O incremento da produtividade en 2011 destinouse en exclusiva ao beneficio empresarial

A ministra de Emprego, Fátima Báñez CC-BY-SA Mtin

O Produto Interior Bruto (PIB) medrou en 2011. Non sucederá o mesmo en 2012, dacordo con todos os paneis de previsións. Malia non ter pechado o exercicio en valores negativos, a destrución de emprego acadou as 600.000 persoas. Recortouse en gasto público, en déficit de conta corrente (apenas 8.000 millóns), en investimento empresarial ou en salarios. No caso galego, por exemplo, a remuneración dos asalariados (traballadores por conta allea) encadea dez trimestres en negativo. Moito antes de que comezase o bruído mediático as nóminas foron adelgazando. Lonxe quedaron as épocas en que, xustificado ou non, o incremento salarial se movía por riba do 10% interanual.

Non están dispoñibles, polo de agora, os datos de contabilidade correspondentes a Galicia (queda por coñecer os do IV trimestre), mais a análise se pode extrapolar a partir da estatística global do Estado. Á conclusión á que se chega é que se produciu en 2011 un importante incremento das rendas de capital fronte a unha caída moderada nos salarios e do custo laboral.

A remuneración dos asalariados encadea dez trimestres en negativo en Galicia

Sen descontar a inflación, botando man do indicador de prezos correntes, obsérvase que o PIB medrou un 1,5% a nivel interanual en España. Isto é, aumentou a produción de bens e servizos da economía española respecto do ano anterior. Pero a remuneración global dos asalariados descendeu fortemente trimestre a trimestre nos dous últimos anos, no último un 2,1%. Segundo fontes expertas consultadas por Praza, e malia botar man dos datos con inflación, "se se descontara as taxas serían inferiores, pero manteríase o signo e as diferenzas".

Rendas. Prezos correntes. Taxas de variación interanuais
  2010 /I 2010 /II 2010 /III 2010 /IV 2011 /I 2011 /II 2011 /III 2011 /IV
PIBpm -1,5 0,1 1,0 1,7 2,2 2,4 2,2 1,5
Remuneración dos asalariados -3,5 -2,3 -2,3 -2,1 -0,8 -0,6 -0,6 -2,1
Custo laboral unitario -2,1 -2,4 -2,9 -2,9 -2,0 -1,7 -1,5 -2,5
Produtividade por traballador 3,0 3,0 2,4 2,2 2,6 2,2 2,8 3,7
Excedente de explotación bruto/Rendas mixtas 0,0 -3,7 0,3 4,4 5,3 8,8 4,7 6,6
Impostos netos sobre produción 2,8 38,1 31,3 11,4 3,6 -8,7 5,8 -5,1

Como se observa na táboa anterior, o custo laboral por traballador descendeu de maneira significativa no último trimestre de 2011 o que, sumado á caída na remuneración dos asalariados, provocou un incremento importante na produtividade. Iso si, todo o incremento da produtividade foi para o beneficio empresarial,o cal no último trimestre medrou un 6,6% con respecto ó mesmo de 2010.

O presidente da CEOE, Joan Rosell CC-BY-SA CEOE

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.