• REPORTAXE | Unha mañá co persoal de Alcoa: a loita "urxente e inmediata" por un problema "de fondo"

Uha marcha obreira do persoal da planta de Alcoa na Coruña percorreu este luns a cidade, desde a factoría até a Delegación do Goberno, nunha nova protesta polo peche anunciado pola multinacional. Os operarios camiñaron durante máis de dúas horas berrando "enerxía solución" ou "Alcoa non se pecha" mentres eran aplaudidos e apoiados pola cidadanía. 

A marcha obreira de Alcoa percorreu a cidade reclamando "enerxía solución" e berrando contra o anunciado peche

Pouco antes de encamiñarse cara á Delegación, na praza da Palloza, familiares, amigos e centos de persoas recibíronos con camisetas e proclamas de apoio como o que minutos antes amosaran os bombeiros da cidade ao paso da marcha polo seu parque. Xente de todas as idades agardou a chegada dos traballadores, desde fillos pequenos con camisetas co lema "co noso fuuro non se xoga" até avós con prendas laranxas que dicían "non" ao anunciado peche e mulleres que apostaban por unha "tarifa eléctrica competitiva".  

Tamén representantes sindicais e políticos e ex-traballadores da compañía que expresaban a súa preocupación pola decisión da empresa. "O Goberno tiña que meter man; anos de subvencións para que acaben levando todo mentres imos morrendo", aseguraba un dos concentrados na Palloza baixo a chuvia que non impediu que centos --arredor dun milleiro de persoas-- se unisen á marcha até o centro da cidade. Durante ela, bengalas, bucinas e moitra proclama e emoción. Diante, os fillos máis pequenos dos afectados portaban unha pancarta na que acusaban a Alcoa de deixalos "sen futuro". 

"Imos loitar até o final, até que non quede unha gota de alento", dixo o presidente do comité de empresa, Juan Carlos López Corbacho, que está convencido de que o persoal vai "gañar" esta loita, á que este luns uníronse polo camiño traballadores doutras industrias da comarca. 

A marcha deste luns chega xusto no día no que o comité europeo de Alcoa iniciou o proceso para denunciar a empresa estadounidense por incumprimento da lexislación comunitaria. Os representantes dos traballadores denuncian que o ERE tería que ter contado cun prazo de exposición pública e consulta de quince días antes de que se presentase de maneira firme e formal, tal e como fixo a compañía. 

O comité europeo de Alcoa iniciou este luns o proceso para denunciar a empresa por incumprimento da lexislación comunitaria ao presentar o ERE

Ademais, pola mañá, unhas 150 persoas participaron noutra marcha, neste caso na Mariña, que partiu da planta de Alcoa en Cervo e rematou no centro de Burela. Nesta manifestación, traballadores e cidadanía reclamaron medidas para a supervivencia de todas as factorías da multinacional en Galicia e Asturias. Na mobilización, ademais de representantes sindicais, tamén participaron diferentes cargos políticos da zona.

^{Marcha obreira do persoal de Alcoa, camiño da Delegación do Goberno da Coruña / CC-BY-SA CIG}

Porque, tal e como manifestou o presidente do comité de empresa da planta de Cervo, Xosé Paleo, o persoal non está "para nada" tranquilo logo do anuncio de peche da fábrica da Coruña. Tal e como aseguran tamén desde a planta coruñesa, a estratexia da multinacional sería "dividir" os traballadores. Con todo, o representante sindical considera que "nun futuro curto, de non solucionarse o problema da enerxía", os operarios de Cervo poderían estar "vivindo unha situación semellante". 

Outra marcha na Mariña reclamou medidas para asegurar a supervivencia de todas as plantas de Alcoa

Así, o manifesto lido na praza do Concello reclamou un prezo da enerxía "xusto e competitivo" a nivel europeo e lembraron que as factorías de Noruega e Islando teñen unha tarifa "tres veces máis barata" que as do Estado. 

Por outra bada, o BNG rexistrou este luns no Parlamento unha proposición de lei en materia enerxética destinada ao "abaratamento do recibo da  luz para persoas usuarias e empresas para consolidar o emprego".

En palabras da portavoz nacional do BNG, Ana Pontón, a proposta  responde “á estafa colectiva” da factura da luz "que debemos pagar todos os galegos e galegas que a pesar de vivir nun país que produce moita electricidade, non teñe ningún tipo de compensación” e mesmo están ante a ameaza dun ERE en Alcoa. 

O BNG rexistrou unha proposición de lei para abaratar o recibo da luz para cidadanía e empresas

A proposición de lei ten, segundo o BNG, tres obxectivos: “Abaratar o recibo da luz porque dous terzos da factura dependen de decisións políticas dos parlamentos e gobernos, un novo marco na produción eléctrica que compense a Galiza polos custos sociais e ambientais na produción enerxética, e unha tarifa industrial para as empresas electrointensivas para garantir emprego”.