As noticias sobre ofertas públicas de adquisiçom, OPA, som sempre inesperadas. Maduram em sigilo e executam-se sem prévio aviso para evitar reacçons inoportunas na Bolsa e nos Conselhos de Administraçom
As noticias sobre ofertas públicas de adquisiçom, OPA, som sempre inesperadas. Maduram em sigilo e executam-se sem prévio aviso para evitar reacçons inoportunas na Bolsa e nos Conselhos de Administraçom. Quando a OPA se dirige a umha empresa cotizada, e mais se esta tem projecçom estratégica, a CNMV comparece para impor as cautelas e adoptar medidas defensivas pertinentes.
As operaçons de caça maior dentro do colectivo do IBEX 35 concentram especial atençom por parte da CNMV acolhida com geral aprovaçom embora nunca faltem as vozes partidárias da competência irrestrita como manda o catecismo ultraliberal. A liberdade do capital é um princípio consagrado nos ámbitos business friendly para nom espantar eventuais investidores supostamente timoratos e assustadiços.
As OPA podem ter carácter amistoso ou hostil segundo as valorarem os accionistas afectados. Nestes mesmos dias foi bastante comentada a inesperada OPA hostil lançada sobre Talgo, essa empresa orgulho da engenharia espanhola desde os tétricos tempos de 1942 em que foi concebida polo engenheiro basco Alejandro Goicoechea e o arquitecto carlista José Luis Oriol. A capacidade de empreendimento do conservadorismo vascongado tem longa tradiçom.
As operaçons de caça maior dentro do colectivo do IBEX 35 concentram especial atençom por parte da CNMV acolhida com geral aprovaçom embora nunca faltem as vozes partidárias da competência irrestrita como manda o catecismo ultraliberal
A princípios deste mês Fevereiro, a CNMV decidia paralisar umha inesperada OPA lançada desde um consórcio húngaro de nome Magiar Vagon. A OPA propunha-se adquirir acçons de Talgo a 5 euros equivalentes a valorar a companhia em torno a 617 milhons de euros. Magyar Vagon explicou nesses mesmos dias estar a reconsiderar a operaçom por mor das dificuldades surgidas com as entidades financiadoras de Talgo sujeitas a cláusulas de controle sobre cámbios accionariais. A operaçom finalmente fracassou contrariando as expectativas do fondo de investimento Trilantic como também as de Magyar Vagon, propriedade do empresário András Tombor dedicado ao negócio ferroviário. Umha operaçom de caça frustrada entre as múltiplas que ameaçam às empresas estratégicas. Esta operaçom distou muito aliás de ter alarmado à CNMV por se inscrever no espaço económico comunitário. Nom será preciso recordar as empresas europeias que actualmente circulam livremente pola rede ferroviária espanhola como a Ouigo francesa e a Iryo italiana.
A autêntica ameaça surge das operaçons estratégicas argalhadas por fondos soberanos de investimento de titularidade estatal ou por fondos de investimento privados financiados por poderosos fondos de pensionistas residentes em países prósperos com abundantes recursos excedentários.
Duas operaçons recentes, dirigidas a sectores de tanta envergadura estratégica como o sistema telefónico e o energético alarmárom com toda razom à CNMV e à opiniom pública informada até o ponto de provocarem imediata resposta pública. Referimo-nos à OPA de Blackrock sobre Naturgy e do fondo soberano suadita STC Telecom sobre Telefónica
Duas operaçons recentes, dirigidas a sectores de tanta envergadura estratégica como o sistema telefónico e o energético alarmárom com toda razom à CNMV e à opiniom pública informada até o ponto de provocarem imediata resposta pública. Referimo-nos à OPA de Blackrock sobre Naturgy e do fondo soberano suadita STC Telecom sobre Telefónica.
A compra da multinacional de capital investimento Global Infrastructure Partners (GIP) por parte de BlackRock colocou a este fondo como o terceiro accionista de Naturgy com um 20,6% do seu capital social. O primeiro accionista segue sendo La Caixa que, através de Criteria que controla o 26,7% e o segundo, o gigantesco fondo de investimento británico CVC e a Corporación Alba, que ostentam conjuntamente o 20,7%. Caça maior para experimentados monteiros sempre à espreita. Blackrock é o todo-poderoso fondo americano comandado por Larry Fink1 que mantém em carteira 9 milhons de milhons de dólares, trillions em nomenclatura americana. Umha pasta.
