O xefe do clan Baltar estaba ao tanto de todas as negociacións coa muller que denunciou o seu fillo por ofrecer traballo a cambio de sexo. José Luis Baltar reuniuse en varias ocasións coa denunciante, á que agora di non coñecer. Trátase de encontros celebrados en plena rúa ao longo de 2015, motivados pola negativa de José Manuel Baltar de cumprir a parte do trato que unha noite de 2010 reuniu a ambos nunha suite do Hotel Francisco II.
A gravación prodúcese tras cinco anos de promesas incumpridas e despois de que as relacións entre Baltar fillo e a denunciante se volvesen máis tensas
eldiario.es tivo acceso aos rexistros de varias das conversas entre a muller e o patriarca do clan Baltar. O seguinte audio corresponde aos primeiros meses de 2015. José Luis Baltar mantén a promesa de conseguir un traballo para a muller, pero descúlpase polas dificultades que a xustiza puña xa nesas datas ao enchufismo que practicou durante todo o seu mandato. "Nin se pode falar por teléfono", quéixase Baltar Pumar. Mira como a xente está procesada simplemente por chamar e pedir unha recomendación", conclúe o xefe do clan. Antes da despedida, unha nova promesa: "Eu xa cho miro mañá".
Escoitar audio
En setembro de 2015 prodúcese o último contacto entre o xa expresidente José Luis Baltar e a muller que denunciou o seu fillo. Pasaron cinco anos pero as promesas sucédense. Baltar pai xustifica os reiterados incumprimentos: "Ao meu fillo non o quero meter nos líos nos que eu me metín". Malia todo, unha vez máis, os Baltar teñen un novo compromiso. "Hai que ter paciencia e conseguireicho cando poida", aclara o xefe do clan. A denunciante non cre as promesas e insinúa o seu primeiro ultimato en cinco anos. José Luis Baltar responde: "Chegados a este punto, mándote á merda".
Escoitar audio
Malia a frecuencia dos contactos, tanto Baltar pai como o seu fillo declararon agora non coñecer a muller que o denuncia nin lembrar nada dos feitos que figuran nas gravacións adiantadas en exclusiva por eldiario.es. O Partido Popular espera desde Madrid unha explicación de Baltar. En Galicia, Alberto Núñez Feijóo preferiu poñerse de perfil e evitar condenar os feitos que se vinculan ao seu barón en Ourense.