Cada vez que o BNG celebra un procedemento orgánico, os medios de comunicación lanzan análises sobre o estado da fronte. E esta Asemblea Nacional non podía ser a excepción. Unha vez máis, os medios españolistas do país tentan construír no imaxinario galego que o Bloque está inmerso nunha falsa dicotomía: pragmatismo vs. ideoloxismo. Esta visión, simplista e malintencionada, busca sementar dúbidas sobre a viabilidade do proxecto soberanista que o Bloque está a liderar.
O verdadeiro debate non é pragmatismo contra ideoloxía. O reto real é como continuar cunha comunicación pedagóxica e transformadora sen renunciar ás nosas demandas soberanistas
Vemos como os medios seguen funcionando para manter o discurso dominante, un discurso que asegura que os partidos políticos sempre buscarán salvarse primeiro a si mesmos. Que o soberanismo é sinónimo de conflito, violencia e ruptura. E que todos os políticos son iguais: defenden principios ata que chegan ao poder. Pero quen acreditamos na forza transformadora da comunicación sabemos que, posta en mans do pobo galego, esta é unha ferramenta poderosa. Unha ferramenta capaz de rachar co statu quo que fai que a nosa xente acepte políticas e estruturas contrarias aos seus propios intereses. É o momento de dotarnos de paciencia e intelixencia para comunicar o verdadeiro valor do soberanismo ao pobo galego, afastándonos da caricatura deshumanizadora e devolvéndolle os valores de xustiza social e igualdade que lle corresponden.
O verdadeiro debate non é pragmatismo contra ideoloxía. O reto real é como continuar cunha comunicación pedagóxica e transformadora sen renunciar ás nosas demandas soberanistas. Os medios tradicionais xa xogan o papel que se espera deles, mantendo o marco dominante. O que non podemos permitir é que o noso discurso se modere ou dilúa para encaixar nese marco, porque entón corremos o risco de acabar sendo aquilo que outros din de nós: un partido tradicional máis, que defende os mesmos intereses que os partidos estatais. O noso obxectivo, pois, é resignificar o relato sobre o soberanismo e comunicar de maneira que as nosas ideas sexan comprendidas e defendidas por unha base social ampla e consciente.
O éxito recente do BNG non se debe a concesións ideolóxicas, como algúns queren facer crer. Conseguimos conectar mellor coas preocupacións reais da xente mediante unha comunicación clara e efectiva, con moito traballo institucional e orgánico, sen esquecer as rúas
O éxito recente do BNG non se debe a concesións ideolóxicas, como algúns queren facer crer. Conseguimos conectar mellor coas preocupacións reais da xente mediante unha comunicación clara e efectiva, con moito traballo institucional e orgánico, sen esquecer as rúas. Debemos seguir explicando por que o soberanismo é a mellor opción política para Galiza. Non se trata de suavizar o discurso, senón de facelo accesible, pedagóxico e transformador. Gramsci advertía sobre a importancia de combater a hexemonía cultural imposta polas elites, e esa é a nosa misión: desmontar esa hexemonía e ofrecer unha alternativa real para as clases populares galegas.
Sería un erro pensar que repetir os postulados históricos, sen máis, basta para transformar a realidade. Abrazar un discurso ideolóxico e lanzar consignas desde redes sociais ou parlamentos non vai espertar, de súpeto, a conciencia nacional no pobo galego despois de décadas de silencio.
A mobilización é fundamental, pero debe ir acompañada dunha organización forte e dunha comunicación clara que explique por que loitamos. Non chega con facer ruído: debemos demostrar que o BNG é unha verdadeira ferramenta de transformación social. Para iso, precisamos un discurso firme, sen diluír as nosas ideas, pero que sexa claro, comprensible e, sobre todo, transformador.
Como dicía Paulo Freire: “A educación non cambia o mundo, cambia as persoas que van cambiar o mundo”. O mesmo ocorre coa comunicación. A nosa responsabilidade é poñer nas mans do pobo galego as ferramentas necesarias para tomar o control do seu futuro.
