Rajoy acepta o rescate de ata 100.000 millóns para salvar a banca

Rajoy, con Angela Merkel en Chicago © Goberno de España

Rescatados e rescatadas, intervidos e intervidas. As alegrías bancarias dos anos da burbulla inmobiliaria, entre outros factores, desembocaron este sábado no rescate ás finanzas españolas para asistir o sector bancario. É o resultado da cita de urxencia do Eurogrupo, os ministros de Economía e Finanzas da zona euro, que a través de videoconferencia abordaron durante tres horas o xeito en que se efectuará o que se veu dando en chamar de múltiples xeitos pero en ningún caso "rescate", cando menos dende o Goberno de España, e que suporá unha inxección de ata 100.000 millóns de euros de cartos comunitarios -prestados- no Fondo de Reestruturación Ordenada Bancaria (FROB) para que este, á súa vez, faga o propio cos bancos problemáticos, un 30% do total de entidades, segundo cálculos do Ministerio de Economía.

A operación que puxo a proba a resistencia e os dotes diplomáticos do gabinete de Mariano Rajoy e, nomeadamente, do titular de Economía, Luis de Guindos, chegou despois de que o Fondo Monetario Internacional (FMI) adiantase de madrugada o seu informe sobre a banca española. "O núcleo do sistema financeiro de España é sólido, pero persisten importantes vulnerabilidades", titulaba a institución o seu comunicado oficial para explicar, esencialmente, que o seu Programa de Avaliación do Sector Financeiro (PESF) detectou que, "nun escenario desfavorable", os bancos "máis grandes" estarían "suficientemente capitalizados como para resistir novos deterioros", pero "varios bancos necesitarían incrementar as reservas de capital en arredor de 40.000 millóns de euros". Finalmente, os cartos dispoñibles serán máis do dobre. Por que? Tanto De Guindos como o propio Eurogrupo falan de contar cunha "marxe de seguridade". A cantidade é o "suficientemente elevada", vén dicir o ministro, para contar cos fondos que precisan os bancos en problemas e bastante máis. A cifra exacta coñecerase cando as dúas avaliadoras "independentes" que radiografían os bancos rematen o seu traballo, algo que acontecerá ao longo deste mes.

O titular de Economía só accedeu a recoñecer de que cantidade estaba a falar ata que o Eurogrupo a fixo pública a través dun comunicado. Tratábase de exercer a "cortesía" cos seus colegas europeos, xustificou nunha multitudinaria rolda de prensa na que amosou evidentes xestos de incomodade e tensión ante os informadores, aos que reiterou que "o mecanismo que se ideou e que se acordou é extremadamente positivo", tanto para a economía española como para a supervivencia do euro. Esa foi unha das dúas grandes ideas forza da comparecencia. A outra: "isto non ten nada que ver cun rescate". É "unha declaración política dende o punto de vista do que é a petición de apoio financeiro" á UE. Os cartos son só para os bancos e, polo tanto, "as concidións vánselles impoñer aos bancos e non á sociedade española". Ademais, asegura, o FMI só xogará un papel de "asesor", sen supervisar a política macroeconómica do Executivo. "Non hai ningún tipo de condicionalidade nin de reformas económicas fóra do sector financeiro", mantén.

De Guindos nega que haxa novas condicións ou recortes, pero o Eurogrupo advirte de que as finanzas do Estado van ser "vixiadas moi de cerca" e os axustes, "regularmente revisados"

No entanto, esas afirmacións de De Guindos non coinciden co comunicado do Eurogrupo. Nese documento, a xeito de advertencia, os ministros comunitarios amósanse "convencidos de que España vai facer honra aos seus compromisos sobre o excesivo déficit e coas reformas estruturais, coa fin de corrixir os desequilibrios macroeconómicos". "O progreso nestas áreas vai ser vixiado moi de cerca" e "regularmente revisado". Isto acontecerá "en paralelo coa asistencia financeira", da que si falou o titular de Economía.

Nesta liña, a versión optimista do acontecido que transmite De Guindos reitera que a asistencia comunitaria non só non será prexudicial para a cidadanía, as súas condicións de vida e os servizos públicos que recibe, senón todo o contrario. "A razón última de todo iso que se stá facendo" é "ter entidades financeiras máis solventes e que estean en disposición de dar crédito", afirma e, "como non pode ser doutro xeito", a "razón de ter entidades fortes" é "que dean crédito ás pequenas e medianas empresas e ás familias, non hai máis razón ca esa, non lle estamos a facer un favor a absolutamente ninguén", insiste.

E, por que estas explicacións non as ofreceu Mariano Rajoy? "Eu son o membro do Eurogrupo e non o presidente do Goberno", di De Guindos, que engade ademais que o acordo non se tería acadado "sen a axuda" presidencial. Na axenda do xefe do Executivo para o sábado non figuraba acto público ningún. A súa primeira aparición pública segue a estar prevista para o domingo en Gdansk (Polonia), para ver en directo o partido da Eurocopa entre as seleccións española e italiana.

