O desemprego aumentou en Galicia un 3,26% no pasado mes, polo que o país conta con 8.724 parados máis que en outubro e suma xa 23.120 desempregados máis que hai un ano (+ 9,12%). En total, 276.536 parados no país, que é a cuarta autonomía con maior suba, e onde máis de 110.000 non perciben prestación ningunha.
O incremento do paro en novembro é de máis do dobre que o experimentado no conxunto do Estado, onde subiu un 1,5% e en 74.296 persoas, segundo os datos do Ministerio de Emprego coñecidos este martes. A cifra total de desempregados apuntados nos servizos públicos de emprego de España é de 4.907.817 millóns, a cifra máis alta da serie histórica.
O desemprego aumentou un 1,5% no conxunto do Estado e un 3,3% en Galicia
Ademais, a Seguridade Social perdeu 205.678 afiliados. Este dato inclúe as 85.233 baixas das coidadoras non profesionais que desde o día 1 deste mes xa non figuran como afiliados do Sistema como consecuencia dos recortes en dependencia aprobados en xullo. A suba do desemprego en novembro, mes no que historicamente adoita aumentar o paro, é a cuarta consecutiva tras a de agosto, setembro e outubro e o segundo peor rexistro neste mes dentro da serie tras o de novembro de 2008 (+171.243 desempregados).
Os recortes aos coidadores incrementan o desemprego en 85.000 persoas
Segundo os datos de Emprego, o paro subiu en novembro en ambos os dous sexos no Estado, pero máis entre as mulleres, con 50.764 desempregadas máis (+2%), fronte a un repunte do paro masculino de 23.532 homes (+1%), situándose o total de mulleres en paro en 2.491.589 e o de homes, en 2.416.228. Ademais, o desemprego baixou entre os mozos menores de 25 anos en 1.014 persoas (un 0,21% menos respecto ao mes anterior), o que contrasta coa evolución rexistrada en novembro do pasado ano, cando o desemprego neste colectivo creceu en 9.455, o que representaba un incremento do 1,98%.
Os servizos concentraron o 85% da suba do desemprego no conxunto do Estado
Por sectores, o paro aumentou en novembro en todos eles, menos na construción, onde baixou en 2.271 persoas (-0,3%). Os servizos concentraron o 85% da suba do desemprego, con 63.166 desempregados máis (+2,1%), seguido da agricultura, con 5.777 parados (+3,1%); a industria, que sumou 4.670 novos desempregados (+0,9%), e o colectivo sen emprego anterior, con 2.954 parados máis (+0,8%).
En canto á contratación, en novembro rexistráronse no antigo Inem un total de 1.151.771 contratos, un 5,4% menos que en novembro de 2011. Deles, 100.179 eran indefinidos, cifra equivalente ao 8,7% do total e un 19,4% superior á do mesmo mes de 2011.
En canto aos datos por provincias, Lugo foi onde máis subiu o paro en Galicia: 27.903 parados (1.580 persoas e 6% no último mes e 2.882 e 11,52% no último ano). Pontevedrá sumou 109.911 parados; A Coruña, 108.225; e Ourense, 30.497.
O Goberno busca escusas
Asecretaria de Estado de Seguridade Social, Engracia Hidalgo, afirmou que "sempre é preocupante" o aumento do paro e que non "satisfai" o Goberno, pero destacou que "non empeora" a tendencia de subida do desemprego.
Hidalgo manifestouno así na rolda de prensa para valorar os datos do paro rexistrado en novembro que aumentou en 74.296 persoas, e da afiliación á Seguridade Social, que perdeu 205.678 adscritos nese mes.
A secretaria de Estado subliñou que o desemprego se portou "mellor" este ano que en novembro de 2011, cando subiu en 59.535 persoas e recordou que a taxa de crecemento do paro estase desacelerando desde hai tres ou catro meses. Tamén se referiu a que nos datos de novembro influíu o efecto "puntual" da extinción dos convenios especiais cos coidadores "informais" para atender a persoas dependentes e que non computaban como parados rexistrados.
