Os investigadores atoparon os restos dunha nave, duns 7 metros de lonxitude, e datada entre os séculos XI e XIII, que podía transportar ata vinte persoas e que axudaba a cruzar a ría de Ribadeo
Dende hai anos a Ría de Ribadeo é escenario de diversas investigacións que buscan afondar no coñecemento da navegación que historicamente se levou a cabo nestas augas, a través do estudo subacuático dos pecios de buques afundidos e outros restos arqueolóxicos. A máis destacada destas pescudas ten como protagonista o pecio do Galeón San Giacomo di Galizia, co que se busca avanzar no coñecemento da construción naval da Coroa Española do século XVI, dado o seu excelente estado de conservación.
Continúan, ademais, os traballos no pecio do Galeón San Giacomo di Galizia, co que se busca avanzar no coñecemento da construción naval da Coroa Española do século XVI, dado o seu excelente estado de conservación
Este verán o equipo técnico liderado polo arqueólogo Miguel San Claudio, no que participan institucións coma o Institut of Nautical Archeology de Texas, o CSIC, a University of Wales e o Maritime Archaelogy Trust, coa colaboración da Xunta, regresou aos traballos co obxectivo de continuar cos estudos iniciados en 2018.
No marco desta investigación, o equipo deu con outro achado, ben anterior no tempo, e que achega unha valiosa información sobre a forma en que os peregrinos se deprazaban na Idade Media a través da Cornixa Cantábrica. Os investigadores atoparon os restos dunha nave, duns 7 metros de lonxitude, e probablemente datada entre os séculos XI e XIII, que podía transportar ata vinte persoas e que axudaba a cruzar a ría de Ribadeo, nun momento no que a ponte máis próxima se atopaba a máis de dez quilómetros de distancia.
"Queremos poñer en valor estes achádegos porque ademais da súa importancia histórica e patrimonial promocionan o nome de Ribadeo”, destaca a alcaldesa en funcións, Mónica Freire
A barca medieval de pasaxe é semellante na súa estrutura ás empregadas nese mesmo tempo para cruzar ríos de grande anchura no centro e norte de Europa. A alcaldesa en funcións, Mónica Freire, e os concelleiros de Turismo e de Cultura, Pablo Vizoso e Pilar Otero, asistiron no porto á presentación do último achádego localizado, nun acto no que participaron o arqueólogo Miguel San Claudio e o delegado territorial da Xunta en Lugo, Javier Arias.
A rexedora declarou que “o Concello está colaborando xa desde hai moito tempo con estes traballos de arqueoloxía. Queremos poñer en valor estes achádegos porque ademais da súa importancia histórica e patrimonial promocionan o nome de Ribadeo”.
Xa o pasado 26 de agosto tivo lugar unha charla de Miguel San Claudio para difundir os novos achádegos. Esa actividade terá continuidade este sábado 3 de setembro, cunha nova charla, seguida de inmersións para coñecer de primeira man os tesouros agochados na ría. Para poder participar é preciso contar con título de mergullo e seguro.