Quanto à toma de participaçom em Telefónica polo fondo soberano saudita Public Investment Fund (PIF), a operaçom transcorreu por canais estritamente formais com notificaçom prévia do Saudi Telecom Company, STC Group à CNMV. A operaçom materializou-se por um 9,9% do capital que completava o 5% já possuído por STC Group através de Green Bridge Investment Company. O acordo final foi rubricado polo presidente da Telefónica Álvarez Pallete em visita a Riad com expressa renúncia da empresa saudita a reforçar o seu peso em razom do papel crucial da Telefónica em áreas tam sensíveis como a comunicaçom internacional e a defesa. O contexto estratégico da operaçom foi objecto de um pormenorizado análise por parte da web de análise político e económico global Agenda Pública2 que paga a pena ler.
A importáncia estratégica de Naturgy na oferta de electricidade e gás à economia espanhola é bem sabida. Um informe de El Economista sobre a dimensom do sector em Espanha permite-nos apreciá-la3. O grupo Naturgy ocupa o terceiro posto por volume de ingressos de 33.965 milhons em Espanha numha classificação encabeçada polo grupo Repsol (73.153) e Iberdrola (53.949) e seguida por Cepsa e Endesa com facturaçom algo superior aos 30.000 milhons.
Poucos acontecimentos o exemplificam melhor que o iminente processo de transformaçom em curso que a eleiçom de Sagunto como sede europeia da sua gigafactoria de baterias decidida por Volkswagen a fim de atender o imparável processo de electrificaçom do transporte terrestre
A crescente pressom investidora do capital multinacional sobre a economia espanhola parece ter aconselhado ao Ministério de Trasformaçom Digital e da Funçom Pública a acometer a criaçom da Sociedade Espanhola para a Transformaçom Tecnológica (SETT)4 concebida para promover o desenvolvimento da indústria dos microchips e a rede audiovisual. A nova sociedade poderia chegar a incorporar o 10% de Telefónica numha operaçom singular que reverteria a sua privatizaçom total decretada em 1997 por José María Aznar em plena febre neoliberal que começou polas empresas públicas e ameaça agora serviços básicos à cidadania como educaçom, sanidade e pensons de jubilaçom, com Madrid como aluno mais avantajado e arrogante.
Apesar da habitual desconsideraçom da potência económica e estratégica de Espanha, ao fio do inveterado vício de auto desprezo tam hispânico, o país é o quarto país da Uniom Europeia em peso demográfico (48,3 milhons de habitantes sobre um total de 448,7) e em PIB (1.462.000 M€ sobre 16.513.000 M€). Os investidores transnacionais sabem-no bem.
Poucos acontecimentos o exemplificam melhor que o iminente processo de transformaçom em curso que a eleiçom de Sagunto como sede europeia da sua gigafactoria de baterias decidida por Volkswagen a fim de atender o imparável processo de electrificaçom do transporte terrestre junto com o esperado impacto do desenvolvimento da rede de comunicaçons 5G projectada por Adif Alta velocidade.
O projecto de Volkswagen visa produzir 150 milhons de celas de baterias para equipar 500.000 veículos cada ano. A planta, que deve ficar operativa em 2026, subministrará baterias às fabricas da firma alemã em Martorell (Barcelona) e Pamplona e, muito provavelmente, à planta estadunidense Ford em Almussafes (Valência) para cobrir a demanda dos modelos fabricados em Europa.
A economia espanhola espreguiça-se em meio dum entrambilicado e tedioso relato de tráfego de mascaras protectoras do corona vírus que a opiniom pública do país contempla com sensaçom de déjà vu: Mortadelo e Filemon de Francisco Ibáñez mormente
A rede 5G projectada por Adif Alta Velocidade tem potencial internacional pola sua conexom com terminais logísticas estratégicas desenhadas para digitalizar processos e reduzir custos de transporte de mercancias por ferro carril. O projecto foi já adjudicado por 20,5 milhons de euros a umha UTE integrada pola filial da multinacional finlandesa Nokia Spain e por Tradia Telecom do grupo Abertis. Umha exemplar aliança europeia.
A economia espanhola espreguiça-se em meio dum entrambilicado e tedioso relato de tráfego de mascaras protectoras do corona vírus que a opiniom pública do país contempla com sensaçom de déjà vu: Mortadelo e Filemon de Francisco Ibáñez mormente.
Espanha nom consegue desprender-se dos seus clássicos. Do valleinclanês Callejón del Gato a Koldo Garcia passando polos impresentáveis calçoncilhos de Roldán o país parece vacilar entre a europeizaçom em perspectiva e José María Hinojosa, El Tempranillo5
Notas
1 https://es.wikipedia.org/wiki/Laurence_D._Fink, um hebreu com boa fortuna
2 https://agendapublica.elpais.com/noticia/18845/detras-operacion-stc-telefonica-se-invierte-capital-oriente-medio-espana
3 https://www.eleconomista.es/ESP250-energia/ranking-top
4 https://www.businessinsider.es/gobierno-creara-sociedad-espanola-transformacion-tecnologica-1367938
