Ciberataque, ciberacoso, ciberseguridade, ciberdelincuencia, ciberdelincuente ou ciberdelito son algunhas das novas 350 palabras incorporadas pola Real Academia Galega ao seu dicionario, que en moitos casos inciden en fenómenos ligados ás tecnoloxías da comunicación e outros fenómenos que se foron afianzando na sociedade nas últimas décadas, incorporándose de forma natural e habitual á linguaxe cotiá. O Seminario de Lexicografía da institución revisou entre xaneiro e a primeira quincena de xuño preto de 2.200 voces. En total, entre as novas entradas e as novas acepcións de termos xa recollidos, os cambios supoñen 350 novas incorporacións.
Entre as incorporacións figura tamén xestor/-a de comunidade, como alternativa propia ao anglicismo community manager
Entre estes cambios, o dicionario engade a nube unha nova acepción referida ao espazo de almacenamento virtual. E tamén recolle xestor –a de comunidade como voz propia para o anglicismo community manager. Aparecen tamén conectividade ou blogosfera.
Destaca igualmente a inclusión de 168 termos matemáticos que enriquecen o glosario especializado da lingua galega, grazas á colaboración de especialistas de distintos eidos. Entre elas figuran palabras como grafo, hexadecimal ou óvalo; e tamén novas acepcións para interpolar, moda, mediana, congruencia, regresión ou transitivo.
Incorpóranse tamén rendibilizar (ata agora só se recollía o adxectivo rendible), colaborativo, corremundos, aparcacoches e aporofobia (e aporofóbico, o seu adxectivo correspondente), neoloxismo creado pola catedrática de Ética e Filosofía Política Adela Cortina nos anos 90 para designar o "medo, rexeitamento ou aversión ás persoas pobres e desfavorecidas". Ao longo do primeiro semestre do ano o dicionario foi xa incorporando outros termos presentes na lingua viva como rap, baremar ou tripi.
A entrada de aporofobia débese a unha solicitude remitida polo Foro Socioeducativo Os Ninguéns
Dende a Academia lémbrase que a RAG está sempre aberta ás suxestións de novas incorporacións e cambios realizadas por calquera persoa. Por exemplo, o Dicionario inclúe a opción de enviar mensaxes clicando no botón de Axúdanos a mellorar, visible tras a definición de calquera termo, e tamén a través das redes sociais. Por exemplo, a entrada de aporofobia débese a unha solicitude remitida polo Foro Socioeducativo Os Ninguéns.
