Mariano Rajoy preside este xoves a reunión da Comisión Delegada para Asuntos Económicos, que prepará o Consello de Ministros deste venres, o primeiro despois de dúas semanas e que terá un marcado contido económico. O Ministerio de Economía redactou un decreto que facilita a intervención urxente dos bancos, que lle dá máis poder ao Banco de España para intervir anticipadamente e que acelerará a destitución de xestores de entidades.
O rescate bancario solicitado polo Goberno de España o pasado mes de xuño incluía unha serie de condicións de obrigado cumprimento e un detallado calendario para a súa concreción, no coñecido como Memorando de Entendemento. Algunhas das condicións xa comezaron a ser satisfeitas ao longo dos meses de xullo e agosto, coma a preparación dos plans de restruturación do sistema financeiro ou a comunicación a Europa de información fidedigna sobre o estado real das entidades bancarias españolas.
É partir de setembro cando o Goberno vai ter que poñer sobre a mesa a meirande parte das reformas esixidas pola troika para a inxección de 100.000 millóns de euros para os bancos españois
Porén, é agora, a partir de setembro, cando o Goberno vai ter que poñer sobre a mesa a meirande parte das reformas esixidas pola troika para a inxección de 100.000 millóns de euros para os bancos españois. Estas son algunhas das datas clave do calendario esixido polo Memorando:
- Finais de agosto: Reforma das competencias do FROB e do Fondo de Garantía de Depósitos
- Segunda quincena de setembro: Completar o novo test de resistencia ao sistema financeiro español, banco por banco
- Finais de setembro: Nova proposta de regulamentación sobre a mellora da transparencia dos bancos
- Outono: Os bancos cun significativo déficit de capital levarán a cabo os Programas de Responsabilidade Subordinada
- Comezos de outubro: Os bancos elaborarán plans de recapitalización
- Outubro: Plan de reestruturación dos bancos do Grupo 2
- Novembro: Proposta para o fortalecemento das entidades non bancarias de intermediación financeira
- Finais de novembro: Proposta para a cotización en bolsa dos bancos que se beneficiaran das axudas estatais
- Finais de novembro: Lexislación que "clarifique" o papel das caixas de aforros na súa calidade de accionistas das entidades de crédito con vistas á redución da súa participación
- Finais de decembro: Transferencia das facultades de control e outorgamento de licenzas do Ministerio de Economía ao Banco de España
- 1 de xaneiro: Esixir a todas as institucións financeiras que cumpran cun capital Tier 1 de cando menos un 9% até 2014
- Finais de febreiro: Lexislación para limitar a venda de preferentes e débeda subordinada a clientes minoristas