Unha ducia de gifs para non perder(se) no Carballo Interplay
Chega abril, volve o Carballo Interplay. Desde o mércores 3 ata o sábado 6 a capital de Bergantiños acolle a sexta edición do seu festival de contidos audiovisuais. Vai aquí unha ducia de pistas para percorrelo, de acceso libre e gratuíto ata completar aforo.
-
01
As webseries
Desde Canadá ata Singapur. De Galicia a Barcelona. Do Líbano e Nova Celandia. Nesta sexta edición do CIP terás ocasión de probar trinta e catro webseries do mellor e máis selecto do mundo mundial.
-
02
Estrea CIP: Sígueme
A noitiña do xoves 4 será para a estrea do premio a mellor proxecto en lingua galega do CIP 2018, unha webserie feita por estudantes de Comunicación Audiovisual da USC que lles deu por afiar o dente na Psicoloxía.
-
03
Jirafas podcast
O podcast e videoblog, presentado por David Sainz, grava cada programa nunha cidade distinta, con público en directo, e un convidado como protagonista. Para esta ocasión a cidade será Carballo e os convidados protagonistas o cómico David Suárez e o guionista Enrique Lojo.
-
04
Nin musas nin segundonas
Isabel Cano fará un percorrido persoal e de homenaxe ás mulleres que crearon a industria do videoxogo. Ademais analizará diferentes representacións de distintos xogos e reflexionará sobre a importancia de ter referentes, as iniciativas na busca dun cambio e os medios para facer visible o traballo das compañeiras.
-
05
Encontro con creadores galegos de internet
Para saber da explosión de creatividade na rede galega dos últimos anos, todo ollos e oídos o venres pola mañá para Marcos López (Tele Jaita), Miguel Silva Conde (Aquel-e), Laura Cruxeiras (Corasón de Churrasco, Blanca & Tinta) e Juan Gimel; e o sábado para Alba Mancebo, Edu Fernández, Olaxonmario e María Mera.
-
06
Preestrea Flooxer: “Terror y Feria“
Reivíndicase como un Black Mirror co espírito de John Waters, Alfred Hitchcock, La Veneno e Chicho Ibañez Serrador. Polo festival pasarán dous episodios, o director Benja de la Rosa e Sandra Escacena, unha das súas protagonistas.
-
07
Código Fonte Audiovisual: “Autopoética en liña” con Aldaolado.
Lucía Aldao e María Lado súmanse a unha ilustre nómina de persoeiros (Carlos Pereiro, Chévere, Zopilote, Belén Regueira e Touriñán) que en anteriores edicións do Interplay nos confiaron o seu imaxinario audiovisual.
-
08
Show “Hermostra”, con Charo López e Malena Pichot.
Defínense como espectáculo terceiromundista. Por primeira vez en Galicia este show de dúas cómicas arxentinas sobre a pobreza, a política, a relixión, o sexo, a familia en particular e a sociedade en xeral, desde o primeiro ao terceiro mundo.
-
09
Narrativas de ficción en Twitter
No medio de reino do ruído e do imperio do 'zasca' é posible atopar historias de ficción que seducen a milleiros de usuarios. Un par de sedutores, Manuel Bartual e Miguel López 'El Hematocrítico' darán conta do súa traxectoria narrativa no Interplay.
-
10
Redes de sororidade no mundo dixital.
Creadoras de contido dixital como Anabel Lorente, Lula Gómez, Rocío Quillahuaman e Isabel Cano falarán de como a fraternidade nas redes une e fai máis fortes a mulleres de toda condición.
-
11
Los Prieto Flores
Borja Prieto e Natalia Flores volven traer o seu atrevemento de tribo familiar ao Carballo Interplay. Polo salón da súa casa no Pazo da Cultura de Carballo pasarán Charo López, Malena Pichot, El Hematocrítico, Rocío Quillahuaman e Lula Gómez.
-
12
A conversa
No fin de contas, o Interplay é o lugar axeitado onde vernos as caras, gozar da compañía e practicar a nobre arte de falar e escoitar, pasándoo ben. Vémonos en Carballo!