A Xustiza forza a Novagalicia a devolver 549.000 euros en preferentes

Afectados polas preferentes, nunha protesta CC-BY-NC-SA BNG

O xulgado de primeira instancia número 4 da Coruña vén de darlle un novo varapau a Novagalicia Banco a conta das preferentes. A entidade bancaria herdeira das antigas caixas de aforro galegas vén de ser condenada a devolverlle 549.000 euros a un matrimonio de xubilados coruñeses. Nomeadamente, o tribunal resolve a nulidade do contrato a través do cal ao home, de 87 anos de idade, lle foron colocadas 630 preferentes, a razón de 1.000 euros cada unha. A razón non é outra que a falta de información para o cliente.

A elevada cifra que Novagalicia ten que devolver converte esta condena na máis avultada contra un banco derivada das preferentes. Na sentenza, o xulgado amosa ás claras que a entidade, naquela altura Caixa Galicia, non "avaliou o perfil investidor" do cliente na "fase precontractual". Tampouco valorou "a conveniencia de tal produto" para o afectado nin se lle entregou "folleto ou trípico informativo" coas características concretas das preferentes". Polo tanto, resolve, o demandante non tiña datos dabondo "para coñecer os riscos do investimento".

O xulgado conclúe que o cliente non tiña información dabondo e anula o contrato

O mesmo ditame xudicial explica que o documento no que se baseou esta operación non tiña cláusulas coas condicións e nel só estaba reflectido, "con letra pequena e sen a debida relevancia tipográfica", as "características esenciais do produto", isto é, que meter os cartos en preferentes implicaba non poder recuperalos. Neste escenario, o xulgado considera "inadecuado e impropio" este tipo de produto financeiro para pequenos aforradores. Neste caso concreto, salienta, o "contratante" asinou "a partir dunha creanza inexacta" e por iso o contrato debe ser nulo.

Segundo os datos da propia entidade, actualizados o pasado 28 de maio, son xa 97 as sentenzas xudiciais que condenan a entidade a devolverlles os cartos aos seus clientes. Non obstante, entre a xustiza e arbitraxe Novagalicia admite que, cando menos polo momento, devolveu menos de catro de cada dez euros dos atrapados neste tipo de produtos financeiros de alto risco.

 

Afectados polas preferentes, nunha protesta CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.