0 Gardados para despois

Fomento tira de autobús para presentar a futura mellora do tren a Lugo tras descartar que teña AVE

David ReineroDavid Reinero | @DReinero


Lugo non vai ter AVE, malia que o 10 de xaneiro de 2009 Alberto Núñez Feijóo, daquela candidato á presidencia da Xunta, prometese que el construiría a conexión desa cidade e de parte da provincia con Ourense e o resto da rede e pasaría despois a factura ao Ministerio de Fomento se este non o facía. Este luns, a un ano das eleccións municipais, o agora ministro, Íñigo de la Serna, presentou os seus plans de futuro para a liña, que pasan por mellorar o trazado de 30 dos 117 quilómetros da vía actual cun investimento duns mil millóns para o que non hai prazo. Antes, outras melloras por 238 millóns permitirán reducir para 2021 a viaxe entre Ourense e Lugo a unha hora. Para  facer estes anuncios Fomento organizou unha curta viaxe en tren ata Lugo coa que amosar un treito recentemente mellorado, excursión para a que tivo que recorrer a autobuses para chegar ao seu punto de partida, evidenciando así o deficiente servizo ferroviario da provincia.

Unha década despois de que Feijóo prometese construír el unha nova liña se non o facía o ministerio, este anuncia sen prazo mil millóns para mellorar o trazado de 30 dos 117 quilómetros desde Ourense

Ao tempo que anunciaba os seus plans de futuro para a liña entre Ourense e Lugo, Fomento quería amosar a autoridades e xornalistas a recentemente posta en servizo variante da Pobra de San Xiao, un treito de novo trazado de 7 quilómetros que tardou 11 anos en rematar para evitar varias curvas e pasos a nivel da vella liña. Pero ningún dos escasos trens diarios que circulan en sentido Ourense-Lugo o fai no horario matinal que conviña ao ministerio.

Así que para chegar en tren a Lugo na mañá deste luns tras circular pola variante da Pobra de San Xiao a Fomento non lle quedou máis remedio que fretar un tren especial, un Alvia de longo percorrido, ao que subiu os seus invitados en Sarria, a só 40 quilómetros da cidade. Pero para iso tivo que desprazar ata alí a eses invitados en autobús, mesmo medio de transporte que logo volveu empregar en Lugo para volvelos mover da estación de tren ata a sede da Subdelegación do Goberno na que o ministro realizou os seus anuncios, a un quilómetro de distancia.

O que alí dixo foi que o seu plan de futuro para a liña Ourense-Lugo, descartado o AVE, pasa por outras dúas melloras similares á realizada nesa variante da Pobra de San Xiao. Isto é, construír outras dúas variantes, de 12 quilómetros nos Peares e de 18 en Rubián, que eviten os treitos máis lentos da liña actual. Pero Adif, a empresa pública que xestiona a rede ferroviaria, aínda está a realizar os estudos previos para esas actuacións, polo que non teñen prazo, mentres que o seu custo oscilaría, segundo a opción que se elixa, entre os 800 e os 1.200 millóns.

Á espera dos treitos de novo trazado, sen prazo, Adif está a redactar os proxectos para outras melloras do trazado actual, como a electrificación entre Lugo e Monforte e a supresión de pasos a nivel

Antes, a mesma Adif xa está a redactar os proxectos para outras melloras do trazado actual, como a electrificación do treito que falta por estalo entre Lugo e Monforte e a supresión de pasos a nivel. Son actuacións todas elas que, ante a constatación de que o AVE non se faría, xa viñan sendo propostas como mal menor pola Deputación e o Concello de Lugo así como por outras vilas intermedias co apoio do Eixo Atlántico de cidades de Galicia e o Norte de Portugal. Segundo indicou este luns Fomento, esas outras actuacións de mellora a curto prazo suporán un investimento de 283 millóns.

O obxectivo fixado por Fomento, á espera da futura execución das dúas novas variantes, é que as melloras que se realicen a curto prazo permitan que en 2021 Lugo poida estar conectada con Ourense en algo menos dunha hora e con Madrid en algo menos de catro horas. Será un ano máis tarde que a gran rebaixa de tempos que chegará ao resto de Galicia cando entre en servizo en 2020 o groso da liña agora pendente entre Zamora e Ourense. Porén, para aquela aínda estará sen rematarse o aínda hoxe non iniciado último treito duns 14 quilómetros entre Taboadela e Ourense que suporá o remate auténtico do AVE a Galicia e que non chegará ata mediados da próxima década.

É con esa perspectiva de mellora da conexión con Lugo coa que agora o presidente Feijóo xa non fala de que esa cidade terá AVE, malia a súa promesa de hai unha década, senón de “estender” ata Lugo as vantaxes que terá o AVE a Madrid que pase por Ourense.

Mellora do tren a Lugo

CC BY-SA Praza Pública (Fonte: Adif e Eixo Atlántico)

Coa túa achega fas posible que sigamos publicando novas coma esta.

Concello e Deputación lucenses e oposición parlamentaria critican o anuncio do ministerio

En Lugo as dúas institucións salientaron que as melloras anunciadas polo ministro non son o AVE que prometera o presidente Feijóo

A promesa de melloras futuras do tren entre Ourense e Lugo non convenceu este luns nin ao Concello e a Deputación de Lugo nin aos grupos da oposición no Parlamento de Galicia. En Lugo as dúas institucións salientaron que as melloras anunciadas polo ministro non son o AVE que prometera o presidente Feijóo, ao que piden explicacións. Ao tempo, desde Santiago os grupos da oposición criticaron como “propaganda” os anuncios realizados este luns para Lugo. O portavoz socialista, Xoaquín Fernández Leiceaga, lembrou que non só Lugo non terá AVE senón que este non chegará totalmente a Ourense ata mediados da próxima década, cando se remate a aínda non iniciada variante entre esa cidade e Taboadela. Pola súa banda, a portavoz do BNG, Ana Pontón, lembrou que os anuncios de Fomento non se corresponden co realmente consignado nos orzamentos do Estado, contías moi inferiores que non permiten avanzar na mellora efectiva da liña.