Unha ducia de videoxogos en galego

A mostra

A mostra, que xa se pode ver no IES Politécnico e percorrerá nos vindeiros meses diferentes institutos de educación secundaria da provincia de Pontevedra, aspira a ”converterse nunha ferramenta útil para a promoción da lingua galega, a educación crítica en medios dixitais e o fomento da creatividade cultural e tecnolóxica local”. 

O proxecto combina pezas expositivas físicas e dixitais, materiais informativos e un catálogo divulgativo interactivo, que se pode descargar nesta ligazón. Ademais, inclúe obradoiros, charlas e unha narrativa interactiva creada con Twine, deseñada para traballar aspectos culturais e lingüísticos de forma lúdica e creativa.

Minecraft

Poucos xogos acadaron na última década a significación de Minecraft, lanzado en 2009 e que dende hai un tempo se pode xogar en galego. Este xogo de aventuras e construción conta cunha grean comunidade e un dos que máis liberdade dá aos usuarios, xa que a idea é ser creativos e inventar mil e unha cousas.

Wordle

Wordle é un xogo de palabras en liña creado en 2021 por Josh Wardle. O 
obxectivo é adiviñar unha palabra de cinco letras en ata seis intentos. Dende xaneiro de 2022, pódese xogar en galego

O xogo destaca pola súa sinxeleza e polo desafío diario compartido: todos os xogadores tentan a mesma palabra no día. Isto propiciou que o xogo se viralizase e que se crease unha comunidade global que comparte os seus resultados nas redes sociais.

Chega ao galego Wordle, un xogo para adiviñar palabras en aberto na rede

Koa and the Five Pirates of Mara

Koa and the Five Pirates of Mara é un xogo de plataformas en 3D no que Koa e a súa amiga Napopo emprenden unha aventura por un arquipélago cheo de paisaxes variadas e perigos ocultos.

Con gráficos moi coloridos, música pegadiza e un deseño que combina exploración con velocidade, este título ofrece diversión para todos os públicos.

Townscaper

Townscaper é un xogo de creación sen obxectivo definido que aposta pola liberdade creativa dos xogadores. A diferenza doutros city builders centrados na xestión e administración de cidades, aquí o único propósito é construír ao noso gusto espazos encantadores que flotan sobre a auga.

Avani

Avani é un videoxogo de acción e aventura con vista isométrica no que encarnas a unha nova gardiá destinada a purificar un mundo que foi corrompido por unha enerxía escura. Este xogo gratuíto combina mecánicas accesibles de combate en tempo real con exploración e resolución de pequenos retos.

Tintín Reporter: os xarutos do Faraón

En 2023 publicouse o videoxogo Tintin Reporter: Os Xarutos do Faraón, realizado por Pendulo Studios, que un ano máis tarde contaba coa súa versión galega grazas á tradución levada a cabo por Paula Regueiro e Lois Agrelo coa revisión de Ana Doval.

Na historia, cun coidado tratamento visual, Tintín e Milú van na procura da tumba do faraón Kih-Oskh, nunha viaxe que os leva por Exipto, India e Arabia; polo camiño acabarán tendo que investigar un caso de tráfico de drogas.

'Tintin Reporter' xa se pode xogar en galego

XanChuchamel

XanChuchamel é un xogo de plataformas e quebracabezas no que encarnas a Xan, unha criatura redondiña equipada cun canón de chuchamel. A túa misión será recuperar os doces roubados e restaurar o equilibrio do mundo. Con 50 niveis, trátase dunha aventura ideal tanto para público novo como para persoas amantes dos clásicos dos 90.

The Waylanders

The Waylanders, do estudio coruñés Gato Studio, é o videoxogo galego máis ambicioso. Lanzado en febreiro de 2022, 80 profesionais traballaron durante cinco anos nunha superprodución ambientada na Galicia castrexa e medieval. 

En The Waylanders controlarás un grupo de heroes con habilidades únicas e tomarás decisións que marcarán o rumbo da historia. O combate é dinámico pero pensado para mentes estratéxicas.

O videoxogo de mitoloxía celta 'The Waylanders' convértese na maior aposta galega da historia no sector

The Count Lucanor

The Count Lucanor  mestura elementos de xogo de rol de corte tradicional con quebracabezas e unha atmosfera inquietante onde cada decisión pode levar a múltiples finais. Na historia, lanzada en 2016, trátase de guiar un rapaz chamado Hans que decide percorrer un castelo escuro e enigmático para conseguir un tesouro lendario. A súa beleza pixelada esconde unha profundidade 
sorprendente.

Basureroes: Invasion

Basureroes: Invasion é un beat ‘em up en 2D onde o lixo cobra vida… literalmente. Unha invasión extraterrestre transforma o lixo en criaturas monstruosas que ameazan con afogar o planeta en residuos. Cada personaxe ten habilidades únicas e unha historia propia, o cal aporta variedade e permite que cada xogador opte polo que máis se adapte ao seu estilo de xogo.

Ruin Raiders

Ruin Raiders é un roguelike táctico por quendas no que manexas pelotóns de exploradores que se adentran nas ruínas dunha civilización antiga. Cada partida ten a súa propia evolución e preséntase como un novo desafío totalmente diferente ao anterior, xa que todos os niveis están xerados de forma procedimental, cun combate táctico que porá a proba a túa capacidade estratéxica.

Wee Tanks!

En Wee Tanks!, ao longo dos máis de 100 niveis que compoñen a campaña, loitarás contra máis de 30 clases de inimigos moi perigosos xunto a tanques aliados, os cales poderán estar dirixidos por ti mesmo ou ben controlados pola máquina.

Conta con tres modos de xogo, un editor de mapas e un modo multixogador no que poden combater entre si ata 16 xogadores.