A análise do FMI

Á espera das auditorías independentes o propio De Guindos explica, a grandes trazos, o estado do sector bancario apoiándose no informe do FMI. "O núcleo do sector financeiro español está ben xestionado e resistiría novos shocks, pero existen aínda importantes vulnerabilidades no sistema", di a institución, cuxa subdirectora de Mercados Monetarios, Ceyla Pazarbasioglu, afirma que, malia ás medidas adoptadas para "reducir" esas "vulnerabilidades" nos "bancos máis problemáticos", o "grao e persistencia do deterioro económico pode implicar novas perdas". "A plena implementación das reformas, así como o establecemento dun mecanismo de apoio público crible serán críticos para manter a estabilidade financeira no futuro", engade, nun contexto no que, evidencia, a "solidez financeira dos distintos bancos" é "fundamental para toda análise do sector financeiro dun país".

Para chegar a estas conclusións o Fondo Monetario realizou "probas de tensión" baseadas en "datos confidenciais e detallados de cada banco" que, malia ao anunciado, aseguran, non tiñan "por obxecto establecer unha cifra definitiva para as necesidades de capital, senón detectar deficiencias críticas nalgúns segmentos e institucións determinadas". Así e todo, non só ofrecen o dato dos 40.000 millóns de euros, senón que acrecentan que "as necesidades de capital" dos bancos en problemas "superarían esa cifra debido aos custos de reestruturación e reclasificación dos préstamos que poidan identificar nas valoracións independentes" que actualmente ten en marcha o Goberno español. "É mellor sobreestimar que subestimar", advirten.

Pachi Vázquez lamenta que Feijóo "ande escapado" malia á gravidade da situación e Jorquera ve constado que "todas as estratexias de Rajoy non serviron para nada"

Mentres, en Galicia, a Xunta opta polo mutismo. Nesta liña, o presidente, Alberto Núñez Feijóo, evitou realizar valoración ningunha sobre o posible rescate ante os xornalistas que o abordaron en Celanova, onde a RAG celebra unha sesión plenaria extraordinaria en honra de Celso Emilio Ferreiro. No mesmo acto o secretario xeral do PSdeG, Pachi Vázquez, lamentou que o PP "ande escapado" malia á gravidade da situación. "Galicia navega sen timonel nun día dramático", lamenta. Dende o BNG, nunha primeira "valoración de urxencia" o seu candidato á presidencia da Xunta, Francisco Jorquera, amosouse convencido de que o rescate vai significar "a perda total de soberanía do Estado español sobre a política económica" e "agravará a crise, como xa aconteceu en Grecia, Portugal e Irlanda". "Todas as estratexias de Rajoy foron erradas e fallidas. Non serviron para nada. O Estado español perde o control sobre o sistema financeiro", di o nacionalista, para quen "o normal" sería que "se depurasen as correspondentes responsabilidades políticas".

De Guindos, ante a prensa © Ministerio de Economía

Despece

  • "Non é necesario e será terrible para a cidadanía"

    As novas do máis que posible rescate ás finanzas españolas non deixaron indiferentes aos expertos económicos, tampouco en Galicia. "É unha noticia moi negativa, porque none xsiten razóns reais para a intervención da economía española", afirma con rotundidade o economista Manuel Lago. En declaracións a Praza Pública Lago amósase convencido de que os 40.000 millóns de euros dos que se fala para "sanear o sistema financeiro" poderían "ser asumidas dun xeito ordinario", isto é, acudindo "aos mercados de débeda" e non pola vía da intervención.

    Entón, por que podería chegarse ao rescate? Lago ve "intereses da dereita política europea" e, nomeadamente, "de Alemaña" por tras da operación. "Hai interese en utilizar a debilidade do sistema financeiro español para impoñer un plan de axuste" e o Goberno español só está tentando "pactar un xeito de aplicar" esas reformas "tentando non pagar o custe político". Pero se finalmente chega o rescate "vaise agravar a intensidade, o ritmo e a gravidade dos recortes", di o economista, que augura medidas inmediatas "en materia fiscal, con subidas de impostos" e importantes "redución de gasto en sanidade e ensino", ademais dunha "nova volta de porca en pensións e desemprego". "Será terrible para a cidadanía", resume.

    Quen si comparte a necesidade da capitalización do sistema bancario español con fondos foráneos é o tamén economista Joám Lopez Facal, en cuxa opinión “non se trata dunha elección sobre se a capitalización do sistema bancario é ou non un bo negocio”, senón que “é obrigatorio facelo”. Esta obrigatoriedade débese esencialmente a tres motivos, di: “os miles e miles de correntistas, e esta xente debe ser protexida”, o que non estaría garantido unicamente co Fondo de Garantía de Depósitos, “as importantes débedas dos bancos españois con acredores internacionais, cartos que deben ser devoltos para evitar unha caída en picado dos investimentos externos de consecuencias incalculables” e por último, o feito de que as tres principais entidades en problemas –Bankia, Novagalicia Banco e Catalunya Bank– “xa están de facto nacionalizadas en máis dun 90%, polo que o que pase con elas repercute directamente sobre o Estado español”.

