A conmemoración do Día Internacional dos Traballadores é unha tradición profundamente arraigada na sociedade sueca, dende que fora impulsada a finais do século XIX polas principais organizacións de movementos obreiros do país. A primeira manifestación do Primeiro de Maio en Estocolmo celebrouse en 1890, e os seus máis de 50.000 participantes concentraron as súas reivindicacións na loita pola redución da xornada laboral, baixo o célebre lema de 8 timmars arbete, 8 timmars frihet, 8 timmars hvila (8 horas de traballo, 8 horas de liberdade e 8 horas de descanso).
Historicamente, os tres principais colectivos convocantes da Förstamajdemonstrationen foron a SAC (Organización Central de Traballadores de Suecia), o Partido da Esquerda (Vänsterpartiet) e o Partido Socialdemócrata (SAP), pero durante a última década organizacións tan diversas coma os Demócratas Cristiáns ou o Piratbyrån (A Oficina Pirata) participan tamén en marchas e mitins nos que dan a coñecer as súas políticas.
O Primeiro de Maio é día festivo nacional dende o ano 1939, e foi a única festividade civil (é dicir, de carácter secular ou non relixiosa) ata a instauración do Sveriges nationaldag en 2005.
As imaxes que se amosan a continuación foron tomadas o pasado 1 de maio de 2013 durante a marcha que percorreu as rúas de Estocolmo dende Medborgarplatsen ata Kungsträdgården.
O primeiro de maio en Estocolmo
-
Un manifestante berra consignas durante a conmemoración do 1 de maio en Estocolmo -
Unha das proclamas máis escoitadas durante o Día dos Traballadores foi “inga rasister på våra gator” (“non queremos racistas nas nosas rúas”) -
Unha moza encabeza a marcha da organización xuvenil Ung Vänster. -
Unha cativa sostén unha pancarta co retrato de Lenin. -
Unha banda feminina ofrece un concerto como parte das celebracións na Medborgarplatsen (Praza dos Cidadáns). -
“Enerxía nuclear? Non, grazas”. -
Unha muller reclama a igualdade de salario (lön) entre homes e mulleres. -
"Latinoamérica amosa o camiño" -
Unha moza le o listado de lemas durante a marcha cara a Kungsträdgården. -
A rúa Skeppsbron ao paso dos primeiros manifestantes. -
Moitas das proclamas dos participantes dirixíronse cara a loita contra o sexismo. -
Un grupo de militantes veteranos do Vänsterpartiet participa na marcha dende un autobús.