En varios campus das tres universidades galegas celebraranse este mércores referendos sobre a monarquía, uníndose así á vaga de consultas que se están a organizar en todo o Estado e que se levaron a cabo xa en diferentes puntos. Estudantes e persoal universitario da Coruña, Ferrol, Ourense e Santiago están convocados a votacións como a xa celebrada en Vigo, onde case 1.600 persoas participaron, optando máis do 90% delas pola República.
Os campus da Coruña, Santiago, Ferrol e Ourense únense á vaga de consultas organizadas no Estado e á xa celebrada na Universidade de Vigo
“Cremos que chegou a hora de decidilo todo”, coincide en sinalar o estudantado impulsor dunhas consultas que se organizaron “de forma asemblearia e aberta” nos catro campus e que implicou tanto xente achegada a organizacións estudantís como independente.
Están chamados a votar nos catro referendos tanto o alumnado como PDI (persoal docente e investigador) e PAS (persoal de administración e servizos) nunhas consultas sobre a monarquía con preguntas semellantes nos catro casos pero non idénticas.
No caso da USC, será unha única a cuestión a que terán que responder os participantes (Está a favor de abolir a monarquía e impulsar procesos constituíntes que cristalicen en República?), ao igual que no campus de Ourense da Universidade de Vigo (Está a favor de abolir a Monarquía como forma de Estado e instaurar unha República que abra procesos constituíntes?).
Todas as papeletas das diferentes consultas preguntan pola abolición da monarquía, a instauración da república e a apertura de procesos constituíntes
Na UDC, tanto no campus coruñés como no de Ferrol, serán dúas as preguntas nas papeletas. A primeira delas coincide: Estás a favor de abolir a monarquía? No caso de resposta afirmativa, na Coruña os participantes responderán sobre se están a favor de instaurar unha república a través da apertura dunha serie de procesos constituíntes, mentres que na localidade ferrolá a cuestión é se están a favor da apertura de procesos constituíntes para decidir o modelo de República?
“Nun momento de repregamento autoritario do réxime do 78, fundamentado en parte nunha monarquía herdada da dictadura, a reivindicación da democracia no seu máis amplo sentido é unha cuestión de suma importancia para as clases populares”, explican os organizadores do referendo, simbólico como o resto, no campus da Universidade da Coruña (UDC).
“Reivindícase o dereito non só a decidir a xefatura do Estado, senón a abrir un proceso constituínte no que se poidan debater todo tipo de cuestións”, din os estudantes organizadores na USC.
"Non entendemos a República como ausencia de rei, senón como un proxecto de democratización total no nacional e no social, onde o pobo galego e os demais pobos do Estado decidan que queren ser e como materializalo", engaden desde a UDC.
“Reivindícase o dereito non só a decidir a xefatura do Estado, senón a abrir un proceso constituínte”
En Compostela poderase votar nas facultades de Comunicación, Filoloxía, Económicas e Maxisterio, no campus Norte; nas de Políticas, Matemáticas, Psicoloxía, Física e na Biblioteca Concepción Arenal, no campus Sur; así como na de Historia, Filosofía e Medicina.
Na Coruña, entre as 10 e as 18 horas, as urnas estarán situadas nas facultades de Ciencias da Educación, Dereito, Socioloxía, Informática, Camiños, Económicas, Arquitectura, Ciencias, Filoloxia e INEF. En Ferrol, a votación levarase a cabo de 10 a 20 horas na entrada da Facultade de Humanidades en Esteiro, mentres que en Ouense, desde ás 9 da mañá, na entrada da Facultade de Empresariais e Turismo e na planta baixa do Edificio de Ferro.
Máis de 14.000 persoas participaron xa nos referendos en catro universidades do Estado
A iniciativa naceu na Universidad Autónoma de Madrid, que xa celebrou a súa consulta o pasado 29 de novembro con máis de 7.000 votos, unha participación que practicamente duplicou a das eleccións ao reitorado na mesma institución. En total, máis de 25 universidades públicas organizaron ou xa celebraron as consultas sobre a monarquía. Polo momento, ademais de na UAM e na Carlos III de Madrid e en VIgo, tamén houbo votacións en Terrassa. En total, xa participaron máis de 14.300 persoas nestas consultas simbólicas, cunha vitoria arrasadora da opción republicana en todos os casos.
Por outra banda, o vindeiro venres, representantes do estudantado impulsor de todos estes referendos nas universidades galegas reuniranse para "reflexionar e facer unha avaliación" das consultas "diante da sociedade galega", ademais de ofrecer unha rolda de prensa.
O seu obxectivo é, segundo din, "facer unha valoración conxunta, tecer rede entre todas as partes activas no proceso e trazar o seguinte paso a dar para avanzar no cuestionamento das estruturas que sustentan o caduco réxime do 78".