A portavoz de Industria do BNG, Carme Adán compareceu este xoves ante os medios de comunicación para presentar diversas iniciativas dirixidas a frear a destrución do tecido industrial galego e lamentou "que o PP gaste as súas enerxías en reducir a democracia cando o tecido industrial galego está a vivir o período máis negro da súa historia".
"O PP gasta enerxías en reducir a democracia mentres o tecido industrial galego vive o período máis negro da súa historia", di o BNG
A deputada afirmou que a actividade industrial galega segue “en caída libre en sen rede e vivindo unha primavera negra” cunha continua destrución de empresas e postos de traballo. Tal e como lembrou, no pasado mes de abril, dixo, perdéronse postos de traballo en T-Solar, Pórtico, Unísono, Caramelo, Gamesa e materializáronse EREs nas empresas auxiliares de automóbiles. "O sector eólico vive nunha absoluta parálise ante a inoperancia” da Consellería de Industria e e unha actitude de mero espectador por parte do Goberno de Feijóo", critica Adán.
Adán lembra os despidos en T-Solar, Pórtico, Caramelo ou Gamesa durante o pasado mes de abril
Ademais, para a deputada nacionalista, esta “sangría de postos de traballo” no tecido industrial galego verase incrementada se non se arranxa definitivamente a grave situación económica pola que atravesa Pescanova. “O conselleiro de Industria, debe comparecer no Parlamento e explicar o que está acontecendo co tecido industrial galego no que nos últimos catro anos foi destruído o 60% na comarca de Vigo, nós estimamos, engadiu, que esta realidade é extensible a toda Galiza”, asegurou.
Ao seu xuízo, o titular de industria debe explicar que plan de “viabilidade para Pescanova” vai poñer en marcha o seu departamento destinado a garantir a actividade da empresa e os postos de traballo e tamén debe explicar as razóns polas que a Xunta negou os avais necesarios para reflotar esta empresa. Sobre o Instituto Galego de Promoción Económica (IGAPE), Adán propuxo reconvertelo nun “organismo máis áxil para dar crédito as industrias e empresas galegas” e pediu que o conselleiro de Industria valore a posibilidade de transformalo nun “ Instituto de Crédito oficial galego” co fin acudir aos mercados financeiros e xerar crédito real.
O Bloque pide á Xunta que actúe ante a "parálise" do sector eólico e que exixa un cambio de normativa ao Estado para restituír as primas ás renovables
Outra das propostas presentadas polo BNG teñen a ver co sector eólico, neste momento, dixo, “paralizado”, con empresas deslocalizadas e outras moitas pechadas definitivamente.Así, Adán lembrou que Canarias acadou o compromiso do Goberno central para obter un sistema de primas ás enerxías renovables antes do verán, o BNG, indicou, leva pedindo dende o cambio da normativa no Estado, que “o ministro e o propio Rajoy analicen a situación galega, e ao igual que Canarias, sexa eliminada a penalización a estas enerxías restituíndo as primas”.
Adán tamén lamentou, a raíz da proposta do PP de reducir o número de deputados no Parlamento, que a gran preocupación do Partido Popular "sexa reducir a democracia". "Gustaríame ver a Feijóo preocupado pola industria e polos postos de traballo que se poden perder en Pescanova, ese debería ser o seu cometido, mágoa que non teñamos goberno nin nada parecido”, concluíu.
