É evidente que o novo goberno grego non conseguiu o que pretendía, pero tamén é evidente que conseguiu mellores condicións para poder facer unha política sequera menos inxusta. Iso pódelle parecer unha bobada insignificante aos nosos insaciables amos e aos seus políticos, pero significa comida, vivenda, cobertura sanitaria e ensino para moitas persoas. Así de simple.

É evidente que o novo goberno grego non conseguiu o que pretendía, pero tamén é evidente que conseguiu mellores condicións para poder facer unha política sequera menos inxusta

Por que non seguen ese camiño os gobernos portugués e español a pesar dos padecementos de boa parte dos seus gobernados e, pola contra, torpedean a negociación aos gregos? Creo que por varias razóns, a primeira máis simple e real é que eses gobernantes son os representantes directos nos seus respectivos estados da troika e os intereses especulativos. É dicir, foron elixidos polos seus connacionais pero traballan para os seus inimigos. Son exactamente o contrario de bos cidadáns ou, se o prefiren, son traidores.

Por que non seguen ese camiño os gobernos portugués e español a pesar dos padecementos de boa parte dos seus gobernados e, pola contra, torpedean a negociación aos gregos?

Hai máis explicacións. A segunda e tamén máis simple e real é que estes gobernantes se están forrando literalmente. Gobernan para as súas empresas e logo volverán a elas, até os rexistradores da propiedade fórranse con este Goberno. Estanse lucrando coa miseria dos seus concidadáns, a iso chámaselle ser vampiros.

Con todo, non se chamarían a si mesmos traidores e vampiros, porque non senten o sufrimento das persoas que padecen esa discriminación económica e social. Realmente non se consideran concidadáns da maioría dos habitantes do seu país. Como entender iso? Trátase do clasismo. O clasismo non é un termo económico, senón antropolóxico. Os clasistas cren realmente que son persoalmente superiores. Igual que hai quen nega apresuradamente que este sexa un Goberno de franquistas facendo política franquista (o mellor truco do franquismo foi o que lle atribúen ao diaño, facer crer que non existe) tamén haberá quen se negue a crer que existan persoas así. Esas persoas deben ler o que escribiu e publicou o presidente que os goberna acerca da desigualdade entre as persoas e comprenderán até que punto o clasismo é unha forma de racismo e crenzas euxenésicas. E viceversa.

Naturalmente, hai outra razón, que é a máis comentada estes días: preocúpanlles as próximas eleccións. Efectivamente, se Grecia consegue cousas enfrontándose a esa política á que estivemos sometidos, entón hai que recoñecer que o que hai que facer é desdicirse, cambiar de política e aliarse cos gregos para axudalos a forzar un cambio nas condicións que nos impuxeron. E alguén imaxina a Rajoy enfrontándose a Merkel?

Como vai imaxinar Rajoy o Reino de España con Grecia, Irlanda e Portugal? Se polo menos fose con Italia. E é que a idea de España deses señores e señoras é absolutamente mítica

Ademais destas razóns e outras de carácter persoal, non o faría porque na súa imaxinación, como na de Aznar, só cabe recoñecer os amos e someterse a eles. Aznar meteu a España na guerra contra Iraq para poder ser el a mascota de George Bush. As relacións sadomasoquistas xogan un papel no imaxinario dos cohibidos nacionalistas españois. Ademais, en momentos delicados somos capaces de sintetizar a nosa visión das cousas dun modo claro, Rajoy fíxoo co seu SMS a De Guindos: "Aguanta. España non é Uganda". Todos os complexos de inferioridade e o racismo nunha oración de catro palabras. Como vai imaxinar Rajoy o Reino de España con Grecia, Irlanda e Portugal? Se polo menos fose con Italia. E é que a idea de España deses señores e señoras é absolutamente mítica, crense o de Isabel a Católica, Carlos V de Alemaña, etc. E iso, vivir nun mundo mítico sen contrastes coa realidade social, é unha forma de delirio que non teñen interese en corrixir.

Pero, e se o camiño de Grecia, facer fronte ás imposicións da Troika, é o correcto?, que vai facer o PSOE?

Pero, e se o camiño de Grecia, facer fronte ás imposicións da Troika, é o correcto?, que vai facer o PSOE? Cando gobernou caeu enriba a crise e creo nese momento ninguén que estivese no Goberno sabería reaccionar moito mellor. E, con seguridade, se gobernase entón o PP sería todo moito máis cruel. Pero o certo é que Zapatero foi un gran reformador democrático, aínda que hoxe ninguén pareza ter memoria, pero carecía dun proxecto económico que non fose continuar o de administracións socialistas anteriores e confiaba en que a máquina de facer diñeiro incesantemente permitiría políticas sociais. A crise evidenciou que a máquina tiña donos e non eran os estados, desde logo o español. Esa lección ou unha semellante debe aprendela o PSOE, non ten por que avergoñarse do que gobernou de boa fe pero, en cambio, terá que repensar o modelo económico se quere ser crible e ter unha política económica distinta da do PP.

A crise evidenciou que a máquina tiña donos e non eran os estados, desde logo o español. Esa lección ou unha semellante debe aprendela o PSOE

Non digo que o consiga, pois, por unha banda, é evidente que hai empresas que patrocinan esta dirección e, doutra banda, está encerrado no continuísmo e entreguismo das políticas da social democracia europea.

Como todo na vida, o que naceu un día está destinado a perecer outro. Con todo, sendo moi probable que o sistema político bipartidista entre en crise, non creo que vaia haber cataclismos e que o PSOE vaia desaparecer. Pero, aínda que pode ser que os seus actuais dirixentes consigan cotas de poder aceptables, non será un partido útil socialmente se non fan unha inflexión razoada e andan un camiño distinto.