Con tan só cinco ou seis anos, o vigués Daniel Comesaña comezaba a fixarse naqueles anuncios televisivos nos que estrelas do fútbol promocionaban as súas marcas a base de malabarismos cunha pelota. Aquel rapaciño nunca pensou que a súa insistencia por imitar os ídolos o acabaría convertendo no mellor futbolista free style de España e un dos mellores do mundo nunha modalidade na que a súa relación co balompé limítase ao uso dun balón.
Comesaña é campión de España de 'free style' e un dos mellores do mundo
"Son cousas moi diferentes porque o fútbol ten unhas normas, pero esta disciplina é libre e podes inventar o que queiras e innovar; iso é o bo deste deporte", explica Comesaña, proclamado en Vigo o pasado mes mellor malabarista estatal de fútbol e clasificado entre os 25 mellores do mundo no último campionato internacional que se celebrou en Lecce (Italia) hai unhas semanas.
Xogador do Alierta Traviesas até categoría xuvenil, a Daniel sempre lle gustou desafiar os límites da habilidade futbolística. Daquela, entre os seus compañeiros, practicaba sen máis propósito que a diversión, até que a popularización de Internet lle indicou o camiño. "Fun pouco a pouco; como se me daba ben comecei a colgar vídeos na Rede e foi daquela cando me fixen algo coñecido e me chamaron para algún espectáculo", conta este mozo vigués que tan só empezou a adestrar en serio para o free style hai dous anos.
"No fútbol nunca cheguei a gañar diñeiro, pero aquí si podes porque só depende de ti"
Algo antes decidira deixar o fútbol, vendo que as súas posibilidades deportivas e económicas eran moito máis factibles nesta especie de malabarismo de rúa que no balompé profesional. "No fútbol nunca cheguei a gañar diñeiro e sempre o vin máis complicado, pero nesta disciplina todo depende unicamente de ti; se adestras forte e eres insistente, podes chegar a gañar algo", asegura como se repetir as habilidades que mostra en calquera dos vídeos colgados en YouTube fose doado.
"É un deporte descoñecido e eu levaba tempo practicándoo", insiste como para xustificarse, pero consciente de que sempre tivo unha habilidade especial con calquera cousa redonda que lle chegase aos pés. Aínda así, teima en mellorar día a día. "Adestro seis días á semana e cunha media de dúas ou tres horas por xornada; gustaríame practicar máis, pero teño outro traballo e non podo vivir só disto", aclara.
Malia levar algún tempo practicando, o seu éxito chegou en 2010, cando se celebrou o primeiro campionato de España en Valencia, ao que se clasificou tras superar unha fase previa. Foi aí cando deixou o fútbol e decidiu dedicarse "en serio" á súa verdadeira paixón, unha disciplina na que os apoios publicitarios dalgunhas marcas son fundamentais. "Son moi importantes porque cando te das a coñecer por Internet e vas gañando algún torneo son elas as que te chaman para participar en eventos máis grandes", conta. Eventos que non son estritamente deportivos en moitos casos.
Os practicantes de 'free style' acoden a campionatos, pero tamén son requiridos en todo tipo de eventos como festivais musicais
Esa é unha das vantaxes do free style. "Chámante para facer anuncios, para calquera tipo de show, para festivais de música ou de arte urbano...", explica Daniel Comesaña, que tamén está a recibir nos últimos meses chamadas para participar en competicións "máis serias", o que lle permite coñecer mundo cun balón pegado aos pés.
Mentres, séguese preparando e confía que en pouco tempo poida cumprir un dos seus soños, o de "gañar un campionato internacional". Como el di, a clave está en "ser insistente e dedicarlle tempo". Calquera o diría vendo calquera das súas exhibicións.
