As promesas de oportunidades laborais para persoas que levan anos desempregadas son tan esperanzadoras que o feito de estar baseadas en potenciais violacións de dereitos humanos parecen non importar, polo menos non se falamos dos dereitos doutros. A empresa Navantia está a piques de pechar un acordo con Arabia Saudita para a venda de varias corbetas. Organizacións como Amnistía Internacional deron a voz de alarma porque existe un risco claro de que se poderían utilizar para levar a cabo ataques militares directos á poboación civil, ataques indiscriminados contra civís en Iemen e para manter un bloque naval ao que Arabia Saudita somete ao devandito país desde marzo de 2015, nun conflito que se cobrou 6.000 vidas e no que 8 de cada 10 iemenís depende da axuda humanitaria debido a ese bloqueo. Todas esas prácticas son violacións graves do dereito internacional humanitario.

Con todo, políticos españois de partidos supostamente antagónicos (PP, PSOE, Podemos) manifestáronse a favor, obviando as gravísimos consecuencias dese acordo. O respecto ao dereito internacional humanitario está por encima doutras consideracións, incluídas as económicas, que triste que se esqueza con tanta facilidade. A situación das familias desesperadas por atopar un traballo é evidentemente dura, pero os nosos representantes políticos non deberían consolarnos con oportunidades de traballo baseadas na vulneración dos dereitos doutras persoas, senón loitar para que o dereito ao traballo en Cádiz ou Ferrol se faga realidade sen que supoña a morte de ninguén.