Fiare Galiza aprobou esta fin de semana en Vigo a proposta de integración do proxecto na italiana Banca Popolare Etica, que camiña paseniño pero sen pause até a súa constitución nunha entidade bancaria completa pero con fundamentos éticos. Até o momento, Fiare actuaba como axente desta entidade no Estado Español. Na asemblea anunciouse que a entidade ofrecerá o vindeiro mes de xullo servizos e produtos de banca: banca electrónica, contas correntes, domiciliacións… Fiare Galiza aprobou a integración no proxecto por unanimidade dos 50 presentes agás dúas abstencións. A asemblea contou coa presencia do presidente de Fiare, Peru Sansia.

A diferenza doutras entidades como Triodos Bank, Fiare ou Banca Popolare son cooperativas, nas que as persoas que achegan o capital social pasan a ser socias de pleno dereito. Nas asembleas da entidade decídense desde as escalas salariais das persoas liberadas ou a taxa de xuro dentro do marco estabelecido polo Banco de España.

Na última parte da asemblea os asociados debateron a posibilidade da creación dunha segunda forma xurídica, separada da cooperativa pero relacionada coa mesma, que manteña a rede de redes creada durante todos estes anos e permita realizar certas actividades (parabancarias, denuncia…) que non teñen cabida na cooperativa. A cuestión é como manter a autonomía da que agora gozan as diferentes entidades territoriais dentro do Estado. Segundo Raúl Asegurado, activista de Fiare, "para a banca ética é fundamental a creación de grupos locais, o asentamento no territorio e a sensibilidade cara as diferencias culturais e sociais".