidade popular" no caso de Santiago, un "punto de encontro da esquerda partidaria e social" que "nos permitiu disputarlle a hexemonía ao PP e ser a lista máis votada". "Sen caer en mimetismos, ese deber se o camiño e aí están as diferenzas", subliña o rexedor compostelán, a cuxo xuízo "non debe haber corsés previos nin casas prefabricadas mentres non definamos de maneira aberta cal ten que ser o campo de xogo.

Noriega: "Ninguén lles nega a centralidade no proceso de cambio, pero a unidade popular ten aínda máis potencial"

Neste contexto, e malia á evidente distancia, tanto Iglesias como Noriega non dan o diálogo por finiquitado. "Non coincidimos, pero seguiremos dialogando", xa que "marcho coa sensación de que estamos moi cerca, con moito optimismo", afirma o líder de Podemos. "Ninguén lles nega a centralidade no proceso de cambio", pero "a unidade popular ten aínda máis potencial", di Noriega, quen afirma que en Compostela Aberta seguirán sendo "optimistas" cara a eventuais confluencias "mentres existan canles de diálogo".

Tras as xuntanzas deste venres, xornada que Iglesias rematou cun mitin en Ferrol, este sábado finaliza o seu percorrido por Galicia. Faino cun encontro coa prensa en Vigo e un mitin na propia cidade.

Iglesias subliña que ve "fundamental" manter as súas siglas, pero que o diálogo "continúa"

CC BY-SA Praza Pública

Noriega subliña que Compostela Aberta non contempla unha "casa prefabricada" para as xerais

CC BY-SA Praza Pública

Compromiso aposta por unha candidatura nas xerais "ao xeito da Marea Atlántica"

O secretario xeral de Compromiso por Galicia, Xoán Bascuas, uniuse este sábado ás voces que manifestan o apoio á construción dunha marea galega. No transcurso dunhas xornadas de política municipal celebradas polo partido en Lalín Bascuas considerou que o vindeiro Día Nacional de Galicia podería ser o "punto de partida" para "o lanzamento dunha plataforma cidadá galega caras ás vindeiras eleccións xerais" que, "adoptando o nome que adopte, debería parecerse ao que foi a Marea Atlántica".

Para Bascuas, a plataforma coruñesa foi exemplo de "liderado cidadán" mentres as organizacións "empurran, sen veto a ninguén"

A xuízo de Bascuas, a candidatura que dende o pasado mes goberna A Coruña é un exemplo de como "poñer diante a liderar á cidadanía e, por tras, a empurrar as organizacións políticas, sen veto a ninguén". A Dende o punto de vista do líder da formación galeguista, esa candidatura debera ter o "obxectivo de ter grupo parlamentario propio, nidiamente galego", para "propiciar un cambio político, institucional, económico e social" que garanta "que Galicia teña voz propia no novo escenario político que se abre no Estado.

Nun sentido semellante Bascuas ve tamén necesario "dar os pasos necesarios" para que o vindeiro 25 de xullo sexa unha celebración "unitaria" do Día Nacional. Os actos que se celebren, subliña, deberan ser "de toda a cidadanía e de todas as organizacións que queiran expresar que temos un país con futuro". "Ten que ser a propia cidadanía quen asuma o rol de protagonista " e as organizacións, "instrumentos que a acompañen".