Rajoy atribúese a consecución dunha "liña de crédito" e nega o rescate

Rajoy, durante a comparecencia na Moncloa © Goberno de España

Non é un rescate, é "unha liña de crédito" e o Goberno español non está "presionado", senón que é el e, nomeadamente, o seu presidente, quen "presiona". Presionado, e moito, estivo Mariano Rajoy dende a tarde do sábado e foi precisamente esa presión a que levou o seu equipo a propiciar unha comparecencia de urxencia ante os medios antes de que, como marca a súa axenda, o xefe do Executivo central collese un avión rumbo a Polonia para presenciar o España-Italia da Eurocopa. Nin o persoal de seguridade de Moncloa, confirman fontes presenciais, coñecían que se ía producir unha rolda de prensa -desta volta, con preguntas- na que Rajoy afondou na tese de que "o acontecido onte" é "moi bo para o euro, para España e para Europa", reforzando así o exposto o sábado polo ministro de Economía. En todo, menos nun factor económico esencial: ao contrario que Luís de Guindos, asegura que os ata 100.000 millóns que achegará o Eurogrupo "non afecta ao déficit".

E "non afecta ao déficit", porque "non hai condicionalidade ningunha" para o Estado, afirma, contradicindo tamén o comunicado do Eurogrupo no que se explicitaba que a vixilancia sobre os recortes españois será aínda máis férrea. Rajoy enmarca "o de onte" nunha estratexia perfectamente planificada polo seu Goberno, que "sabe perfectamente onde vai e agradece que os españois así o entendan". "O que non ten sentido é dicirlle á xente mentiras, ou o que non é", isto non é un "rescate" nin o Reino de España está "intervido", asegura. Só se trata dunha "liña de cŕedito para o noso sistema financeiro" que as entidades bancarias con problemas "terán que devolver no seu momento". En calquera caso "non vou entrar en debates nominalistas" porque "isto é o que hai".

Rajoy asegura "o acontecido onte" é forma parte "dun plan global de saneamento da economía española" que evitou a "intervención"

Non hai que "perderse nos vericuetos do momento", reclama o líder popular. Na reunión do Eurogrupo "gañou a credibilidade do proxecto europeo" e "forma parte dun plan global de saneamento da economía española e da súa posta a punto para recuperar o crecemento e a creación de emprego". Como De Guindos, insiste ademais en que esta é a vía máis rápida para que volva fluír o crédito, que é a economía como o "sistema circulatorio ao corpo humano". E, se isto é tan bo, por que non se fixo antes?, preguntáronlle. "Xa me gustaría a min sabelo", declara. "Pero as cousas son como son e non como nos gustarían que fosen". Outros países xa inxectaron máis cartos públicos na banca "hai tres anos", evidencia.

Neste escenario Mariano Rajoy presenta o rescate como un negocio practicamente redondo que o deixa "moi satisfeito", por non ter consecuencias "macroeconómicas" e ser "un paso moi decisivo" no camiño da "recuperación económica" e da "creación de emprego". Así, tras unhas negociacións con Europa "que nin se televisan nin se radian" porque son "discretas" o seu gabinete continuará na senda iniciada pola reforma laboral e a contención do déficit público, reitera. Isto será o luns, porque antes a comitiva presidencial pasará pola cidade polaca de Gdansk. "Marcho fundamentalmente porque a selección española é a selección campiona do mundo" e "campiona de Europa", e "é bo que o presidente do Goberno do seu país estea no partido inagural", tamén "porque me convidou de forma moi especial o presidente de Polonia". "Estas cousas son opinables", admite Rajoy. "Se non vou, porque non vou, e se vou, porque vou". "Podían pensar que se ve moito mellor o partido na casa", razoa. Se así fose, podería ver tamén "o triunfo de [Rafael] Nadal ante Djokovic, que desagrazadamente non poderei ver".

Rajoy, durante a quenda de preguntas © Goberno de España

Despece

  • PSOE e BNG rexeitan a "lotaría" e os "mundos de Yupi" e esixen unha investigación

    Isto non é unha "lotaría" e toca "investigalo". Son dúas das mensaxes chegadas dende as bancadas da oposición, tanto en Madrid como en Galicia, tras a confirmación do rescate e despois da serodia explicación de Mariano Rajoy. O secretario xeral do PSOE, Alfredo Pérez Rubalcaba, afirma que a súa vontade non é "botarlle gasolina ao lume" pero tampouco contribuír á vontade gobernamental de "facernos crer que nos tocou a lotaría, que viñeron os reis magos", porque "todo rescate é un préstamo que asina o Estado, é dicir todos os españois, polo tanto, estamos a falar dun rescate". 

    Partindo desta base o líder socialista afirma que cómpre apostar por que o rescate á banca pase a ser un rescate "aos cidadáns". "Temos que actuar para que os cidadáns que teñen problemas coa súa hipoteca" ou "que foron enganados coas preferentes" tamén teñan "resultados positivos" dunha "axuda" que, apunta, debe ser controlada pola vía parlamentaria, creando "unha comisión que investigue, vixíe e propoñe medidas mentres dure o proceso de recapitalización" das entidades, para que "os traballadores non sexan quen remate pagando o rescate".

    Tampouco os socialistas galegos acreditan no panorama debuxado por Rajoy. Ben ao contrario. Para o seu secretario xeral, Pachi Vázquez, o Goberno central é "incapaz" e "tirou a toalla", e o seu presidente "tómanos por parvos, negando a evidencia". Na súa opinión vén de quedar ao descuberto o "engano do PP", que "pasou de perxurar que nunca habería rescate a dicir que menos mal que nos rescata". Con actitudes "como as dos presidentes de Galicia e de España, que escapan e o negan todo, non estraña que se dispare a prima de risco", di Vázquez.

    Tamén o candidato do BNG á presidencia da Xunta, Francisco Jorquera, ve evidente un rescate en realidade "é un saqueo ao pobo", porque "vai traer consigo máis recortes de dereitos económicos e sociais". O Goberno central, di o nacionalista, "está tentando enganar" sobre as consecuencias desta operación financeira, "cando é o conxunto da sociedade a que vai ter que pagar a factura deste préstamo multimillonario á banca". Entre outras, agoira, as "consecuencias" do rescate van pasar por "subir o IVE, endurecer o sistema de pensións" e "un recorte aínda maior das condicións dos traballadores". Mentres, di, o ministro de Economía tentou "vender os mundos de Yupi" e Rajoy, tras estar ausente "comparece tarde, mal e arrastro, condicionado polos acontecementos, pola indignación social que provocou non ter dado a cara".

    Rubalcaba e Vázquez CC-BY-SA Praza Pública
    Jorquera, candidato do BNG á Xunta CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza