O INE vén de publicar os datos de consumo final dos fogares correspondentes ao ano 2018, estratificados por áreas de gasto e por comunidades autónomas. As cifras globais amosan unha recuperación do nivel de gasto dos galegos galegas, en ascenso dende o ano 2013, despois do forte descenso que se producira entre o ano 2008 e 2013, cunha caída do 7%.
Entre os anos 2008 e 2018 o gasto incrementouse notablemente en tres partidas: educación (62%), saúde (+16%), e vivenda (+24%), área que abrangue tamén as facturas de luz, auga e calefacción.
En realidade, a capacidade de consumo dos galegos e galegas é só lixeiramente superior á que había hai unha década (11.118 fronte a 11.053), cun leve ascenso do 0,6%. Pero o máis interesante é observar como foi evolucionando o gasto nas distintas partidas, é dicir, a que áreas tiveron que dedicar as familias galegas un maior esforzo económico.
Así, entre os anos 2008 e 2018 o gasto incrementouse notablemente en tres partidas: educación (62%), saúde (+16%), e vivenda (+24%), área esta última que abrangue tamén as facturas de luz, auga e calefacción. Tamén se incrementou nunha porcentaxe semellante o gasto en comunicacións (+12%).
Pola contra, o gasto descendeu nas restantes partidas, especiamente mobiliario e equipamento do fogar (-19%), vestido e calzado (-17%), alimentación (-11%), transporte (-11%) e ocio e cultura (-12%).
Esta tendencia de incremento do gasto en saúde, educación, vivenda e as facturas de auga, luz e gas mantívose ao longo dos peores anos da crise
Esta tendencia de incremento do gasto en saúde, educación, vivenda e as facturas de auga, luz e gas mantívose ao longo dos peores anos da crise, mesmo nos momentos nos que a capacidade global de consumo dos fogares baixaba de forma importante. Así, entre 2011 e 2013, mentres o gasto total baixaba un 5% e o gasto en alimentación permanecía estancado, o gasto en educación crecía un 21% e en saúde medraba un 9%.
As familias galegas gastan moito máis nos pagamentos derivados da súa vivenda (alugueiros, electricidade, auga, gas...) que en alimentación
A información difundida polo INE permite constatar, ademais, que as familias galegas gastan moito máis nos pagamentos derivados da súa vivenda (alugueiros, electricidade, auga, gas...) que en alimentación e bebidas non alcohólicas. Así, no ano 2018 o gasto anual por persoa en alimentos situouse algo por riba 1.737 euros. Mentres, os galegos e galegas destinaron máis de 3.159 euros ás facturas derivadas da súa residencia habitual.
Finalmente, no último ano as tendencias mantivéronse. Creceu o gasto total, e seguiu medrando o desembolso nas facturas asociadas á vivenda (de 3.113 a 3.159 euros por persoa e ano) e en educación (de 123 a 130 euros anuais por persoa). O gasto en sanidade permaneceu estable, mentres que se detecta un gasto cada vez maior en transporte, que medrou un 22% dende o ano 2013, despois de permanecer estancado nos primeiros anos da crise.
