"En parte, o documental quere actualizar a figura de Carvalho Calero, para achegalo ás novas xeracións, para que sexa máis coñecido pola mocidade. En Ferrol hai un colexio e un centro cultural que levan o seu nome e son moitos os que non saben nada del". O ferrolán Antón Rodríguez é un dos tres responsables, xunto con Javier Gómez (Ponferrada) Sergio Arango (Lugo), do documental Vieiros de esperanza, un proxecto de fin de grao na facultade de Ciencias da Comunicación da UDC, que busca poñer en valor a figura do intelectual galeguista.
O proxecto audiovisual, que conta co apoio do Concello de Ferrol, súmase á reivindicación para valorar o labor de Carvalho Calero no eido da sociedade e cultura galega, apoiando a súa candidatura para as Letras Galegas 2015, ano no que se cumprirá o vintecinco aniversario do seu pasamento. O filme está case rematado (ten que ser presentando ante un tribunal académico o 26 de xuño) e ao longo do verán iniciará a súa distribución. Está previsto o seu pase en varios festivais e tamén a súa proxección a través de distintas entidades do movemento asociativo
Rodríguez destaca que Carvalho Calero toma a decisión de traballar para o achegamento do galego ao portugués como "unha visión de futuro", coa mente posta nas posibilidades que se poderían abrir para a lingua
“Como ferrolán quero reivindicar a súa figura, para que sexa homenaxeado no Día das Letras", explica Antón Rodríguez, que sinala que cre "pouco probable" que Carvalho Calero sexa o escollido pola Real Academia o vindeiro mes de xuño para ser homenaxeado en 2015. "É tamén a opinión maioritaria entre as persoas que entrevistamos no traballo e que aparecen no documental", comenta. Entre eles e elas destacan José Martinho Santalha, Xosé María Dobarro Paz, Pilar García Negro, Araceli Herrero, José Luis Rodríguez, Víctor Freixanes, Francisco Rodríguez ou Xesús Alonso Montero.
Trátase dun documental biográfico, que percorre a vida de Carvalho Calero, dende o seu nacemento até o seu pasamento, reparando en todos os eidos nos que traballou e destacou. Busca analizar tamén, conta Antón Rodríguez, o xeito en que a súa defensa do reintegracionismo "se converteu nun tabú" en moitas das institucións nas que colaboraba e no "oficialismo". Rodríguez destaca tamén que Carvalho Calero toma a decisión de traballar para o achegamento do galego ao portugués como "unha visión de futuro", coa mente posta nas posibilidades que se poderían abrir para a lingua.
Prima o obxectivo de "actualizar a figura" e estender o seu coñecemento entre a mocidade
E, sobre todo, prima o devandito obxectivo de "actualizar a figura" e estender o seu coñecemento entre a mocidade. Antón Rodríguez lembra que case non hai apenas material audiovisual sobre el, tan só un documental, A posibilidade de rectificar a historia, publicado por A Nosa Terra en 1991, "moi político", sinala.
O proxecto presentará nos vindeiros meses, así mesmo, unha web con información sobre Carvalho Calero e sobre o propio proceso de produción do filme, que mesmo contará cunha aplicación para dispositivos móbiles.
