O chinés é a lingua con máis falantes nativos no mundo. Case mil millóns de persoas falan mandarín como primeira lingua e uns 1.400 millóns teñen algunha variantes co chinés como lingua nativa, 17% da poboación mundial. A súa importancia internacional está fóra de discusión, con China convertida dende hai décadas na segunda gran potencia económica, só por detrás dos Estados Unidos. 

Neste curso a Consellaría eliminou unha praza de chinés na EOI da Coruña o vindeiro curso ábrese a porta á supresión doutra na EOI de Ourense

Este crecente peso de China fixo tamén medrar en todos os países o interese por aprender a súa lingua. Porén, semella que nas Escolas Oficiais de Idiomas de Galicia esta tendencia está a chocar contra un recorte de prazas decidido pola Consellaría de Educación que xa levou á eliminación dunha praza de chinés na EOI da Coruña é á posible supresión para o vindeiro curso doutra praza de chinés na EOI de Ourense, segundo a relación de vacantes provisionais do concurso xeral de traslados 2024/2025. Esta praza creada na EOI de Ourense no curso 2013/2014 e estabilizada como destino provisional desde entón quedaría sen adxudicación de destino definitivo.

A Consellaría de Educación, a preguntas de Praza.gal, limítase a sinalar que "de cara ao próximo curso, aínda é prematuro informar sobre o cadro de profesorado". En efecto, a relación definitiva de vacantes non se publicará ata o 23 de maio.

No caso de Ourense a decisión non implica aforro ningún de diñeiro público, xa que a praza suprimida corresponde a unha funcionaria de carreira que ficaría "sen traballar e na casa, pero cobrando igualmente"

De confirmarse a supresión prevista na resolución provisional, no caso de Ourense, esta decisión non implicaría aforro de diñeiro público, xa que a praza suprimida corresponde a unha funcionaria de carreira que deste xeito ficaría "sen traballar e na casa, pero cobrando igualmente o salario ou parte do salario do erario público e a disposición, quizais, de realizar substitucións en todo o territorio galego cando fose necesario", segundo ela mesma critica.

Trátase de Alma López Figueiras, que denuncia en primeira persoa a situación e a "planificación neglixente" da Consellaría, "que vai levar a improvisar coa asignación de tarefas desprofesionalizadoras e que é contraditoria coa propia necesidade de atraer alumnado e promover a ensinanza de lingua chinesa nas escolas oficiais de idiomas onde se oferta".

"A incerteza sobre as condicións de dereitos laborais é absoluta, mais xa hai precedentes noutras especialidades como galego con mellor encaixe no sistema educativo que chinés, precedentes que foron consecuencia dunha planificación neglixente", sinala.

A Administración educativa galega dispón de dez funcionarios docentes na especialidade de chinés dende que en setembro de 2023 a Xunta se viu obrigada -pola lei 20/2021 de medidas urxentes para reducir a temporalidade no emprego público- a estabilizar con persoal funcionario as prazas que existían desde o curso 2014/2015. 

Porén, no concurso xeral de traslados do curso 2023/2024, só se adxudicaron seis destinos definitivos nas EOI da Coruña (2), Vigo (3) e Lugo (1), quedando catro funcionarios e funcionarias de carreira como profesores e profesoras provisionais nas EOI de Coruña (1), Lugo (1) e Ourense (2).

Neste senso, López Figueiras denuncia que precisamente nese momento no que pasou a dispoñer de "recursos humanos estables", a Consellaría emprendeu "unha cruzada contra as prazas de chinés porque considera que as cifras de alumnado matriculado son baixas".

A Administración educativa galega dispón de dez funcionarios docentes na especialidade de chinés. Porén, a Consellaría emprendeu "unha cruzada contra as prazas de chinés porque considera que as cifras de alumnado matriculado son baixas", denuncia a mestra

Así, no curso 2025/2026 a EOI de Ourense terá unicamente un profesor de chinés, fronte aos dous existentes ata agora. A mestra, que critica a "absurda política de especulación e improvisación", iniciou unha campaña de denuncia a través dunha campaña en Change.org na que explica a situación creada. 

López Figueiras afirma que a Xunta "actúa de xeito fraudulento, xogando cos dereitos laborais dos funcionarios públicos de xeito totalmente especulativo". E subliña que "atribuír a causa da baixa demanda a un desinterese xeneralizado da poboación é simple, reducionista e de difícil demostración". 

"Cómpre realizar un estudo serio e articular unha estratexia política de promoción das linguas a través das escolas oficiais de idiomas, non suprimir prazas de linguas de gran proxección global como o chinés en resposta a uns datos que realmente non estan analizados", sinala.

A mestra sinala na súa reclamación que "ningún departamento de chinés que conte soamente cun docente pode garantir unha oferta educativa completa que abranga o nivel básico e parcialmente o nivel intermedio se existe vontade real de promover a lingua e prestar ese servizo público: requírense como mínimo dous docentes desta materia por centro"

"Nuns días, os medios faranse eco da importancia das relacións comerciais coa China cando informen da visita de Pedro Sánchez ao país asiático". Será un "bo momento para evidenciar as contradicións políticas da Administración galega avogando por reducir a oferta de chinés", sinala

A mestra e tamén xornalista residiu en China entre 2008 e 2019 traballando como xornalista en medios chineses e estranxeiros e estudando lingua chinesa nunha universidade de Beijing. "Son das persoas emigradas que decidiu retornar a Galicia e, malia as dificultades e o shock emocional do retorno, conseguiu sacarlle proveito á súa experiencia no estranxeiro e profesionalizarse como docente de lingua chinesa", destaca. 

"Nuns días, os medios faranse eco da importancia das relacións comerciais coa China cando informen da visita de Pedro Sánchez ao país asiático", comenta, apuntando que será un "bo momento para evidenciar as contradicións políticas da Administración galega avogando por reducir a oferta de chinés nas escolas oficiais de idiomas do país cando ten os recursos humanos para promover a ensinanza desta lingua, como están facendo noutras comunidades autónomas como Castela e León ou Andalucía".

Na súa petición López Figueiras reclama que "todo o persoal funcionario docente debe traballar en igualdade de dereitos e as prazas estruturais de chinés nas EOI de Galicia, estabilizadas por lei, deben estar dotadas con persoal funcionario definitivo, non provisional, para promover seriamente e sen improvisación o desenvolvendo da ensinanza de chinés en Galicia".