Unha semana para que o dedo apunte á lúa

Imaxe promocional das actividades na Casa das Ciencias © Museos Científicos Coruñeses

Os museos científicos coruñeses súmanse ás celebracións do 50 aniversario da misión do Apolo XI, que coincide no tempo cun eclipse de lúa visible desde Galicia este martes

O 50 aniversario da primeira pegada da humanidade na lúa, o 21 de xullo de 1969, que a Nasa está a lembrar con distintas actividades e divulgando imaxes e vídeos inéditos, coincide esta semana coa posibilidade de ver desde Galicia, este martes día 16, un eclipse do satélite. A súa ocultación coincidirá case coa saída do astro polo horizonte en Galicia, contra as dez da noite, e terá o seu punto máximo ás 23.31 horas. Pero para que as miradas sigan postas sobre a lúa uns días máis, e coincidindo coa efeméride da viaxe do Apolo XI, os museos científicos coruñeses teñen preparado un amplo programa de actividades.

Buzz Aldrin fotografado por Neil Armstrong durante a misión do Apolo XI Dominio Público NASA Neil A. Armstrong

O planetario da Casa das Ciencias proxecta durante toda a semana o documental 'Lévame á lúa' e o sábado acolle a conferencia 'Como poñer un señor na lúa'

O planetario da Casa das Ciencias acolle durante toda esta semana, ata o domingo 21, a proxección do documental Lévame á lúa, ás 13 horas en castelán e ás 19 horas en galego. A película recorre o rastro do satélite nas culturas humanas e culmina coa chegada dos primeiros astronautas á súa superficie. Ademais, o venres 19, ás 20.30 horas, celebrarase a conferencia Como poñer un señor na Lúa, a cargo de Borja Tosar, máster en Astrofisica e Astronomía e máster en Comunicación Cientifica pola Universidade de Valencia. E o sábado 20, ás 20.30 horas, terá lugar a presentación do libro Pasa tempo, de Pedro Feal Veira.

O Muncyt acolle talleres, observacións con telescopio e unha charla sobre meteoroloxía espacial

Pola súa banda, no Museo Nacional de Ciencia y Tecnología (Muncyt) este mércores día 17, ás 17.30 horas, haberá un taller infantil sobre a lúa, no que se porá de relevo o papel das mulleres na expedición do Apolo 11, se realizarán experimentos co relevo lunar e simularanse as fases da lúa. Unha actividade na que colabora a Agrupación Astronómica Coruñesa Ío, a mesma que realizará o xoves 18, tamén no Muncyt, de 12 a 14 horas, unha observación solar con telescopio. O mesmo xoves haberá talleres para os máis pequenos e, ás 18.30 horas, unha charla para todos os públicos sobre meteoroloxía espacial, a cargo do grupo de meteoroloxía espacial da Universidade de Alcalá de Henares.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.