Galicia pechou o ano 2014 cun novo incremento no número total de traballadores e traballadoras autónomas, que creceron en 3.143, ata os 217.576. É o segundo ano de ascenso, despois das continuadas caídas rexistradas dende 2007. Porén, os menores de 35 anos diminúen e só representan o 15,87% do total, fronte ao 16,02% do ano anterior. Autónomos de Galicia (AUGA) denuncia estas "desalentadoras" cifras que "son consecuencia da escasa implicación das administracións públicas e diferentes gobernos, que non paran a pensar na importancia de respaldar os proxectos e iniciativas dos máis novos que queren traballar e vivir na nosa comunidade, sen ter que coller a maleta ou manterse na lista do paro". No conxunto de España a porcentaxe de mozos e mozas autónomas acada o 20% do total.
"As medidas adoptadas non chegan e o exemplo máis visible é a tarifa plana de 50 euros, unha redución da que os novos emprendedores se poden beneficiar tan só os primeiros seis meses"
Para AUGA, "as medidas adoptadas non chegan e o exemplo máis visible é a tarifa plana de 50 euros, unha redución da que os novos emprendedores se poden beneficiar tan só os primeiros seis meses". Sinalan que "é practicamente inútil porque cando acaba o tempo o novo autónomo non soporta o gasto, non aguanta o negocio que emprendeu e ten que pechar".
"O colectivo está cheo de persoas xa adultas, cunha media de idade que ronda os 45 anos, que están soportando a situación porque non ven outra saída"
O portavoz de AUGA, Lisardo Domínguez, subliña que "o colectivo está cheo de persoas xa adultas, cunha media de idade que ronda os 45 anos, que están soportando a situación porque non ven outra saída. Isto, e a falta de respaldo ós mozos son o principal motivo do envellecemento do noso colectivo, un sector fundamental para a economía, que con menos cargas económicas podía estar sendo piar fundamental da recuperación”. A proposta de Autónomos de Galicia en canto á realidade da mocidade emprendedora xira en torno a dous eixos básicos: aumento do período desta tarifa plana como mínimo ata un ano e mellora da formación "para coñecer como e por que emprender sen lanzarse ao baleiro".
Incremento do número total
O 93,12% de todas as novas altas rexistráronse nas provincias de Pontevedra e A Coruña
O incremento da cifra total de traballadores e traballadoras autónomas en Galicia non foi homoxéneo en todas as localidades galegas, pois o 93,12% de todas as novas altas se rexistraron nas provincias de Pontevedra e A Coruña. Lugo foi a única das catro provincias que perdeu activos durante 2014, e Ourense tan só sumou 234 novos autónomos. As cidades con máis crecemento foron Vigo (+440), A Coruña (+326), Ourense (+176), Ames (+151), Santiago de Compostela (+141), Pontevedra (+139) e Lugo (+119). A este respecto, Jesús Diéguez, vicepresidente de APROAMAR-UPTA, sinalou que “o crecemento nas zonas rurais segue sendo moi baixo ou non se produciu; quizais é a elas ás que habería que dirixir as novas accións durante 2015".
2008 | 2009 | 2010 | 2011 | 2012 | 2013 | 2014 | 2015 |
---|---|---|---|---|---|---|---|
237.866 | 231.690 | 224.325 | 219.091 | 215.725 | 212.913 | 213.224 | 216.287 |
Número total de traballadores e traballadoras autónomas rexistradas en Galicia a 31 de xaneiro. Fonte: Ministerio de Empleo
![](https://praza.gal/storage/xornal/uploads/fotos/foto/54e86f72c5be2-2228603119_0dbfea36a4_b.jpg)