O pasado xaneiro o deputado de Amaiur no Congreso Jon Iñarritu decidiu mudar de estratexia nas críticas ao Goberno de España pola sucesión de actos que poñen en cuestión a aconfesionalidade do Estado. Unha condecoración do Mérito Civil á Virxe do Pilar, as argumentacións da ministra de Emprego sobre o papel da Virxe do Rocío en política laboral ou o ministro do Interior asegurando que Teresa de Jesús "intercedía" por España levárono a instar o Executivo a dar unha explicación. E a resposta xa chegou.
O Goberno central tivo sobre a mesa varias preguntas para responder. "Como considera o ministro do Interior que intercede Santa Teresa de Jesús por España?" e "cal é o papel da Virxe do Rocío na saída da crise". Tamén debía aclarar se "notou melloras tras a condecoración á Virxe do Pilar" e dar conta de se "estima que hai máis intercesións divinas e sobrenaturais na situación actual do Estado" e "de quen". Por último, e deixando xa á marxe a retranca, pedía que o Goberno explicase se "considera que respecta a aconfesionalidade do Estado" e "se ten intención de promover que España se convirta nun Estado confesional".
"A Constitución define a España como un Estado aconfesional", respóndelle o Executivo a Amaiur
Na súa resposta o Goberno, como adoito, optou por pasar por riba das preguntas para ofrecer unha brevísima resposta xenérica de apenas tres liñas que, ademais, está escasamente ligada coas cuestións formuladas. "A Constitución define a España como un Estado aconfesional no que a liberdade relixiosa e a liberdade de expresión son dereitos fundamentais e o respecto ás crenzas un valor cívico que debe preservarse". E ningunha explicación máis.
Isto sucede nun contexto no que, por exemplo, a máxima representación institucional do Estado, a Casa Real, segue a acudir periodicamente á catedral de Santiago para instar o Apóstolo a implicarse en asuntos como a crise económica ou, como sucedeu a finais do pasado ano, para reclamar fórmulas de "sostibilidade" do Estado do Benestar. Na mesma liña, o Consello de Ministros vén de aproveitar a proximidade das datas da Semana Santa para conceder ata 21 indultos por iniciativa de confrarías relixiosas, un deles para un director de banco que estafou un cliente.