Cada vez queda menos para o inicio da campaña electoral e van pechándose as incógnitas que aínda restaban. Por exemplo Alternativa Galega de Esquerdas e Compromiso presentan as súas listas. Nas da fronte de esquerdas confírmase o que xa fóra apuntado e Anova e Esquerda Unida reparten os candidatos ao 50%.
Xosé Manuel Beiras será o número un pola Coruña, onde Yolanda Diaz será a número dous. A Anova tamén lle corresponde o cabeza de lista por Ourense, que será David Fernández Calviño e Carme Iglesias Sueiro (EU) será a número dous. Mentres, Esquerda Unida nomeou os cabezas de lista por Pontevedra (Xoán Manuel Fajardo) e Lugo (Ramón Vázquez Díaz). Nestas provincias os números dous son de Anova, María Consuelo Martínez García e María Xesús Casar Díaz, respectivamente.
As listas de Compromiso
De igual xeito a Executiva Nacional de Compromiso por Galicia aprobou este luns pola noite de xeito definitivo as listas da formación galeguista. Pola Coruña están encabezadas por Xóan Bascuas e Xulia Guntín e destaca a presenza de Guillermo Sánchez Fojo (Terra Galega) no número tres, Pilar Neira no catro ou de Pablo González Mariñas pechando a lista. En Pontevedra Rafael Cuíña e Sandra Arauxo encabezan a candidatura, na que tamén están Inma López Silva no número tres ou María Méndez e Miguel Barros pechando a lista.
En Lugo Iván Marrube e Rocío López Pacio son os primeiros, mentres que Xosé Anxo Laxe pecha a candidatura. Finalmente, en Ourense Xosé Manuel Pérez Bouza e José Luis Doval son os número un e dous nunha lista na que tamén están Xosé Carballido ou José Domingo Posada.
