O Ribadeo que logramos e o que está por vir

Presentación de Pablo Vizoso como candidato á Alcaldía de Ribadeo © BNG Ribadeo

Para min foi un pracer inmenso compartir con toda a veciñanza de Ribadeo un acto público tan emblemático como a cea-presentación da miña candidatura á alcaldía de Ribadeo polo BNG. Foi un pracer e supuxo unha enorme ilusión compartir con todas e todos vos, así como coa nosa portavoz nacional, Ana Pontón, este momento tan emotivo. Esta nova andaina vai ser posible porque, en primeiro lugar, as compañeiras e compañeiros do BNG de Ribadeo decidiron darme o seu total apoio e confianza para encabezar a nosa candidatura ás próximas eleccións municipais para seguir gobernando Ribadeo. Pero tamén porque houbo quen soubo dar paso a novos equipos e nova xente para protagonizar o futuro de Ribadeo. Síntome moi orgulloso e moi agradecido porque Fernando Suárez Barcia contase comigo no seu anterior mandato e soubese ver en min, tamén el, a persoa idónea para continuar co seu labor.

Síntome moi orgulloso e moi agradecido porque Fernando Suárez Barcia contase comigo no seu anterior mandato e soubese ver en min, tamén el, a persoa idónea para continuar co seu labor

Os que me coñecedes ben decides de min que son unha persoa firme, responsable, coa que se pode falar e, sobre todo, que sabe escoitar. Nunca tiven ambición política, aínda que sempre souben ben cales eran as miñas ideas ao respecto: entendo a política como a actividade que nos permite transformar para mellor o noso entorno e a nosa sociedade, sobre todo partindo da base dos nosos recursos e das nosas capacidades.

Tócanos renovar un equipo que siga traballando na mesma liña de orgullo polo propio, progreso, igualdade, servizo público, confianza e transparencia. E temos forza e persoas dispostas a facelo. Vou ser a cara máis visible deste novo grupo, pero estou tranquilo e animado porque sei que me van acompañar persoas moi capaces e coas ideas ben claras. Pero, sobre todo, síntome arroupado por todos e todas vós.

Presentación de Pablo Vizoso como candidato á Alcaldía de Ribadeo © BNG Ribadeo

Tócanos renovar un equipo que siga traballando na mesma liña de orgullo polo propio, progreso, igualdade, servizo público, confianza e transparencia

Podería pedirvos que pecharades os ollos para soñar un novo Ribadeo, pero case prefiro que primeiro botedes a mirada cara a atrás e lembremos algunhas das accións promovidas polos gobernos do BNG en Ribadeo. Recuperamos espazos públicos para o proveito común (o paseo das aceas, estrada do faro co carril bici, senda costeira, parque do xardín...). Sacamos adiante a residencia de maiores (negada sistematicamente pola Xunta como se os de Ribadeo non a merecésemos). Logramos consensuar un Plan de Ordenación Municipal (que proporciona seguridade xurídica para poñer en marcha novos proxectos e evita o caos urbanístico). Puxemos en marcha a campaña das Panchas (que sitúa o noso comercio como unha referencia na comarca e atrévome a dicir en toda Galicia). Somos o concello da Mariña no que máis baixou o paro no último ano, e o que maior incremento comercial experimentou nos últimos tempos. Este último verán lideramos a afluencia de turistas en toda a comarca (o 40% dos turistas da Mariña hospedáronse en Ribadeo) e somos o destino mellor valorado de toda a provincia. E todo iso, traballando o turismo dende os nosos recursos identificativos como pobo. Sabemos vender Ribadeo, sabemos vender Galiza, aproveitando a singularidade que nos dá a nosa cultura. Rehabilitamos, ano tras ano, o noso casco histórico (un exemplo de como se deben facer as cousas e que ten como guinda do pastel a rehabilitación da Torre dos Moreno).

Podería pedirvos que pecharades os ollos para soñar un novo Ribadeo, pero case prefiro que primeiro botedes a mirada cara a atrás e lembremos algunhas das accións promovidas polos gobernos do BNG en Ribadeo

Reducimos a débeda pública até niveis que nada teñen que ver cos tempos nos que gobernaban outros. Neste mandato acometemos unha Inversión de máis de 2.600.000 € nas nosas parroquias do rural e na rede viaria municipal (aglomeramos pistas e camiños esenciais para a vertebración do noso concello, e amañamos escolas e locais sociais). Investimos máis de 1.050.000 € reformando e construíndo infraestruturas para o deporte, como o Pepe Barrera, ou campo do Outeiro, ou as pistas multideporte (en construción), ou as instalacións de piragüismo (que se van reconstruír). Destinamos moitos recursos á formación e ao ocio dos máis novos e non tan novos: na Escola de Música; os eventos das vacacións de Nadal en torno ao RibaXogo, programas de conciliación familiar ou os tan valorados “Aquí coma de 20” ou “As Parroquias en Marcha”, aos que se suma unha programación cultural de primeira e referente na comarca con teatro, música, danza, eventos coma o Ribadeo Indiano, Ribadeo Ilustrado...

Grazas a todo o labor feito, e aos novos proxectos que están en marcha, Ribadeo seguirá a ser un sitio diferente, un lugar no que moitos seguiremos estando orgullosos de vivir, outros verán nel un referente para emprender o seu proxecto vital, e outros moitos quererán vir coñecer ou convivir con nós nalgún momento do ano

E agora si: despois de contemplar o que xa é realidade, comezade a soñar co Ribadeo do futuro, co Ribadeo que está por vir. A reforma do hospital asilo está en marcha. Imos poñer en marcha o Plan Especial das Catedrais. Grazas a todo o labor feito, e aos novos proxectos que están en marcha, Ribadeo seguirá a ser un sitio diferente, un lugar no que moitos seguiremos estando orgullosos de vivir, outros verán nel un referente para emprender o seu proxecto vital, e outros moitos quererán vir coñecer ou convivir con nós nalgún momento do ano. Porque seguimos facendo de Ribadeo un concello con vida e participativo, un concello dinámico e con oportunidades. Un concello moderno e con futuro.

E eses novos logros van ser posibles grazas ao froito que se recolle tras anos de traballo, grazas á dedicación absoluta das persoas, mulleres e homes, que formamos os diferentes gobernos de Fernando Suárez Barcia. Vai ser posible porque combinaremos os recursos propios do Concello coa capacidade de inversión doutras administracións para buscar entre todos o mellor para Ribadeo. Vai ser posible porque somos quen de deseñar un novo equipo de goberno que vai combinar a experiencia adquirida ao longo destes anos coa ilusión e afouteza da xente nova que se suma a este proxecto de progreso, xustiza social, igualdade, benestar e orgullo polo propio.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.