"O maior esforzo váiselle pedir a aqueles coas retribucións máis altas, e será sensiblemente menor para os demais", con esta declaración intentou Alfonso Rueda, vicepresidente da Xunta de Galicia, xustificar o último recorte ao salario dos empregados públicos. Malia que a redución media no soldo será dun 4%, o Goberno galego insiste en vender neste axuste unha suba do 3%, ao comparar as retribucións coas deste ano 2012, nas que a paga de Nadal foi suprimida na súa totalidade.
"Rueda continúa na liña da mentira que iniciou Feijóo", di a CIG, que nega que os recortes sexan proporcionais aos soldos
Para CIG-Administración, Alfonso Rueda "continúa na liña da mentira que iniciou Feijóo" e engade ao argumentario do presidente da Xunta a "mentira" de "dicir que o maior esforzo se pedirá a aqueles coas retribucións máis altas". Para o sindicato nacionalista, o recorte que practica o Executivo galego "non é porcentualmente proporcional ás retribucións, sendo en moitos casos inversamente proporcional ás mesmas".
Así, destaca que en relación aos postos base -os dun subalterno ou un conserxe de instituto- estes teñen un recorte do 4,89%, "superior a calquera posto base dos grupos superiores, incluíndo os do grupo A1 (licenciados universitarios)". Segundo a CIG, tamén ten un recorte superior a un letrado da Xunta e similar ao dun xefe de servizo de libre designación (4,97%), tal e como explica nunha táboa onde se explican os axustes no salarios.
"Dicir que o recorte é proporcional ás retribucións é outra falsidade para vender un recorte inxusto onde se carga máis en quen menos ten"
Ademais, o sindicato nacionalista advirte de que "nos postos que poden ser ocupados por persoal de distintos grupos, o recorte será maior canto máis baixo sexa o grupo ao que se pertence". Así un posto de xefatura de sección terá un recorte maior se quen o ocupa é un administrativo (5,53%) que unha persoa do corpo superior (4,65%), aclara.
"Se dicir que no canto de recorte haberá suba do 3% é unha mentira, dicir que o recorte é proporcional ás retribucións é outra falsidade para tratar de vender un recorte inxusto onde se carga máis en quen menos ten", remata a CIG, que inclúe unha táboa onde se detallan as porcentaxes de redución salariais aplicadas por esta nova medida da Xunta, así como a contía que supón anualmente para cada grupo e nivel.
Nivel | A1 | A2 | C1 | C2 | E | Importe total do recorte |
---|---|---|---|---|---|---|
30 | 5,97% | 3.129,40 € | ||||
28A | 5,26% | 5,57% | 2.378,24 € | |||
28B | 4,97% | 5,27% | 2.173,32 € | |||
26 | 4,87% | 5,19% | 1.961,00 € | |||
25 | 4,65% | 4,98% | 5,53% | 1.752,36 € | ||
24 | 4,41% | 4,73% | 5,29% | 1.585,40 € | ||
22 | 3,94% | 4,26% | 4,82% | 1.293,30 € | ||
20 | 3,51% | 3,82% | 4,37% | 4,74% | 1.056,16 € | |
18 | 3,64% | 4,20% | 4,58% | 959,46 € | ||
16 | 3,65% | 4,24% | 4,64% | 930,98 € | ||
14 | 4,23% | 4,65% | 4,83% | 889,20 € | ||
12 | 4,66% | 4,86% | 847,50 € | |||
10 | 4,89% | 805,76 € |