A Universidade da Coruña prevé impartir Medicina en 2027

Instalacións do CHUAC na Coruña © CIG-Saúde

A Universidade da Coruña (UDC) prevé ofrecer o título de Medicina a partir do curso 2027-28. Así o asegurou o reitor, Ricardo Cao, en declaracións logo da reunión do Consello de Goberno deste mércores, nas que xustificou a decisión na necesidade de formar profesionais e paliar a falta de remuda xeracional ante a previsión da xubilación do 30% do persoal médico na vindeira década. 

"Estamos convencidos de que esta iniciativa contribuirá de xeito decisivo a reforzar o sistema sanitario e académico de Galicia", dixo Cao, que lembrou o acordo que as tres universidades galegos asinaron hai dez anos, en 2015, para descentralizar a docencia clínica e que a Consellería de Sanidade vén de impulsar hai poucos meses. Aquel pacto tamén establecía que a única facultade galega de Medicina sería a de Santiago, unha condición que parece agora rachar.

Ricardo Cao, reitor da Universidade da Coruña CC-BY-SA UDC

"Nestes dez anos non se aplicou como estaba previsto e só se cumpriu moi parcialmente", dixo este mércores Cao respecto daquel pacto de hai unha década, ao que aludiu para lembrar que implicaba que A Coruña e Vigo participasen na docencia, centralizada na USC con 403 prazas. Agora, considera que é o momento "de abrir unha nova etapa" e iniciar os trámites para incorporar o título de Medicina á oferta da UDC. 

Cao cre necesario "abrir unha nova etapa" e implantar Medicina na UDC para paliar a falta de remuda xeracional e a elevada demanda formativa

Segundo Cao, a universidade coruñesa ten "os vimbios necesarios" para incorporar Medicina ao contar xa coas titulacións de Logopedia, Podoloxía, Enfermaría e Fisioterapia, ademais de varios másters vinculados con esta disciplina. Ademais, tamén fixo referencia á elevada demanda formativa, con 3.000 solicitudes, ou á capacidade da UDC neste ámbito pola importancia do Complexo Hospitalario Universitairo (CHUAC) ou do Instituto de Investigación Biomédica. 

A reclamación dunha facultade de Medicina no campus coruñés vén de lonxe. Desde principios dos anos 90 e retomada con máis forza nos inicios deste século. Agora, será a Xunta quen decida se autoriza ou non o proceso que vén de anunciar Ricardo Cao. 

A Coruña apoia e Caballero pídea para Vigo

Polo momento, neste mércores, a alcaldesa da Coruña, Inés Rey apoiou xa o proxecto expresado polo reitor para solicitar a titulación de Medicina para a cidade. "Hai unha intención centralizadora da USC da man da Xunta para baleirar de contido a docencia na Coruña", dixo a rexedora, que sinalou o CHUAC como hospital de referencia, ademais de destacar os "docentes moi profesionais e referentes" cos que conta A Coruña, ademais de "grandes grupos de investigación". "Sendo unha cidade de maior poboación, hai que impartir docencia aquí", rematou. 

Consello de Goberno da UDC CC-BY-SA UDC

Ao tempo, o seu homólogo en vigués, Abel Caballero, non tardou en reaccionar e advertiu que "se a Xunta aproba" a nova titulación para a cidade herculina, "ten que aprobar Vigo tamén". "Exixímolo", aclarou. 

"Levamos moitos anos reclamando a Facultade de Medicina en Vigo", lembrou Caballero, que di que defenderá "con todas as forzas da cidade" que a universidade da súa cidade tamén imparta a nova titulación no curso 2027/28. 

Despece

  • A UDC rexeita a creación doutra universidade privada en Galicia

    Logotipo da futura Universidade Emilia Pardo Bazán © Cesuga

    A reunión do Consello de Goberno da UDC serviu tamén para aprobar unha declaración institucional en defensa da universidade pública e na que se informou das achegas realizadas pola Universidade ao Real Decreto polo que se endurecerán os requisitos para a creación de centros privados.

    O texto aprobado, segundo indica a UDC, incide no papel da universidade pública como "instrumento de cohesión social e vehículo primordial para o desenvolvemento económico, social e cultural de Galicia". Un sistema universitario público, destaca, que "require da aposta decidida de todos os poderes públicos para garantir a calidade educativa, a excelencia investigadora e a transferencia de coñecemento á sociedade".

    Un marco, detalla a declaración, no que a creación dunha nova universidade —en clara referencia á impulsada por Cesuga— debería responder “unicamente a criterios académicos, sociais e estratéxicos e realizarse no marco dunha planificación acordada que garanta o mantemento da calidade, da cohesión e da sostibilidade do propio sistema universitario, e que evite duplicidades innecesarias na oferta académica” .

    A UDC demanda tamén que as administracións competentes "establezan mecanismos rigorosos e transparentes que garantan que calquera proposta de creación dunha universidade privada só poida ser aprobada se responde ás necesidades dunha educación superior ao servizo do interese público e aos mesmos principios de rigor académico esixidos ás universidades públicas".

    Por último, a UDC manifesta o seu "rexeitamento á creación dunha nova universidade privada en Galicia", por considerar que "non responde ás necesidades do Sistema Universitario Galego nin aos principios de planificación e interese público que deben rexer a educación superior".

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza