O novo recorte ao salario dos empregados públicos acentúa a perda de poder adquisitivo dos 90.000 traballadores afectados agora por unha nova tesoirada dos gobernos do PP. Neste caso, a Xunta rebaixa, de media, un 4% o soldo dos funcionarios a través da redución do 40% das súas pagas extras.
O Executivo de Feijóo decidiu non reintegrar a totalidade destas pagas extras, malia que o Goberno central si a recuperou incluíndoa nos Orzamentos do Estado. Para curarse en saúde, o presidente galego xa advertiu de que se Rajoy cambia de opinión e decide suprimila totalmente de novo, el veríase obrigado a facer o mesmo. E non é nada descartable que así sexa.
A conxelación salarial e a rebaixa constante do soldo baixan ano a ano o poder adquisitivo dos empregados públicos
Nese caso, o recorte no salario dos empregados públicos vai do 2% para os que menos cobran até o 6% para os que máis e agravará aínda máis a situación dun sector fundamental na economía galega. E aínda que non fose así, o persoal das administracións seguirá tragando cos recortes, sometido á conxelación salarial, sen que haxa posibilidade á actualización da perda do poder adquisitivo acumulada dende o ano 2009, e vendo como o seu soldo segue baixando ao tempo que os prezos continúan subindo.
Atendendo aos datos do INE e ás táboas da evolución do poder adquisitivo elaboradas por sindicatos como a CIG, no último ano, os empregados públicos perderon case o 10% da súa capacidade adquisitiva (-9,9%). Esta redución chega logo da supresión da paga extraordinaria, que supuxo unha baixada de algo máis do 7% no salario, unido á suba do IPC, que a remate de novembro se situou no 2,7%.
A perda de capacidade adquisitiva dos funcionarios foi dun 10% nun ano e dun 32,5% na última década
Se botamos a vista atrás, nos últimos dez anos a perda de poder adquisitivo dos traballadores públicos de Galicia foi do 32,5%, un descenso máis de dous puntos superior ao que sufriron os empregados das administracións públicas no conxunto do Estado, que chegou ao 30,4%. O soldo dos funcionarios galegos incrementouse pouco máis dun 5% na última década, pero o os prezos acumulan un aumento de máis do 37%. As contas son claras. Desde 2010, a perda é dun 23%.
| Ano | IPC Galicia | IPC Estado | Suba salarial | Diferenza Galicia | Diferenza Estado |
| 2002 | 3,8% | 3,5% | 2% | -1,8% | -1,5% |
| 2003 | 3,1% | 3,0% | 2% | -1,1% | -1% |
| 2004 | 3% | 3,0% | 2,7% | -0,3% | -0,3% |
| 2005 | 3,4% | 3,4% | 2,6% | -0,8% | -0,8% |
| 2006 | 3,5% | 3,5% | 2% | -1,5% | -1,5% |
| 2007 | 5,3% | 4,9% | 2% | -3,3% | -2,9% |
| 2008 | 2,1% | 2,1% | 2% | -0,1% | -0,1% |
| 2009 | 2,6% | 2,1% | 2% | -0,6% | -0,1% |
| 2010 | 4,5% | 4% | -5% | -9,5% | -9,% |
| 2011 | 3,6% | 3,1% | 0% | -3,6% | -3,1% |
| 2012 | 2,7% | 2,9% | -7,2% | -9,9% | -10,10% |
| Total | 37,6% | 36,1% | 5,1% | -32,5% | -30,40% |
Ademais, a todos estes recortes hai que engadirlles tamén a serie de medidas que a principios de ano aplicou a Xunta ao sector público. Rebiaxa na paga que cobran os empregados por baixa laboral, a redución voluntaria da xornada dos interinos, supresión dos dereitos de comedor ou os días libres por domingos ou festivos e o recorte dos días de asuntos propios, que pasaron de nove a tres.
Daquela, xustificáronse as medidas para evitar reducir o salario logo da supresión da paga de Nadal levada a cabo por Rajoy e tras a anterior rebaixa do 5% no soldo que fora aplicada xa durante o Goberno de Zapatero.
