As casas do concello de Nigrán, Tui e A Coruña foron este mércores protagonistas das protestas dos afectados polas preferentes, que continúan na loita por recuperar os seus aforros tan só semanas despois de que o FROB confirmase que a quita suporá a perda da maioría dos seus cartos. Nesta ocasión, volveuse suspender un pleno, desaloxáronse manifestantes e houbo discusións entre cargos públicos e afectados.
O goberno local de Tui ordenou o desaloxo do salón de plenos para "normalizar a vida" do concello
No Concello de Tui, o goberno local ordenou o desaloxo a primeira hora da mañá do salón de plenos, que permanecía ocupado desde xaneiro por afectados polas preferentes. Moisés Rodríguez, alcalde da localidade, aclarou que a acción se desenvolveu "sen incidencias" e co propósito de "normalizar a vida" da vila e volveu amosar o seu apoio aos aforradores, aínda que insistiu en que a arbitraxe é a mellor opción.
Pero a cousa non quedou aí. Durante a tarde, a Garda Civil e a Policía Local de Tui impiden o paso de calquera persoa ao Concello, logo de que membros da plataforma de afectados do Baixo Miño, acompañados por aforradores da de Gondomar ou Nigrán, se concentrasen ante o consistorio para continuar a protesta. A unha das voceiras do colectivo non lle foi permitida a entrada, polo que varios decidiron permanecer ante a etnrada mantendo a protesta.
Garda Civil e Policía Local impiden o paso ao Concello de Tui, onde se concentran afectados que lograron suspender o pleno en Nigrán
Precisamente, foron algúns dos afectados das preferentes que agora se manteñen ante o Concello de Tui os que conseguiron suspender o pleno de Nigrán pola mañá. O ruído que os aforradores provocaban coas súas bucinas e a entrada de cinco manifestantes, que conseguiron acceder ao pleno, provocou que tivese que suspenderse a actividade do consistorio.
Á mesma hora, na Coruña, varias decenas de afectados manifestáronse ante o Concello e lograron manter un encontro co concelleiro de Servizos Sociais, Miguel Lorenzo, que lles manifestou o seu apoio e defendeu a protesta "lexítima" dos aforradores, que reclamaron "feitos" e non máis palabras. Ademais, solicitaron unha entrevista co alcalde da cidade, Carlos Negreira, que aceptou reunirse con eles o vindeiro luns.
O BNG promove "unha estratexia" común para loitar contra os abusos da banca
“Hai que combater radicalmente un sistema financeiro que desmantela os servizos públicos e rescata a unha banca especulativa”, asegurou este mércores Xavier Vence, voceiro do BNG, polo que avanzou que o BNG manterá diversas xuntanzas con forzas nacionalistas, de esquerdas, sindicais e movementos sociais para establecer “unha estratexia” contra a quita ás preferentes, os desafiuzamentos e a situación de precariedade dos asalariados e autónomos. !Hai que tombar a un PP que só beneficia os intereses da banca", concluíu.