Non sentou ben na Axencia Española de Medicamentos e Produtos Sanitarios (AEMPS) a alerta lanzada polo Colexio de Farmacéuticos de Ourense. Como adiantou Praza Pública, a entidade colexial dirixiuse ao organismo dependente do Ministerio de Sanidade para, no seu propio nome e tamén no dos farmacéuticos da Coruña e Lugo, amosar a súa inquietude por vérense "obrigados" a dispensar medicamentos cuxa orixe descoñecían e dos que, ademais, non podían obter datos procedentes dos laboratorios que os fabrican. Segundo vén de facer público a Consellería de Sanidade a AEMPS dirixiuse por carta á Xunta para garantir a calidade de todos os produtos xenéricos dispoñibles nas oficinas de farmacia un texto no que a directora da Axencia, Belén Crespo, introduce ademais unha dura crítica ás dúbidas do colexio ourensán ou, o que é o mesmo, de tres dos catro colexios galegos.
A Axencia estatal acusa o colexio ourensán de "adoecer de fundamento técnico" nos "conceptos" polos que cuestiona os medicamentos
Antes de explicar que "todos os medicamentos están suxeitos ao mesmo tipo de garantías" Crespo explica que lle traslada ao Goberno galego datos "en relación á información que nos transmitiu por correo" na que "o presidente do Colexio de Farmacéuticos de Ourense -Orense, na misiva orixinal- cuestiona a calidade de medicamentos xenéricos autorizados". "Queremos aclarar algúsn conceptos verquidos nela", di a alto cargo do departamento que dirixe Ana Mato xa que "adoecen de fundamento técnico que os avale", advirte.
Tras a andanada contra os profesionais das farmacias galegas a a máxima responsable da AEMPS asegura que é "imposible" que "haxa medicamentos xenéricos" nas farmacias "que non cumpran coas esixencias de calidade químico-farmacéutica, bioequivalencia a respecto do medicamento de referencia e correcta información segundo os estándares utilizados en todos os países da Unión Europea". Neste sentido, e ante as dúbidas sobre a seriedade e rigor dos laboratorios, abonda para asegura que "non se autoriza ningún medicamento fabricado nun laboratorio que non cumpra coas normas de correcta fabricación" aplicables na UE, "atópese o laboratorio onde se atope". "Os medicamentos non se fabrican en calquera planta industrial", afirma, nun belixerante ton no que tamén engade que "isto é así, fabríquense os medicamentos no país do mundo no que se fabriquen".
Obviando que unha das peticións do colexio de Ourense é, precisamente, coñecer de primeira man os estudos de bioequivalencia -datos que acreditan a semellanza dun xenérico a respecto doutro- para así dispensar os produtos con precisión, a carta da Axencia asegura que estes estudos "teñen sólidos fundamentos científicos baseadnos no principio de que os efectos sistémicos do medicamento se ocasionan pola entrada do medicamento no organismo" ou nas cantidades de principio activo, entre outros aspectos. "Cando un medicamento xenérico solicita unha autorización de comercialización presenta, entre outros documentos, estes estudos de bioequivalencia, que son avaliados polo persoal técnico da AEMPS", sinala. "En definitiva, que os medicamentos autorizados (...) cumpren os requisitos que lles permiten estar no mercado coas máximas garantías de calidade, seguridade e eficacia para a sociedade no seu conxunto", conclúe.
