Dúas actividades paralelas á Feira do Libro de Rianxo ligadas a Urco Editora (un obradoiro de escritura creativa e un obradoiro-torneo do xogo de cartas Ophiusa) e previstas inicialmente finalmente non se levarán a cabo. A editorial denunciou esta mañá esta situación, motivada polas críticas realizadas nas redes sociais contra a Federación de Librarías de Galicia (FLG), que organiza a feira.
Pilar Rodríguez sinala que "a Federación non ten nada contra ninguén e non censura a ninguén nunca". Pero engade que "á hora de contratar actividades, somos unha entidade privada e contratamos a quen nos parece"
Urco denunciaba que tamén se suspendera a presentación dun libro (Negruña, de Xosé Duncan), algo que Pilar Rodríguez, presidenta da FLG, nega rotundamente: "A Federación non ten nada contra ninguén e non censura a ninguén nunca. Non se anulou ningunha presentación en Rianxo e iso comprobarase cando se faga público o programa". En cambio, confirma que non se realizarán as dúas actividades antes sinaladas: "Á hora de contratar actividades, somos unha entidade privada e contratamos a quen nos parece".
"A nós chamáronnos dicindo que os eventos que tiñamos previsto realizar quedaban cancelados e que a nosa presenza era incómoda. Entendemos que é incómoda tanto nunha actividade pola que eles nos pagan a nós coma nunha actividade que facemos de balde", responden dende Urco. Porén, engade, "estanse trabucando, porque non nos contrataban a nós. Nós non iamos gañar nada, eramos só intermediarios. Estaban contratando a unha rapaza, profesional da docencia de escritura creativa e escritora, e a un rapaz que ía organizar un xogo de cartas. Ela, ademais, non ten máis relación con Urco que o feito de ter publicado con nós unha novela en 2015. O xogo de cartas, iso é certo, está distribuído por Urco". "Entendemos que é unha pataleta da Federación, nada máis", conclúen
A orixe do conflito
Para entender este conflito hai que retroceder ao pasado mes de maio, á celebración da Feira do Libro de Compostela. Ao seu remate un dos integrantes de Urco editora criticou no seu perfil persoal de Facebook o xeito en que fora organizado o evento: "A feira do libro de 2016 é unha farsa. Hai xente q paga, hai xente como nós, q non. Se non fose porque nos subornaron coa gratuidade, non habería feira. De ser posuidor de armas de destrución masiva, o primeiro acabaría coa Federación de Librarías de Galicia". Denunciaba que a algunhas editoriais se lles cobrara pola presenza da súa caseta, mentres que a outras non, e que a algunhas -coma a Urco- se lles cobrara "en especie", é dicir, coa organización de balde de activiades paralelas á feira.
Urco e Positivas denunciaron que a algunhas editoriais se lles cobrara pola presenza da súa caseta, mentres que a outras non, e que a algunhas se lles cobrara "en especie", é dicir, coa organización de balde de activiades paralelas á feira
Unha denuncia semellante á que neses días realizou Edicións Positivas, que afirmaba que "a xestión da Feira deste ano é inaceptable, con prezos distintos para sectores iguais, mesmo con gratuidade para algúns, segundo os intereses dos organizadores. Ilegalidades dificilmente defendibles". Positivas chamaba a "mudar o rumbo da feira" e alertaba de que fora a feira "máis cativa da historia". Ademais, o Concello de Santiago retiráralle ao evento a subvención que habitualmente recibía, sinalando a edil Branca Novoneyra que "asumimos as peticións da maioría do sector do libro", engadindo que na feira compostelá só participaran tres editoriais da cidade. "Eu tamén considero que cómpre repensar o modelo de feira", concluía.
Dende Urco, critícase nun comunicado que "malia que o desangre das feiras da Federación leva acontecendo desde hai anos, algún membro da directiva non dubidou en botar as culpas de todos os males ante a prensa ao Concello de Santiago de Compostela, que este ano non decidiu apoiar ese modelo caduco e decimonónico, opaco e caciquil".
Pilar Rodríguez nega que existira "agravio comparativo" de ningún tipo, subliñando que na feira compostelá "pagou todo o mundo", en cartos ou coa realización de actividades
Preguntada polas críticas de Urco e Positivas, Pilar Rodríguez nega que existira "agravio comparativo" de ningún tipo, subliñando que na feira compostelá "pagou todo o mundo", en cartos ou coa realización de actividades. "Se este señor considera que a Federación lle fixo unha chantaxe, eu entendo que non debería traballar para quen o está chantaxeando, como el di", salienta, en resposta ás críticas lanzadas por Urco. "Os libreiros vivimos de vender libros, non de censurar a ninguén", conclúe, facendo un chamamento a "dignificar a profesión de editor" e a "construír entre todos e non destruír", traballando "polo libro galego, unidos, dende a mesma Feira do Libro de Vigo", que comeza este venres "e na que, por certo, se presenta un libro de Urco", di.
