Este domingo 30 de xuño remata o prazo para enviar propostas ao concurso aberto de microproxectos de Música en branco: memoria da Agra do Orzán. Os interesados e as interesadas aínda dispoñen de catro días para se presentar á convocatoria para o financiamento de accións culturais vinculadas ao patrimonio sonoro e musical do barrio. As iniciativas deben procurar activar procesos de produción colaborativos e deben implicar a veciñanza no seu desenvolvemento. As escollidas celebraranse entre os meses de outubro e novembro, coincidindo co peche de Música en Branco, proxecto da Concellaría de Cultura da Coruña cofinanciado polo Fondo Europeo de Desenvolvemento Rexional (Feder) no marco do programa Urbana-C .
O proceso está aberto a todas as persoas físicas e xurídicas. Asociacións culturais, veciñais, sociais, ONG, empresas culturais, pensadores, xestores culturais ou comisarios, tanto do barrio da Agra do Orzán como do resto do territorio galego, poden concorrer e presentar propostas que, en todo caso, deben autoproducirse cunha dotación orzamentaria establecida entre 2.000 e 3.000 euros e cuxa temática debe xirar arredor da memoria sonora e musical da Agra do Orzán.
Entre esas conclusións, destacan trazos como a ausencia de espazos públicos, a escasa relación entre asociacións e colectivos, a alta densidade poboacional, a multiculturalidade ou o avellentamento da veciñanza
Música en Branco conta cun marco de acción e unhas coordenadas de intervención definidas tras un longo proceso de investigación, desenvolvido nunha primeira etapa do proceso. Nesa fase inicial, o equipo realizou unha serie de pescudas ao redor da memoria sonora e musical da Agra do Orzán, a través de máis de 60 entrevistas e consultas de fontes documentais, tanto bibliográficas como gravadas. Algunhas das conclusións que se tiraron do proceso poden servir como guía inicial para a elaboración dos proxectos propostos no concurso aberto. Entre esas conclusións, destacan trazos como a ausencia de espazos públicos, a escasa relación entre asociacións e colectivos, a alta densidade poboacional, a multiculturalidade ou o avellentamento da veciñanza.
Contedor de feminismos
O Contedor de feminismos é un proxecto de arquivo móbil deseñado para o espazo público que xorde dunha idea de Uqui Permui. Ten como meta recuperar, documentar e mostrar as historias das mulleres, do feminismo e das loitas de liberación sexual
O Contedor de feminismos é un proxecto de arquivo móbil deseñado para o espazo público que xorde dunha idea de Uqui Permui. Ten como meta recuperar, documentar e mostrar as historias das mulleres, do feminismo e das loitas de liberación sexual. Foi creado para recoller o material, para amosalo e difundilo dunha maneira non xerárquica e con desexo de crear redes.
O contedor está pensado para poder adaptarse ao contexto e, neste caso, xirará ao redor da memoria sonora e musical das mulleres migrantes do barrio para adecuarse aos obxectivos do proxecto Música en Branco. Para participar neste proxecto, hai dúas posibilidades. A primeira delas xa foi, e consistiu nun proceso de investigación previo con algunhas das participantes. A segunda celebrarase o próximo mércores 3 de xullo a partir das 18.00 horas no espazo público diante do Ágora. Nese punto, o dispositivo será colocado e estará aberto a escoitar, como o público que acoda á cita, as historias das mulleres do barrio.
O dispositivo de exhibición foi deseñado por Carme Nogueira e producido para as xornadas Contra vento e marea. Verbas e pegadas dos feminismos, organizadas por Anxela Caramés na Casa-Museo Emilia Pardo Bazán da Coruña, en setembro de 2009. Agora, neste 2013, reinvéntase unha vez máis e adáptase a Música en Branco: memoria da Agra do Orzán.
Últimas actividades antes do verán
O sábado a partir das 11.00 horas, Xurxo Souto celebrará a súa oita Barriografía, a súa serie de programas radiofónicos itinerantes
Esta fin de semana celebraranse as últimas actividades de Música en Branco antes do verán. O sábado a partir das 11.00 horas, Xurxo Souto celebrará a súa oita Barriografía, a súa serie de programas radiofónicos itinerantes. Terá lugar en Katanga e será unha ollada ás identidades urbanas nunha praciña ao carón das vivendas sociais na rúa Mosteiro de Caaveiro.
O domingo, ás 11.15, a cuarta e última camiñada de Paseos polo Barrio sairá dende Meicende e chegará até o Estadio do Deportivo. A ruta pasará polo encoro de Meicende, a Estrada de Bens, a Terceira Rolda, Penamoa, o barrio dos Mariñeiros e a Cidade Xardín. Será unha camiñada longa, con parada para comer. O punto de encontro serán as escaleiras de entrada ao paseo do encoro, ao carón do centro de saúde. Nesta ocasión, o convidado será Juan López Bedoya, xeomorfólogo, do equipo redactor do Plan de Ordenación do Litoral. No outono, volverán as actividades de Música en Branco.
