Novas contas públicas e novo recorte. A conselleira de Facenda entregou este venres no Parlamento os Orzamentos Xerais para 2013 e unha primeira ollada ás grandes cifras permite concluír que, de ser aprobado sen variacións, o proxecto suporá unha retallada adicional no ámbito social que podería chegar aos 159,5 millóns de euros. Este é o resultado de sumar as caídas que experimentan en termos absolutos as consellerías de Sanidade, Traballo e Benestar e Educación, que veñen asumir o 71,6% do recorte total, cifrado pola Xunta en 222 millóns.
Segundo os datos facilitados polo Goberno galego relativos ao orzamento axustado, isto é, cos cartos agrupados na actual estrutura do Goberno, Cultura e Educación deixa polo camiño 96,5 millóns, Sanidade perde 51 e Traballo e Benestar cae 12 millóns de euros. En termos relativos a posición destes departamento é dispar á hora de comparar a caída co resto de consellerías. Así, a perda dun 4,30% dos seus fondos sitúa a Cultura e Educación no segundo posto das rebaixas, só superada por Medio Ambiente, Territorio e Infraestruturas, á que lle recortan un 13% que supón 65,7 millóns de euros. No sexto posto do recorte está Traballo e Benestar, cun 1,60% e no sétimo, Sanidade, que cae un 1,50%.
As consellerías sociais asumen o 71,6% do recorte global das contas públicas
De todos estes recortes o máis complexo de analizar é o educativo, dado que os de 2013 son os primeiros Orzamentos nos que as competencias de Cultura e Educación están agrupadas. Non obstante, no resumo dos créditos orzamentarios por funcións é posible atopar que no ano que remata o concepto "Cultura" contaba con 79,9 millóns de euros e que nas novas contas queda en 61,3. Así as cousas, ao restarlle esta caída de 18,6 millóns de euros cabe deducir que o recorte puramente educativo é de, cando menos, 77,9 millóns de euros.
Deste contexto xeral de caídas só se salva unha consellería, a de Facenda, que contará en 2013 cun 4,50% máis de fondos, o que se traduce en 2,3 millóns de euros. A súa titular, Elena Muñoz, obvia os recortes para manter que "as consellerías dedicadas ao gasto social incrementan o seu peso -o gasto total cae en máis de 200 millóns- e polo tanto mantemos eses orzamentos sociais" porque case "oito de cada dez euros se dedican ao gasto social" e ademais, defende, "a baixada de Sanidade está moi por baixo da baixada do orzamento global". "Estamos preservando a esa Consellería, como a Traballo e a Educación", asegura.
M.A.T.I | -13% | -65,7M€ |
---|---|---|
Cultura e Educación | -4,30% | -96,5M€ |
Economía e Industria | -4% | -7,2M€ |
Vicepresidencia e Presidencia | -3,20% | -6,8M€ |
Presidencia da Xunta | -3,20% | -5,7M€ |
Traballo e Benestar | -1,60% | -12M€ |
Sanidade | -1,50% | -51M€ |
Medio Rural e Mar | -1,30% | -8,1M€ |
Facenda | +4,50% | +2,3M€ |