    Facal: "Non se trata dunha elección, é obrigatorio facelo"

    Facal prognostica que a intervención internacional obrigará a “un programa de axustes no sistema financieiro estritamente, deixando fóra o problema fiscal, o problema do orzamento, que pertence fundamentalmente á gobernación do Estado e ás decisións do Parlamento do Estado”. Nese sentido, considera crucial a negociación entre o Goberno español e a UE que, sinala, é “un problema de carácter político” entre a posición dunha “Alemaña que non é proclive a facer concesións neste terreo, para aumentar a disciplina na zona euro” e a de Rajoy, que defende “con bo criterio, circunscribir a axuda ao sistema bancario”, evitando dese xeito que –ao contrario do que ocorreu en Grecia, Portugal e Irlanda, onde o rescate foi de carácter xeral– “a troika comunitaria tome o mando da situación, impoñendo unha axenda e un calendario moi duro de obrigado cumprimento”. Facal espera que se produza un acordo nunha “posición intermedia, de xeito que a inxección de capital non se faga directamente ao Estado español, senón a través do FROB, que é unha axencia gobernamental"

    A xuízo de Facal os resultados da videoconferencia dos ministros de finanzas da Eurozona visualizarase "dentro duns días" e "sen dar un pechamento definitivo ao problema” mentres non se conte coas cifras definitivas das auditorías que están a ser realizadas sobre o terreo. Ademais, sobre a cifra de 40.000 millóns barallada polo FMI, considera "case seguro" que “a cantidade que se deba pedir estará por riba desa cifra”, xa que “é mellor non quedarse cortos” para evitar turbulencias posteriores e conseguir enviar unha mensaxe de calma aos mercados, no sentido de que “isto xa está en marcha”.

    Neste contexto o economista advirte de que "agora o que se abre é un debate político moi importante para non socializar as perdas" e que o rescate ao sistema financieiro confirma que a débeda española era "moi volumosa, pero concentrada fundamentalmente na débeda privada, mentres que até hai pouco as contas públicas españolas mostraban un endebedamento moi moderado, que se incrementou considerablemente nos últimos anos e que o fará aínda máis tras o rescate". E aí entran as escollas políticas: "calquera goberno está obrigado a aumentar impostos e reducir gastos, pero é evidente que a dereita non aumentará os impostos nos mesmos segmentos en que o faría a esquerda e que os recortes de gasto tampouco afectarán ás mesmas partidas cun programa de goberno de dereitas que cun de esquerdas". En calquera caso, conclúe, os "responsables" da situación deberan dar explicacións en sede parlamentaria.

    Lago e Facal CC-BY-SA Praza Pública

  • Comunicado íntegro do Eurogrupo sobre o rescate á banca española

    O Eurogrupo apoia os esforzos das autoridades españolas encamiñadas dirixir a reestruturación do seu sector financeiro e  saúda a súa intención de buscar asistencia financeira dos Estados membros da zona euro a este efecto. 

    O Eurogroupo foi informado de que as autoridades españolas presentarán unha petición formal en breve e está disposto a responder favorabelmente a tal petición. A asistencia financeira sería proporcionada polo ESM/de EFSF para a recapitalización das institucións financeiras. O préstamo será dimensionado para proporcionar un eficaz  cobertura para todos os posíbeis requisitos de capital estimados pola diagnose que as autoridades españolas encargaron aos avaliadores externos e e aos auditores internacionais. A cantidade do préstamo ten que cubrir os requisitos de capital capital estimados cunha marxe de seguranza adicional, estimado nun total de 100.000 millóns de euros. 

    Seguindo a petición formal, tería que ser proporcionada unha valoración pola Comisión, en cooperación co BCE, EBA e o FMI, así como unha proposta para a as necesarias condicións para o sector financeiro que acompañará a asistencia. 

    O Eurogroupo considera que o Fondo de Reestruturación Ordenada Bancaria (FROB), actuando como axente do goberno español, podería recibir o fondo e canalizar as axudas cara ás institucións financeiras con problemas. O goberno español terá a responsabilidade plena da asistencia financeira e asinará o MoU. 

    O Eurogroupo salienta que España xa aplicou significativas reformas fiscais e do mercado de traballo e medidas para fortalecer o capital base dos bancos españois. O Eurogroupo está seguro de que España fará honra aos seus compromisos sobre o excesivo déficit e coas reformas estruturais, coa fin de corrixir os desequilibrios macroeconómicos. O progreso nestas áreas será estreitamente e regularmente vixiado, en paralelo coa asistencia financeira. 

    Alén da implementación determinada destes compromisos, o Eurogroupo considera que as condicións da asistencia financeira terían que estar centradas nas reformas específicas que apuntan o sector financeiro, incluíndo plans de reestruturación en liña coas regras da Unión Europea de axudas aos Estados e reformas estruturais horizontais do sector financeiro doméstico. 

    Convidamos o FMI para apoiar a implementación e controlando da asistencia financeira con informes regulares..

    Jean Claude Juncker, presidente do Eurogrupo © Images99.com

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza