0 Gardados para despois

Ferrol ensaia unha peonalización de todo o seu centro histórico co gallo do Día sen Coches

Redacción | @prazapublica

O centro histórico de Ferrol será peonil entre este venres ao mediodía e a madrugada do domingo ao luns. Co gallo do Día sen Coches o Goberno municipal impulsa esta experiencia piloto, que acompaña de aparcamentos disuasorios nos arredores do barrio da Magdalena, a gratuidade dos autobuses urbanos e numerosas actividades relacionadas coa Semana da Mobilidade. O pasado ano o Concello de Ferrol presentou o seu proxecto de peonalización, co que busca reverter a crise poboacional e comercial do seu centro e seguir así o camiño aberto por cidades como Pontevedra ou Compostela. Este pasado mes de xuño A Coruña completou a peonalización da súa Cidade Vella e tamén Ourense vén de aprobar a prohibición dos vehículos motorizados en varias rúas do seu centro. Ferrol é unha das urbes con menos rúas peonís e está a ficar como unha excepción, unha das poucas cidades nas que a meirande parte do seu casco histórico está aínda aberto ao tráfico rodado.

O barrio da Magdalena será peonil desde as 15 horas do venres 21 ata a noite do domingo 23

Esta fin de semana, dende as 15 horas do venres, todo o barrio da Magdalena será peonil. Ás rúas que xa teñen esta condición (Real, Dolores, Galiano, Carme e Manuel de Cal e parte de María e Magdalena) uniranse o resto das vías nun perímetro comprendido entre as rúas Igrexa e Sol, Arce e Lugo. Habilitaranse outras dúas vías de subida por Rubalcava, onde se ubicará a parada dos taxis a carón da igrexa do Carme, e de baixada pola rúa Coruña. ermitirase o acceso a residentes, carga e descarga e vehículos de servizo. Haberá un reforzo de axentes a pé de rúa para informar en todo momento a veciñanza.

Todas as liñas de bus urbano serán gratuítas durante o venres "coa vontade de concienciar a cidadanía e fomentar o uso do transporte público, no día a día, nas rutinas laborais e escolares e recuperar o espazo da cidade para os peóns con menos fumes", destacan dende o Concello. O Goberno local vén de anunciar, ademais, a construción dun novo aparcamento disuasorio, situado no barrio de Canido, na rúa Alegre, que conterá 165 prazas de aparcamento e que suporá un investimento de 128 mil euros. Unirase ao aparcamento disuasorio xa existente en Sánchez Aguilera (320 prazas) e aos provados de Cantón de Molíns (386), Praza de España (625) e os dos Mercados da Magdalena e Irmandiños (295). Marchas ciclistas, roteiros pola cidade, xogos na rúa, aulas de educación vial, charlas e concursos completarán a programación desta Semana da Mobilidade en Ferrol.

O Goberno municipal presentou o pasado ano o seu proxecto de peonalización, buscando reverter a crise poboacional e comercial do seu centro

"Un barrio peonil, aberto, activo e atractivo é un polo de atracción para asentar novos residentes e novos negocios", destacábase o pasada anos dende o Concello de Ferrol, no momento en que se presentou o proxecto de peonalización. "A peonalización é un modelo de cidade que funcionou en todas partes", subliñaba a concelleira María Fernández Lemos en conversa con Praza, destacando que o barrio "ten unha escala perfecta para levar a cabo unha peonalización, pois "todas as zonas son moi doadamente accesibles dende o perímetro no que si se permite a circulación de coches". "Se non o facemos nós, terá que facelo quen veña despois. Por responsabilidade temos que poñernos en serio con este proxecto", concluía a concelleira de Urbanismo, que cre que "sempre vai haber xente contenta e xente descontenta con estes procesos. E moitos dos descontentos, unha vez que pasan os meses, cambian de opinión. Os gobernos deben ter frialdade e decatarse de que xogan con tempos distintos".

 

Coa túa achega fas posible que sigamos publicando novas coma esta.

A Semana da Mobilidade, da Coruña a Compostela ou Pontevedra

Son moitas as cidades e vilas que estes días están a realizar actividades ou anuncios de novas medidas a prol da mobilidade sostible, coincididndo coa celebración do Día sen Coches e da Semana da Mobilidade.

Na Coruña o alcalde Xulio Ferreiro e varios concelleiros e concelleiras participaron nunha Carreira de Medios de Transporte, unha iniciativa que pon en relación os custos, impactos ambientais e tempos de viaxe que invisten os algúns dos medios de transporte que se usan na cidade. Tratábase de chegar dende a Praza de María Pita ata a Casa da Auga, en Riazor, empregando coche, moto, bicicleta, autobús urbano e andando. O medio máis rápido resultou ser a bicicleta (10 minutos), seguido da moto (12) e do coche (16); a máis distancia ficou a camiñata (26 minutos) e o autobús (33). A bicicleta e a camiñata foron, obviamente, os medios de transporte máis baratos (0 euros) e limpos (sen emisións), mellorando os resultados de moto (0,49 euros), autobús (1,30 euros) e coche (2,48 euros).

Resultou moi comentada a reportaxe que The Guardian lle dedica aos resultados da peonalización e o modelo urbano de Pontevedra, onde "a banda sonora habitual dunha cidade española foi remudada polo chiar dos paxaros e as conversas da veciñanza". A peza, titulada "Para min, isto é o paraíso", encádrase nun proxecto informativo no que o xornal británico analiza o futuro dos espazos urbanos por todo o mundo. O xornal británico destaca o descenso nas emisións contaminantes e a diminución no número de persoas atropeladas ou vítimas de accidente de tráfico na localidade e lembra o feito de que Pontevedra sexa a cidade natal de Mariano Rajoy e que o ex-presidente do Goberno, paradoxalmente, nunca amosara interese polo modelo polo que a urbe é coñecida en todo o mundo.

Tamén o Concello de Carballo está a desenvolver unha ampla programación, centrada este ano especialmente no fomento do uso da bicicleta. Por exemplo, propóñense varias rutas en bici e fomentarase a concienciación de nenos e nenas, coa colaboración entre o Club Ciclista Carballo a un Paso, a Policía Local e os colexios.

De igual xeito, os colectivos A Golpe de Pedal (Vigo), Pedaladas (Pontevedra), Salinas do Ulló (Vilaboa) veñen de remitir un escrito aos concellos de Redondela, Vigo, Soutomaior, Vilaboa e Pontevedra no que demandan a creación dunha senda ciclista e peonil que conecte as cidades de Vigo e Pontevedra empregando principalmente varios treitos de vía de ferrocarril que na actualidade están fóra de uso, conformando así unha nova senda verde.  "Nunha contorna cunha dispersión poboacional tan elevada como a nosa, segue sendo o desprazamento a pé ou en bicicleta o mellor medio de promoción de conexión segura e acougada entre vilas veciñas, o mellor medio de socialización entre os veciños e a mellor forma de recuperar e volver conectar co noso entorno natural", destacan.

Tamén en Compostela se está a aproveitar a Semana da Mobilidade para poñer en valor varias das iniciativas postas en marcha nos últimos tempos, que contribúen a consolidar un modelo no que prima o tránsito peonil polo que a cidade se converteu en todo un símbolo e un referente para outras localidades. A pacificación e calmado de tráfico nas rúas San Pedro e San Francisco, a implantación das ciclorúas, con prioridade para as bicis e limitación de velocidade para facilitar a convivencia no Ensanche foron algunhas das medidas salientadas polo concelleiro Jorge Duarte, que puxo esta praza de prioridade peonil no cruce de Montero Ríos e Xeneral Pardiñas como exemplo de como pode mellorar a vida na cidade unha simple medida de fomento da mobilidade sostible e amable coa cidadanía.